18
1
मखना चे:लाद येसुकेदी राम्ताको़ हीलो पाम्तामे, "परुदीम् पाईमाखोदी हप्पेदीङ् ङो:लो सु़ हो?"
2
मेत्तीको़ येसुमी कङ् बेबाचालाई ब्रेत्तामेको़ मे़म्द:के आनीलु़म्बु़दी राम्पात्तामे।
3
को़दीङ् दा:तामे, आजेङ् गु गो़नीलाई मो़:नानी, "ग्वा फेरे दुम्सोमाम् ओ़खो़म् बेबाचा खो़म् मादु़म्नी खेदा गे़नायो परुदीम् पाईमाखोदी ओ:ने माचाम्नी।
4
सु़मी ए़म् याक्के बेबाचा खो़ङ् आदबलाई मलीम् पावा, मे़मेङ् परुदीम् पाईमाखोदी हप्पेदीङ् ङो:लो दु़म्।
5
सु़मी अनीङ्दी कङ् ओ़खो़म् बेबाचालाई ब्लावा, मे़म्चामी गुलाई ब्लाई।
6
खेदायो सु़मी गुलाई रे़प्आ ए़म् याक्केद:दीम् कङ्लाई साम्से पा:पादा, बरु मे़म्के आसु़रु़दी ङो:लो खुरुवा लुङ् चा:सो मे़म्लाई घ्लु़म्ळा सदु़कु़दी वाम्पा:चो रीम्ळा दु़म्।
7
साम्से पापा:आ परीक्छे़द:के लागी ए़म् चे़ङ्माखोलाई धीक्कार्! साम्से पापा:आ परीक्छे़ दा रा: ङ, खेदायो धीक्कार्! मे़म् मु़रु़, मे़म्लाङ् साम्से पापा:आ परीक्छे़ रा:।
8
ईगु़ खी खु़लीमी गो़लाई साम्से पा:पाने खेदा मे़म्लाई कोक्तो़को़ घ्रप्तो़। नीम्फो गु़ खी नीम्फो खु़लीनुङ् गे़नायो मारु़प्ळा मी:दी घ्रम्स्चो चाईं बरु गु खु़ली मानु़आ दुम्सोमाम् राम्साम्दी ओ:चो ईके लागी रीम्ळा दु़म्।
9
ईमीचीमी गो़लाई साम्से पा:पाने खेदा मे़म्लाई थे़को़को़ घ्रप्तो़। नीम्फो मीचीनुङ् नरक्दीम् मी:दी घ्रम्स्चो चाईं बरु कङ् मीचीनुङ् राम्साम्दी ओ:चो ईके लागी रीम्ळा दु़म्।
10
"होस् ब:ने, गो़नीमी ए़म्याक्केद:दीम् कङ् मु़रु़लाई यो हेला मापाने। माराङ्खेदा गु गो़नीलाई दा:ङा, परुदी मे़म्द:के परुचाद:मी परुदीम्अपापाके आनी ङाल्लादी गे़नाखेदायो रईदु़म्मे ।
11
[माराङ्खेदा मु़रु़के तावा जाम्ळाद:लाई साम्सेलाङ् ब्लन्पात्था राताम् हो।]
12
गो़नी गेखो़म् मीम्तीनी? कङ् मु़रु़के हीथुम् भे़डादी कङ् जाम् खेदा, मे़म्चामी घुक्ना घुलाई मे़मेङ् साआलादी जु़ल्वादाको़ कङ् जाम्ळालाई लाम्था मादी: ङा?
13
आम्चामी मे़म् जाम्ळा भे़डालाई थीदा खेदा, आजेङ् गु गो़नीलाई मो़:नानी, मे़म् माजाम्ळा घुक्ना घुदीङ् मे़म् कङ्के लागी थे: गे़र्से।
14
ओ़क्सो़ङ् परुदी बक्आ ईनी पापाके ए़म् ग्वा ब: ए़म् याक्केद:दीम् कङ् यो पीलुक्ची मा:दु़म्ला।
15
ईलआमी साम्से पावा खेदा, लासेको़ गो़सी नीक्सी मत्तई दु़म्सीना मे़म्मी मारा मारीम्ळा पाप्ताम् मे़म् कोईसो़ पा:तो़। मे़म्चामी ईके लो: ङीन् खेदा, ईलआ ईके दु़म्ता।
16
खेदायो मे़म्चामी मा:ङीन्वा खेदा गो़नुङ् आफा कङ् खी नीक्सी मु़रु़ लातो़, को़दीङ् नीक्सी खी साम् साँचीलाङ् ककङ् लो: पक्का दु़म्ला।
17
मे़म्चामी मे़म्द:के लो: यो ङीन्चो माबी:सेवा खेदा, मन्डलीलाई मो़तो़। मे़म्चामी मन्डलीके यो लो: ङीन्ने माबी:सेवा खेदा, मे़म्ईके लागी आफालाम् मु़रु़ नुङ् तीरो पोक्आ खो़म् दु़म्ला।
18
आजेङ् गु गो़नीलाई मो़:नानी, गो़नीमी चे़ङ्माखोदी मारा खीक्तीनी, मे़म् परुदी खीङ्से। को़दीङ् गो़नीमी चे़ङ्माखोदी मारा प्रङ्नी, मे़म् परुदी प्रङ्से।
19
आनायो गु गो़नीलाई मो़:नानी, चे़ङ्माखोदी गो़नीदीम् नीक्सी गे़म् लो:दी दु़:नीको़ मारा पु़न्नी, मे़म् परुदीम् अपापालाङ् ईनीके लागी दु़म्,
20
माराङ्खेदा गे़ला नीक्सी खी साम् अनीङ्दी घ्रु़म्मे, मेकेदी गु मे़म्द:के आनीलु़म्बु़दी दु़म्ङा।
21
मेत्तीको़ आम्द:केदी राताको़ पत्रुस्मी दा:ता, "प्रभु, अलआमी गेसो खेप्अके चीचीरे़म्दी साम्से पावा खेदा गु मे़म्के आसाम्से तील्चो? मारा चान्नी खेप्सम्म?"
