27
1
बीहान् हप्पे आङो:लो पुजाहारीद नुङ् मु़रु़द:के जोक्आ ङा:चाद:मी येसुलाई सा:चोम् सुरीम् गीचो दा:सोमाम् आम्द:के चीचीरे़म्दी मु़लु़ओ़दी पाम्तामे।
2
को़दीङ् मे़म्द:मी आम्द:लाई चुक्तामेको़ ला:तामे, को़दीङ् हाकीम् पीलातस्के आगु़दी गीम्तामे।
3
मेत्तीको़ आम्द:लाई सीपा:आ यहुदामी आम्द:लाई सुरीम् गीचो दा:सो आरे पाना ताप्ता:को़ पछुतो दु़म्ता, को़दीङ् आङो:लो पुजाहारीद नुङ् जोक्आ ङा:चाद:लाई रु़पाके साक्ना खोपीलुङ् लेत्था रा:ता,
4
को़दीङ् दा:ता, "गु दोस् मान्थीम् मु़रु़लाई रोळो पे़ल्सोमाम् साम्से पा:तङ्मे ब:।" खदायो मे़म्द:मी दा:तामे, "गुकुलाई मारा मत्लब्? गो़ ईदबङ् तु़:तो़।"
5
मेत्तीको़ रु़पाके खोपीलुङ्द मन्दीर्दी घ्रप्ता:को़ मे़म् लाता, को़दीङ् जा:ताको़ बे़क्ता।
6
खेदायो आङो:लो पुजाहारीद:मी रु़पाके मे़म् खोपीलुङ्द गु़प्तामेको़ दा:तामे, "ढुकुटीदी ए़म् जुल्चो रीम्ळा मा:दु़म्, माराङ्खेदा ए़म् हु़सीके आथीङ् हो।"
7
मे़म्द:मी आनीदबदी मु़लु़ पाम्तामेको़ मे़म् ग्रोक्सोमी पर्देसीद सु़लु़म् पाचोलाई कुमालेके रु: जाप्तामे।
8
ए़म्चाम् मे़म्रु: आनासम्म यो हु़सीके रु: दा:मे।
9
मेत्तीको़ यर्मीया पर्मेस्वर्के लो: ळक्आमी दा:ताम् लो: झक्ता, "मे़म्द:मी रु़पाके साक्ना खोपीलुङ् ब्लाम्तामे, मे़म् थीङ् खो़म्दी, मे़म् आथीङ् ईस्राएल्के तावाद:मी मे़म् त:रे तो:के पाम्तामेम् बक्ता,
10
को़दीङ् परम्प्रभुमी गुलाई आरे पाती:मीम् खो़ङ्कुमालेके रु:के लागी मे़म्द:मी गीम्तामे।"
11
येसु हाकीम्के आङाल्लादी राप्तामे, को़दीङ् मे़म्चामी येसुलाई हीलो पाप्ता:मी, "मारा गो़ यहुदीद:के हङ्हो?" येसुमी दा:तामे, "गो़नीङ् ओ़खो़ दा:नी।"
12
को़दीङ् आङो:लो पुजाहारीद नुङ् जोक्आ ङा:चाद:मी आम्द:लाई दोस् लाईपाम्तामे, खेदायो आम्द:मी मारायो मादा:मेवा।
13
मेत्तीको़ पीलातस्मी आम्द:लाई मो़ता:मी, "ईके चीचीरे़म्दी मे़म्द:मी हक्सीङ् लोद:के आजे सो:सोङ् ब:मे, मारा गो़ माङीनी।"
14
खेदायो आम्द:मी मे़म्लाई कङ् दोस्के यो लो: माले:तीमेवा। हाकीम् यो ए़म् लो:दी मारी सीङ्लङ् दु़म्ता।
15
नीस्तार् थो:चेदी भीड्मी चाईपाना खो़म् हाकीम्मी कङ् चोङ्ना प्लन्तीगीचोम् पातीतु़म्री बक्ता।
16
मखना बारब्बा नीङ्के कङ् मारीम्ळा ते पाआ चोङ्ना बक्ता।
17
गे़ना मु़रु़द खु़म्स्तामे, पीलातस्मी मे़म्द:लाई हीलो पाप्ता:मी, "गो़नी मारा चाईपानी? गु ईनीके लागी सु़लाई प्लनु? बारब्बा खी ख्रीस्ट् दा:ना येसुलाई?"
