20
1
"परुदीम् पाईमाखो रु:के कङ् होपो खो़म् हो, मे़म् बीहान् ङा आके अङ्गुर् रु:दी खेतालाद:लाई नीमे़क्दी ते पा:पात्था आ:तोला घ्लु:ता।
2
खेतालाद:नुङ् काई नाम्ती ताचोम् नीमे़क् एत्ती-मेत्ती हो दा:मोसो आम्चामी मे़म्द:लाई आके अङ्गुर् रु:दी फ्लीता:मी।
3
आम् घु घ्री:ताना आ:तोला घ्लु:ता, मे़म्चामी आफालाई बजार्दी ते मान्थी राप्ळामो़खो़ बक्आ ताप्ता:मी,
4
को़दीङ् आम्चामी मे़म्द:लाई मो़ता:मी, 'गो़नी यो अङ्गुर् रु:दी लाने, को़दीङ् गेसो जु़प्ळा दु़म् गु मे़म् गो़नीलाई गीनानी।'
5
को़दीङ् मे़म्द लाम्तामे। आनायो आम् कदे़म् नीक्सी घ्री:ताना नुङ् साम् घ्री:ताना आ:तोला घ्लु:ताको़ मो़खो़ङ् पाप्ता।
6
आनायो ङो घ्री:ताना आ:तोला घ्लु:ता आफाद:लाई राप्ळामो़खो़ बक्आ थीता:मी, को़दीङ् मे़म्द:लाई मो़ता:मी, "गो़नी माराङ् एके अखनासम्म ते मान्थी राम्नीमो़खो़ ब:नी?"
7
मे़म्द:मी आम्लाई मो़:तामे, "सु़मीयो गुकुलाई नीमे़क्दी लाई पाक्ताकीम् मा:बो।" आम्चामी मे़म्द:लाई मो़ता:मी, "गो़नी यो अङ्गुर्रु:दी लाने।"
8
नाम् रीक्ता, को़दीङ् अङ्गुर् रु:के होपोमी आके खेतालाद:के आङो:लोलाई मो़:ता, खेतालाद:लाई ब्रे:तो़मीको़ नो:था राआद नुङ् ङाल्ला राआद हप्पेलाई मे़म्द:के आनी नीमे़क् गीओ़मी।
9
ङो घ्री:ताना तेदी राआद राम्तामे, को़दीङ् मे़म्द हप्पेमी काई नाम्तीम् नीमे़क् ताम्तामे।
10
ङाल्ला नीमे़क्दी राआद राम्तामे, मेत्तीको़ मे़म्द:मी थे: ङ ताया दा:सो मीम्स्तामे, खेदायो मे़म्द हप्पेमी यो काई नाम्तीम् नीमे़क् ताम्तामे।
11
नीमे़क् ताम्ता मेको़दीङ् होपोके चीचीरे़म्दी मे़म्द से़गासे़गा पाने प्रे़ँस्तामे।
12
मे़म्द:मी दा:ने प्रे़ँस्तामे, 'ए़म् नो:थाम्द:मी कङ् घन्टा मत्तई ते पाम्तामे, खेदायो गो़नी मे़म्द:लाई गुकु बीहान्दीङ् अखनासम्म कु़रा कु़र्आद नुङ् चो़आ नाम् ते़र्आद थीङ् पान्तानीम् ब:।'
13
खेदायो मे़म्चामी मे़म्द:दीम् कङ्लाई मो़:ता, 'वार्चा गु गो़ त:रे मारायो मारीम्ळा पा:तङ्मे मा:बो। मारा गो़ गुनुङ् काई नाम्तीम् नीमेक्दी ते पाआ दा:सो बीस्तेम् माआ?
14
ईके ताचोम् नीमे़क् ला:सो लाओ़। ए़म् नो:थाम्लाई यो गो़लाई गीनाथीङ् अगीथु़ दङ्।
15
अके गेसो ब:, मे़म् गु अदबमी दङ्सीङाम् खो़म् पाने माचाबु ङा? गु आफाद:लाई ब्लन्पादुमीना ईमीची माराङ् खादा?'