22
येसुमी मे़म्लाई मो़:तामे, "गु गो़नीलाई मो़:नानी, चान्नी खेप्माआ, चान्नीना गुना चान्नी खेप्।"
23
ए़म्चामी परुदीम् पाईमाखो कङ् हङ्नुङ् ख्रम्ने झाम्, मे़म्चामी आके वा:लीद:नुङ् हीसाब् ब्लाचोम् नीवा पाप्ता।
24
मेकेङ् मे़म्चामी हीसाब् ब्लाचो ओ़स्ता, कदे़म् हजार् सेनारीके ग्रोक्सो ला:आ कङ् मु़रु़ मे़म्केदी रा:तामे।
25
खेदायो मे़म् मु़रु़मी चो:ने माचापावाना मे़म्के होपोमी मे़म्लाई नुङ् मे़म्के नाम्नामी को़दीङ् तावातामी को़दीङ् मे़म्के हप्पे थोक् ले:सोमाम् जे़र् चो:चोम् हुकुम् गीप्ता।
26
मेत्तीको़ मे़म् वा:लीमी आपोक्ची तीङ्स्ताको़ आखु़लीदी खुम्सो दा:ता, "होपो, गुलाई रीम्दीनी, गु ईनीके हप्पे जे़र् चोङु।"
27
मेत्तीको़ मे़म् वा:लीलाई सीस्को:को पात्ता:को़ होपोमी मे़म्लाई सोक्सो मापा:तावा, को़दीङ् मे़म्चामी जे़र् चो:चो मा:दु़म्वा।
28
खेदायो मे़म् वा:ली घ्लु:सो लाताना आवार्चा वा:लीद:दीम् कङ्लाई थी:ता, मे़म्चामी हीथुम् रु़पाके ग्रोक्सो जे़र् ला:ताम् बक्ता। आम्लाई आसु़रु़दी सीप्ता:को़ मे़म्चामी मो़:ता, 'ईजे़र् चो:वार्दो़।'
29
खेदायो मे़म्के आवार्चा वा:लीमी खु़म्ता:को़ मे़म्लाई ले़म्को पाप्ता, "गुलाई रीम्दी, गु गो़लाई हप्पे चो:तीगीना।"
30
खेदायो मे़म् माबी:सेवा, को़दीङ् लाताको़ जे़र् माचो:वाम्सम्म आम्लाई झे़ल्खान्दी पीक्ता।
31
मे़म्के आवार्चा वा:लीद:मी ए़म् हप्पे ताम्तामे को़दीङ् मे़म्द:के मारी आनी ग्वा खा:ता। मे़म्द:मी लाम्तामेको़ ए़म् हप्पे लो: आनी होपोलाई मो़:तामे।
32
मेत्तीको़ होपोमी मे़म् वा:लीलाई आकेदी ब्रेत्ता:को़ मो़:ता, 'ए साम्से पाआ वा:ली, गो़ गुनुङ् ले़म्को पाप्ती, को़दीङ् गु गो़लाई ईजे़र् प्लन्ती गीन्ताना।
33
गु गो़लाई पान्तानाम् खो़ङ्गो यो ईवार्चा वा:लीलाई सीस्को:को पा:चो मा:दु़म्?'
34
को़दीङ् मे़म्के आहोपोमी आसोक्सो बोक्ताको़ मे़म्लाई हप्पे जे़र् माचो:वाम्सम्म सुरीम् आप्ळाद:के गु़दी गीप्ता।
35
"गो़नी ईनी ङप्सीनुङ् सोक्सो कुर्नी खेदा परुदी बक्आ अपापामी यो गो़नीनुङ् मो़खो़ङ् पामे।