19
1
ए़म् लो: दा:तामेको़दीङ् येसु गालील्लाङ् यर्दन्हाम्बा यहुदादीम् वालेकोला लाम्तामे।
2
ङो:लो भीड्द आनी नो:था नो:था गक्तामे, को़दीङ् आम्द:मी मेके मु़रु़द:लाई नु़:पात्तामे।
3
फरीसीद आम्द:केदी राम्तामेको़ आम्द:लाई जाँच् पाचो दा:सो हीलो पाम्तामे, "मारा कोईमी ककङ् लो:मी नाम्नामीनुङ् प्लन्मो़सु़ नु़:?"
4
आम्द:मी दा:तामे, "मारा गो़नी तो़त्तानीम् मा:बो, खी जल्आमी मे़म्द:लाई ङाल्लाङ् वाईंसा नुङ् मीन्चा जल्तामे।
5
को़दीङ् दा:तामे, 'ए़म्चामीङ् मु़रु़मी आके पापा नुङ् मामालाई प्लन्सो आनाम्नामीनुङ् दु़:मो़खो़ ब:, को़दीङ् मे़म्नीक्सी कङ्ङा राम् दु़म्से।'
6
मे़म्द:सी आबो नीक्सी माआ, कङ्ङा राम् दु़म्से। ए़म्चामी पर्मेस्वर्मी सु़-सु़लाई कङ्खङ् ख्रप्तामेम् ब:, मे़म्द:सीलाई गे़मेयो मु़रु़मी माफगासीला।"
7
मे़म्द:मी आम्द:लाई मो़:तामे, "मोसामी माराङ् लालु़लाम् प्लन्चोम् कागत् गीसोमाम् नाम्नामीलाई प्लन्चो दा:सो आरे पाप्ता?"
8
आम्द:मी मे़म्द:लाई मो़:तामे, "ईनी ग्वादीम् ढी:पीमी मोसामी नाम्नामीलाई प्लन्चो दा:सो गो़नीलाई आरे पान्तानीम् हो। खेदायो ङाल्ला मु़रु़ जल्तामेना दा ओ़खो़म् माबकावा।
9
गु गो़नीलाई मो़:नानी, सु़मी बे़भीचार् मापाथी आनाम्नामीलाई प्लन्को़ आकङ्मेनुङ् लालु़खा पावा, मे़म्चामी बे़भीचार् पावा।"
10
चे:लाद:मी आम्द:लाई मो़:तामे, "नाम्नामी नुङ् नाम्नाचादी ओ़खो़मेङ् दु़म् खेदा लालु़खा मापाचोङ् रीम्ळा दु़म्।"
11
येसुमी मे़म्द:लाई मो़:तामे, "हप्पे मु़रु़द:मी ए़म् लो: ब्लाने माचाम्मे, मे़म्द:मी मत्तई चाम्मे, गे़म्लाई ए़म् गीना ब:।
12
माराङ्खेदा कोई गीङ्मेनाङ् नपुंसक् दु़म्मे, गेसो चाईं मु़रु़मी बनेपाना नपुंसक् दु़म्मे। गेसोमी चाईं आनीदबमीङ् आनीदबलाई परुदीम् पाईमाखोके लागी नपुंसक् बनेपामे। सु़मी ए़म् ब्लाने चाबा, मे़म्चामी ब्लावाला।
13
येसुमी बेबाचाद: त:रे आनी गु़ जुल्सो प्रार्थना पामेला दा:सो मु़रु़द:मी मे़म्द:लाई आम्द:केदी रा:तामे। को़दीङ् चे:लाद:मी मे़म् मु़रु़द:लाई हु़त्तामे।
14
खेदायो येसुमी दा:तामे, "बेबाचाद:लाई अकेदी राने गीने, मे़म्द:लाई माते़ङ्ने। माराङ्खेदा परुदीम् पाईमाखो ओ़खो़मेङ्द:के हो।"
15
को़दीङ् बेबाचाद त:रे आनी गु़ जु़ल्तामे को़दीङ् आम्द मेकेदीङ् लाम्तामे।
16
आम्द:केदी राताको़ कङ् मु़रु़मी दा:ता, "ए गुरु, गु गे़नायो मारु़प्ळा राम्साम् ताचोलाई मारा रीम्ळा ते पाचो दु़म्?"