16
"मे़म्चामी नो:थाम्द ङाल्ला दु़म्मे, ङाल्लाम् द नो:था दु़म्मे।"
17
येरुसलेम्ला लासोङ् बक्तामेना येसुमी कदे़म् नीक्सी चे:लाद:लाई कफाला ला:तामेको़ लाम्दी मे़म्द:लाई मो़:तामे,
18
"गो़ई यरुसलेम्ला लासोङ् ब:या, आबो मु़रु़के तावा आङो:लो पुजाहारीद नुङ् मुलु चे़न्आद:के आनी गु़दी गी:से, को़दीङ् मे़म्द:मी आम्लाई बे़क्चोम् सुरीम्के दोस् लाईपामे।
19
को़दीङ् आम्लाई रक्चोलाई, कोर्रामी घीचोलाई, को़दीङ् क्रुस्दी चा:सोमाम् सा:चोलाई मे़म्द:मी आफादो:चाके गु़दी गीमे, खेदायो साम् नाम्ती आम् आसेली दुम्सो बोङ्।
20
मेत्तीको़ जब्दीयाके आतावाद:सीके मामामी आतावाद:सीलाई कङ्खङ् ला:सोमाम् येसुके आनी ङाल्लादी पोक्ची तीङ्स्चो आम्द:नुङ् ले़म्को पाप्ता।
21
आम्द:मी मे़म्लाई हीलो पाम्तामे, "गो़ मारा पु़नी?" मे़म्चामी आम्द:लाई मो़ता:मी, "आरे पाने, को़दीङ् ईनी पाईमाखोदी अके ए़म् नीक्सी तावाद:सीदी कङ् ईनी पे:रोला, को़दीङ् आकङ्मे ईनी झुम्रोला नी:सीने तासेला।"
22
खेदायो येसुमी मो़:तामे, "गो़सी मारा पुन्सोङ् बक्सी, मे़म् माजोक्सी। गे़म् सुरीम्के कान्छु़रालाङ् गु तु:चो ओ़स्तीम् ब:, मारा मे़म्लाङ् गो़सी यो तु:ने चाप्सी?" मे़म्द:सीमी दा:तासे, "चाप्सु।"
23
येसुमी दा:तामे, "अकान्छु़रालाङ् गो़सी तु:सी, खेदायो अके पे:रो नुङ् झुम्रोला नी:सीने गीचोम् लो: अगु़दी मा:बो। मे़म् ठङ् मे़म्द:के हो। मे़म्के लागी अपापामी झुम्सीने थु़म्तामेम् ब:।"
24
ए़म् ङीन्तामेको़ कदे़म् चे:लाद:के मे़म् नीक्सी ङप्सीनुङ् आनी सोक्सो बोक्ता।
25
खेदायो येसुमी मे़म्द:लाई आनीकेदी ब्रेत्तामेको़ मो़:तामे, "गो़नीलाई था: ब:, आफादो:चाके सासन् पाआद:मी मे़म्द त:रे आनी खुसी सासन् पामे, को़दीङ् मे़म्द:दीङ् ङो:लोद:मी मे़म्द त:रे आनी सा: थु़न्दीमे।
26
ईनीके ग:रे ओ़खो़म् मा:दु़म्, खेदायो सु़मी गो़नीदी ङो:लो दुम्चोम् ग्वा पावा, मे़म् ईनीके सेवा पाआ दुम्चो दु़म्।
27
सु़मी गो़नीदीम् ङाल्लाम् दुम्चोम् ग्वा पावा, मे़म् ईनीके वा:ली दुम्चो दु़म्।
28
गेक्सो़ मु़रु़के तावा यो सेवा ताथा माआ, खेदायो सेवा पाथा नुङ् हक्सीङ्लाई फक्चोके लागी आथीङ् चोचोलाई आसाम् गीथा राता।"
29
आम्द यरीहोलाङ् लासोङ् बक्तामेना कङ् ङो:लो भीड् आम्द:के नो:थाला ला:ता।
30
लाम् पु़म्दी नी:सीआ नीक्सी काती माताआद:सीमी येसु मे़म् लाम् लासोङ् ब:मे दा:आ ङीन्तासेको़ ओ़खो़ दा:सोङ् ब्रे:तासे, "ए प्रभु, दाउद्के तावा गुसुलाई सीस्को:को पा:तीसीनी।"
31
भीड्मी मे़म्द:सीलाई वाय वाय बक्से दा:सो हु़त्ता, खेदायो मे़म्द:सी ओ़खो़ दा:सोङ् झन् मारी ब्रे:तासे, "ए प्रभु, दाउद्के तावा, गुसुलाई सीस्को:को पा:तीसीनी।"
32
मेत्तीको़ येसु राप्तामे, को़दीङ् आम्द:सीलाई ब्रेत्तामेको़ मो़:तामे, "गो़सी मारा पु़न्सी? गु ईसीके लागी मारा पाङा?"
33
मे़म्द:सीमी आम्द:लाई मो़:तासे, "ए प्रभु, असीमीची होक्ती गीसीनी।"
34
येसुमी सीस्को:को पात्तामेको़ मे़म्द:सीके आसी मीचीदी खु़त्तामे, को़दीङ् मखनाङ् मे़म्द:सी काती ताआ दु़म्तासे, को़दीङ् मे़म्द:सी आनी नो:था नो:था गक्तासे।