21
1
आम्द यरुसलेम्के ने़न्था जईतुन् कोङ्कोदीम् बेथ्फागेदी झक्राम्तामे, मेत्तीको़ येसुमी नीक्सी चे:लाद:सीलाई ओ़खो़ दा:सोमाम् फ्ली:तामे,
2
गो़सी उ: हारेम् दे़ल्दी लासे। मेके झक्सीयो नो:सो गो़सी कङ् गधा नुङ् मे़म्के आबाछा पा:ना थी:सी। मे़म्लाई प्रक्सो अकेदी पी:से।
3
कोईमी गो़सीलाई माराङ् दा: खेदा, 'प्रभुलाई ए़म् चाईदु़म्ता' दा:चो को़दीङ् मे़म्चामी फ्ली:ती गीई वार्दा।
4
पर्मेस्वर्के लो: ळक्आद:मी ळङ्ना लो: झङ्ला दा:सो ए़म् दु़म्ताम् हो,
5
"सीयोन्के आतामीलाई मो़:तो़, को़ङो़, ई हङ् ईकेदी रासोङ् ब: नरम् दुम्सोमाम् गधा त:रे ओ:सोमाम्, गधाके आ:चा, कङ् बाछो त:रे।"
6
मेत्तीको़ चे:लाद:सी लातासे, को़दीङ् येसुमी मे़म्द:सीलाई आरे पाम्तामेम् खो़ङ् पातासे।
7
मे़म्द:सीमी गधा नुङ् मे़म्के आबाछो रा:तासे, को़दीङ् मे़म् त:रे आनी वा: ब्लो़म्तामे, को़दीङ् आम्द मे़म्त:रे नीस्तामे।
8
भीड्दी हक्सीङ्मी आनी वा: लाम्दी ब्लो़म्तामे , आफाद:मी ढे़क्सीके आळे़क्सी चर्तामेको़ लाम्दी ब्लो़:ती गीम्तामे।
9
आम्द:के ङाल्लाला नुङ् नो:थाला बक्आ भीड् ओ़खो़ दा:सोङ् ब्रे:ता, "दाउद्के तावालाई होसन्ना! आसीलोङ्मा आम्द, आगे़म् परम्प्रभुके नीङ्दी रामे। परम्प्रभुलाई होसन्ना!"
10
आम्द येरुसलेम्दी ओ:तामेना, हप्पे सहर्दी से़न्दा दु़म्ता! मु़रु़द:मी हीलो पाने प्रे़ँस्तामे, "ए़म् सु़ हो?"
11
भीड्दीम् मु़रु़द:मी दा:तामे, "ए़म् गालील्दीम् नास्रत्लाङ् राआ पर्मेस्वर्के लो: ळक्आ, येसु हो।"
12
येसु पर्मेस्वर्के मन्दीर्दी ओ:तामे। को़दीङ् आम्द:मी मन्दीर्दी ले:आ जाप्आद हप्पेलाई चु़त्तामे, को़दीङ् ग्रोक्सो फा:आद:के आनी टेबल् नुङ् परेवा ले:ळाद:के नीस्चोम् लीप्ती गीम्तामे।
13
आम्द:मी मे़म्द:लाई मो़:तामे, "ए़म् रे़ङ्ना ब:, 'अखीम् प्रार्थनाके खीम् दा:चोम् दु़म्।' खेदायो गो़नीमी ए़म्लाई डा:काद:के ख्लु़स्दीखा बने पान्तानीम् ब:।"
14
काती माताआ नुङ् आनी खु़ली मानु़आद मन्दीर्दी आम्द:केदी राम्तामे, को़दीङ् आम्द:मी मे़म्द:लाई नु़पात्तामे।
15
खेदायो आङो:लो पुजाहारीद नुङ् मुलु चे़न्आद चाईं आम्द:मी पाम्तामेम् सीङ्लङ् पा:आ ते ताम्तामे, को़दीङ् बेबाचाद:मी मन्दीर्दी "दाउद्के तावालाई होसन्ना" दा:सोङ् ब्रे:तामेम् ङीन्तामे, मेत्तीको़ मे़म्द:के आनी सोक्सो बोक्ता।
16
को़दीङ् मे़म्द:मी येसुलाई मो़:तामे, "ङीन्सोङ् बङे, ए़म्द:मी मारा दा:सोङ् ब:मे?" मेत्तीको़ येसुमी मे़म्द:लाई मो़:तामे, "हो, ङीन्सोङ् ब:ङा। मारा गो़नीमी तो़त्तानीम् मा:बो, 'बेबाचाद नुङ् नु़चु़ तु:आ आ:चाद:के सो़:लाङ् ईनीके जोङ्ना प्रसंसा घ्लु़न्तानीम् ब:'?"