17
आम्द:मी मे़म्लाई मो़:तामे, "रीम्ळा ते मारा हो मे़म् गो़ गुलाई माराङ् हीलो पाई? रीम्ळा दा कङ् मत्तई ब:मे। खेदायो गो़ राम्साम्दी ओ:चोम् ग्वा पाई खेदा आरे पाना लो:द रे़म्सो़।"
18
मे़म्चामी आम्द:लाई मो़ता:मी, "गे़म् गे़म् चाईं?" येसुमी दा:तामे, "गो़ मासातो़, गो़ बे़भीचार् मापाओ़, गो़ माकु़ओ़, गो़ लीमो आजे मासो़ङो़।
19
दबके मामा पापाके सीलाखा जुल्चो को़दीङ् दबके छीमेकीलाई दबलाई खो़ङ् माया पाचो।"
20
मे़म् स:लचा मु़रु़मी आम्द:लाई मो़ता:मी, "ए़म् हप्पे दा गु रे़प्तुमेङ् ब:। अकेदी मारा माले:आ ब:?"
21
येसुमी मे़म्लाई मो़:तामे, "गो़ से:आ दुम्चो लामी खेदा लाओ़को़ ईकेदी बक्आ हप्पे थोक् ले:ङो़को़ दु़खाचाद:लाई गीओ़मी, को़दीङ् गो़ परुदी सम्पती ताई, को़दीङ् राओ़को़ गुनुङ् गको़।
22
गे़ना मे़म् स:लचा मु़रु़मी ए़म् लो: ङीन्ता, मे़म्के आग्वा खा:ताको़ लाता वार्ता, माराङ्खेदा मे़म्के हक्सीङ् सम्पती थीता।
23
को़दीङ् येसुमी आनी चे:लाद:लाई मो़:तामे, "आजेङ् गु गो़नीलाई मो़:नानी, परुदीम् पाईमाखोदी थीआ मु़रु़ ओ:ने माचाम्मे।
24
आनायो गु गो़नीलाई मो़:नानी, थीआ मु़रु़द:लाई पर्मेस्वर्के पाईमाखो ग:रे ओ:चोदीङ्दा बरु उँट् लु़म्जेके आनो़:लाङ् घ्लु:चो सजीलो दु़म्।"
25
ए़म् ङीन्सोमाम् चे:लाद:मी हक्सीङ् सीङ्लङ् दुम्तामेको़ हीलो पाम्तामे, "मो़खो़ खेदा सु़ ब्लन्ने चाबा?"
26
येसुमी मे़म्द:लाई को:तामेको़ दा:तामे, "मु़रु़द:के लागी ए़म् दु़म्नेङ् माचाप्चोम्लो: हो, खेदायो पर्मेस्वर्के लागी हप्पे थोक् दु़म्ने चाबा।"
27
मेत्तीको़ पत्रुस्मी आम्द:लाई मो़ता:मी, "को:ने, गुकु दा हप्पे थोक् प्लन्सो गो़नीनुङ् गक्ताकु़म् ब:। गुकु चाईं मारा ताका?"
28
येसुमी मे़म्द:लाई मो़:तामे, "आजेङ् गु गो़नीलाई मो़:नानी, गो़नी गे़म्द अनो:थाला गक्तानीम् ब:, आनीन्ता चे़ङ्माखो जो़:सेना गे़ना मु़रु़के तावा आके महीमाके खोसीम्बादी नी:से, मखना गो़नी यो कदे़म् नीक्सी खोसीम्बादी नी:सीनी, को़दीङ् ईस्राएल्दीम् कदे़म् नीक्सी पा:चाद:लाई क्रीनी ।
29
ककङ् गे़म्चामी अनीङ्दी खीम्, ङप्सीद, सामीद, पापा-मामा, तावातामी, रु: वालेको प्लन्ताम् ब:, मे़म्चामी हीथुम् गुना तावा, को़दीङ् मारु़प्ळा राम्साम् तावा।
30
खेदायो हक्सीङ् मु़रु़ गे़म्द ङाल्ला ब:मे नो:था दु़म्मे, को़दीङ् नो:था दु़म्ळाद चाईं ङाल्ला दु़म्मे।