17
मेत्तीको़ मे़म्द:लाई जु़ल्वात्तामेको़ आम्द सहर्लाङ् घ्लु:सो बेथानीयादी लाम्तामेको़ मेके बास्बक्तामे।
18
बीहान् सहर्ला ले:तामेना आम्द सो:ली बे़क्तामे।
19
लाम्पु़म्दी आम्द:मी कङ् फोस्सीके ढे़क्सी ताम्तामे। आम्द मे़म् ढे़क्सी पु़म्दी राम्तामे, खेदायो मे़म्दी सफदीङ् आफा मारायो माथी:मेवा। मेत्तीको़ आम्द:मी मे़म्लाई मो़:तामे, "आबोदीङ् हारे गो़दी गे़नायो सी:ची मासीदाला" को़दीङ् मे़म् फोसीके ढे़क्सी धवाङ् ङाल्वार्ता।
20
ए़म् ताम्तामेको़ चे:लाद सीङ्लङ् दुम्तामे, को़दीङ् दा:तामे, "ए़म् फोसीके ढे़क्सी गेक्सो़ धवाङ् ङाल्ता?"
21
येसुमी दा:तामे, को़दीङ् मे़म्द:लाई मो़:तामे, आजेङ् गु गो़नीलाई मो़:नानी, "गो़नी रे़प्तीनी को़दीङ् गे़नायो सङ्का मापानीवा खेदा' फोस्चीके ढे़क्सीलाई मारा पाने दु़म्ता, मेत्ती मत्तई माआ, खेदायो ए़म् कोङ्कोलाई यो 'रुङ्सो़को़ सदु़कु़दी दो़को़' दा:या खेदा ए़म् दु़म्ने चाबा।
22
रे़प्सोमाम् प्रार्थनादी मारा पु़न्नी, मे़म् गो़नी तानी।"
23
आम्द मन्दीर्दी ओ:तामे, को़दीङ् आम्द:मी चे़न्तामेना आङो:लो पुजाहारीद नुङ् मु़रु़द:के आनी जोक्आ ङा:चाद येसुकेदी राम्तामे, को़दीङ् दा:तामे, "गेक्सो़ गो़ ए़म्तेद पाई, को़दीङ् सु़मी गो़लाई ए़म् ते पाचोम् हक् गीते?"
24
येसुमी मे़म्द:लाई मो़:तामे, "गु यो गो़नीलाई कङ् लो: हीलो पानानी, गुलाई मे़म्के लो: लेत्तीगीईनी खेदा, गु गेक्सो़ ए़म् ते पाङा, मे़म् गो़नीलाई मो़:नानी।
25
युहन्नाके बप्तीस्मा गे़लाङ् दु़म्ता? परुलाङ् खी मु़रु़द:लाङ्?"
मे़म्द आनीदबदी ओ़खो़ दा:सोङ् लो: पाने प्रे़ँस्तामे, 'परुलाङ् दा:या खेदा मे़म्चामी, 'मो़खो़ खेदा, गो़नी आम्लाई माराङ् मारे़प्तीनीवा?' दा:
26
खेदायो मु़रु़लाङ् दा:या खेदा, गो़ईलाई मु़रु़द:के ङी:मा ब:। माराङ्खेदा हप्पेमी युहन्ना पर्मेस्वर्के लो: ळक्आ हो दा:मे।
27
ए़म्चामी मे़म्द:मी येसुलाई मो़:तामे, "गुकु था: माताका।"
येसुमी मे़म्द:लाई मो़:तामे, "गु यो गे़म् सा:मी ए़म् ते पाङा, मे़म् गो़नीलाई मामो़:नानी।"
28
"गो़नी मारा मीम्सीनी? कङ् मु़रु़के नीक्सी तावा बक्तासे। आम्चामी ङाल्लाम्केदी राताको़ दा:ता, 'तावा, लाओ़को़ आना अङ्गुर् बारीदी ते पा:ती गीई।'
29
मे़म्चामी दा:ता, 'गु मालाङा।' खेदायो नो:था पछुतो दु़म्ताको़ लाता।
30
आकङ्मेकेदी राताको़ आम्चामी मो़खो़ङ् दा:ता। मे़म्चामी दा:ता, 'गु लाङा।' खेदायो माला:वा।
31
आबो ए़म् नीक्सीदी गे़म्चामी पापामी दा:ना रे़प्ता:। मे़म्द:मी दा:तामे, 'ङाल्लाम् चामी।' येसुमी मे़म्द:लाई मो़:तामे, "आजेङ् गु गो़नीलाई मो़:नानी, तीरो पोक्आद नुङ् बेस्से़द गो़नीदीङ् ङाल्ला पर्मेस्वर्के पाईमाखोदी ओ:मे।"
32
माराङ्खेदा बप्तीस्मा-गीआ युहन्ना ईनीकेदी धार्मीक्ताके लाम् कोईसो़ पाथा राता, खेदायो गो़नी आम्लाई मारे़प्तीनीवा। खेदायो तीरो पोक्आ नुङ् बेस्से़द:मी आम्लाई रे़प्तामे। गो़नी ए़म् तान्तानीको़ यो पस्चाताप् मापानीवा, को़दीङ् आम्लाई मारे़प्तीनीवा।
33
"आकङ्मे कथा ङीन्ने। कङ् मु़रु़ खीम्के होपो बक्ता, मे़म्चामी कङ् अङ्गुर् रु: लाईपाप्ता, को़दीङ् मे़म्के हर्ला-अखला खु़र् ते़क्ताको़ मेके अङ्गुर् ख्लक्चोम् कङ् कोल् जु़ल्ता, को़दीङ् कङ् मतान् पाप्ता। मेत्तीको़ बु़म्था पाआद:लाई मे़म्के ठेक्का गीसो आम् पर्देस् लाता।
34
अङ्गुर् प्रो़:तीबेला दु़म्ता, आम्चामी बु़म्था पाआद:केदी आभाग् पु़न्था वा:लीद फ्लीता:मी।
35
खेदायो बु़म्था पाआद:मी आवा:लीद:लाई सीम्तामेको़ कङ्लाई घीम्तामे, आकङ्मेलाई सा:तामे, को़दीङ् आकङ्मेलाई लुङ्मी आप्तामे।
36
आनायो ङाल्लाम्दीङ् थे: वा:लीद फ्लीता:मी, को़दीङ् मे़म्द:मी ए़म्द:नुङ् यो मो़खो़ङ् पाम्तामे।
37
'अतावालाई दा मे़म्द:मी रे़प्तीमे' दा:सो मीम्सोमाम् नो:था आम्चामी आतावालाई मे़म्द:केदी फ्ली:ता।
38
खेदायो बु़म्था पाआद:मी तावालाई ताम्तामेको़ आनीदबदी दा:मो़म्तामे, ए़म् दा हक् ताआ मु़रु़ हो। पीने, मे़म्लाई सा:या, को़दीङ् मे़म्के हक् ईक्के गु़दी ब्लाया।
39
मेत्तीको़ मे़म्द:मी मे़म्लाई सीम्तामेको़ अङ्गुर् बारीदीङ् आ:तोला ला:तामेको़ सा:तामे।
40
ए़म्चाम् गे़ना अङ्गुर्बारीके होपो रा:, मखना आम्चामी मे़म् बु़म्था पाआद:लाई मारा पावा?"
41
मे़म्द:मी आम्द:लाई मो़:तामे, आम्चामी मे़म् दुस्टद:लाई सादामी, को़दीङ् अङ्गुर्बारी आफा बु़म्था पाआद:लाई ठेक्कादी गीवामी, गे़म्द:मी आम्लाई आम् ताचोम् आभाग् गीमे।
42
येसुमी मे़म्द:लाई मो़:तामे, "मारा गो़नीमी गे़नायो धर्म-सास्त्र मातो़:तीनीवा? गे़म् लुङ् खीम्पाआद:मी वार्तामे मे़म्चाईं कु:नादीम् ङा:री लुङ् दु़म्ता, ए़म् परम्प्रभुलाङ् दु़म्ताम् हो, को़दीङ् ईक्के मीचीदी ए़म् सीङ्लङ्पा:आ ब:।"
43
ए़म्चामी गु गो़नीलाई मो़:नानी, "पर्मेस्वर्के पाईमाखो गो़नीदीङ् रो़:से, को़दीङ् कङ् ओ़खो़म्दो:चालाई गीचोम् दु़म्, गे़म्चामी मे़म्के आसी:ची सी:पादा।
44
ए़म्लुङ् त:रे धोक्ळा चाईं टुड्का टुड्का दु़म्, खेदायो सु़ त:रे मे़म् लुङ् धोङ्, ए़म्चामी मे़म्लाई ख्रीदा।"
45
गे़ना आङो:लो पुजाहारीद नुङ् फरीसीद:मी आम्द:के कथा ङीन्तामे, मेत्तीको़ मे़म्द:केङ् लो:दी आम्द:मी ए़म् दा:तामेम् हो दा:सो तु़त्तामे।
46
मे़म्द:मी आम्द:लाई सी:चो लाम्तामे, खेदायो मे़म्द भीड्दीङ् ङी:तामे, माराङ्खेदा मु़रु़द:मी आम्द:लाई कङ् पर्मेस्वर्के लो: ळक्आ हो दा:सोमाम् मीम्तामेम् बक्ता।