18
माराङ्खेदा मे़म्द:मी येसुलाई सुङ्कार् पा:सोमाम् गीती:मीम् हो दा:सोमाम् मे़म्लाई था: बक्ता।
19
मेत्तीको़ नीसाफ् पाचोम् ठङ्दी नी:सीआमो़खो़ बक्ताना मे़म्के आनाम्नामीमी ओ़खो़ दा:सोमाम् खबर् फ्ली:ता, "मे़म् दोस् मान्थीम् मु़रु़लाई मारायो मापा:तीने, माराङ्खेदा आना अङामोदी आम्चामी पाचोना गु हक्सीङ् दु़खा ता:तङ्मे ब:।"
20
खेदायो आङो:लो पुजाहारीद नुङ् जोक्आ ङा:चाद:मी बारब्बालाई प्लन्चो को़दीङ् येसुलाई सा:चोम् सुरीम् गीचोदु़म् दा:सोमाम् मु़रु़द:लाई रोक्तामे।
21
हाकीम्मी आनायो मे़म्द:लाई हीलो पाप्ता:मी, "ए़म् नीक्सीदीम् गे़म् चाईं गु ईनीके लागी प्लन्तीगीनानी दा:चोम् गो़नी चाईपानी?" मे़म्द:मी दा:तामे, "बारब्बालाई।"
22
पीलातस्मी मे़म्द:लाई मो़ता:मी, "मेत्तीको़ ख्रीस्ट् दा:ना येसुलाई चाईं गु मारा पाङा?" मे़म्द हप्पेमी दा:तामे, "मे़म्लाई क्रुस्दी चा:ने।"
23
मे़म्चामी दा:ता, "माराङ्? मे़म्चामी मारा साम्से पाप्ताम् ब: ङा?" खेदायो मे़म्द आनायो हक्सीङ् ओ़खो़ दा:सोङ् ब्रे:तामे, "मे़म्लाई क्रुस्दी चा:ने।"
24
खेदायो मारायो सीप् ला:गे मा:दु़म्वाम् ताम्तामेको़ बरु से़गासे़गा दु़म् दा:चोम् ङी:मामी पीलातस्मी ळ:कु़मी भीड्के आङाल्लादी आगु़ चीस्ताको़ दा:ता, "गो़नी ईनीदबङ् तु़:तीने, गु ए़म् मु़रु़के आहु़सीदीङ् दोस् मान्थीम् ब:ङा।"
25
हप्पे मु़रु़द:मी मो़:तामे, "आहु़सी गुकु नुङ् अक्के चाचावारी त:रे परेदु़म्ला।"
26
मेत्तीको़ मे़म्चामी मे़म्द:के लागी बारब्बालाई प्लन्ता, खेदायो येसुलाई कोर्रामी घीसोमाम् क्रुस्दी चा:था लापात्ता:मी।
27
मेत्तीको़ हाकीम्के आसीपाईंद:मी येसुलाई महल्दी ला:तामे, को़दीङ् हप्पे पल्टन्लाई आम्द:के ङाल्लादी खु़प्तामे।
28
मे़म्द:मी आम्द:के वा: पु़:तामेको़ आम्द:लाई लाला मो़आ वा: फीक्तामे।
29
मे़म्द:मी चु़:के चाम्पुरी बनेपाम्तामेको़ आनी पीयादी पास्पात्तामेमी, को़दीङ् आम्द:के झुम्रो गु़दी चीन्दा गीम्तामे, को़दीङ् आनी ङाल्लादी पोक्ची तीङ्स्तामेको़ आम्द:लाई ओ़खो़ दा:सोङ् आम्द:लाई रक्तामे, "ए यहुदीद:के हङ्, सेवा।"
30
मेत्तीको़ मे़म्द:मी येसुलाई तोक्सी पात्तामे, को़दीङ् मे़म्चीन्दामी आनी पीयादी घीम्तामे।
31
आम्द:लाई रङ्ने थु़म्तामेको़दीङ् मे़म्द:मी मे़म् वा: क्लो़:ती गीम्तामे, को़दीङ् आनीदबकेङ् वा: फीक्तामेको़ आम्द:लाई क्रुस्दी चा:था ला:तामे।
32
लासो लासोङ् मे़म्द:मी सीमोन् नीङ् पाना कुरेनीदीम् कङ् मु़रु़लाई थी:तामे, को़दीङ् मे़म्द:मी मे़म्लाई आनी क्रुस् कुर्चो कर् लाईपाम्तामे।
33
मेकेङ् मे़म्द गल्गथा दा:ना ठङ्दी झक्राम्तामे, मे़म् ठङ्लाई पीयारु़से दा:या।
34
मेत्तीको़ मे़म्द:मी येसुलाई पीत्त हु़ल्ना अङ्गुर् ळ:कु़ तु़न्तामे, खेदायो आम्द:मी मे़म् दाप्तामेको़ तु:चो माबी:सीमेवा।
35
मे़म्द:मी येसुलाई क्रुस्दी चा:तामेको़दीङ्, चीठ्ठा आप्तामेको़ येसुके आनी वा:द आनीदबदी योक्तामे।
36
मेत्तीको़ मेकेदी नीस्तामेको़ मे़म्द:मी येसुलाई रीम्तामे।
37
"येसु यहुदीद:के हङ्" दा:ना आम्द:के चीचीरे़म्दी दोस्के कागत् मे़म्द:मी आनी पीयादीङ् हु़तु़ला के़प्तामे।
38
आम्द:नुङ् नीक्सी डा:काद:सी क्रुस्दी चा:ना बक्तासे, कङ् आम्द:के झुम्रोला को़दीङ् आकङ्मे पे:रोला।
39
मे़म्लाङ् राआ-पीआद:मी आनी सु़रु़ यो:सोमाम् आम्द:लाई रक्तामे,
40
को़दीङ् दा:तामे, "ए मन्दीर् प्रीआ को़दीङ् साम् नाम्तीदी बनेपाने थु़म्आ, ईदबलाई ब्लन्पातो़, को़दीङ् पर्मेस्वर्के तावा हो खेदा, क्रुस्लाङ् तो:सो़।
41
आङो:लो पुजाहारीद:मी यो मुलु चे़न्आद नुङ् जोक्आ ङा:चाद कङ्खङ् आम्द:लाई रक्सोङ् दा:तामे,
42
"ए़म्चामी आफालाई दा ब्लन्पात्ता:मी, आदबलाई चाईं ब्लन्पा:ने माचाबा। ए़म् ईस्राएल्दीम् हङ्हो। अखना क्रुस्लाङ् आधोयु़ तो:सेला, को़दीङ् गुकु ए़म्लाई रे़प्तीका।
43
ए़म्चामी पर्मेस्वर्दी भरोसा जु़ल्, पर्मेस्वर्मी ए़म्लाई चाईपामे खेदा आम्द:मी ए़म्लाई अखना ब्लन्पा:मेला, माराङ्खेदा ए़म्चामी 'गु पर्मेस्वर्के तावा हो' दा:ताम् बक्ता।
44
को़दीङ् आम्द:नुङ् क्रुस्दी चा:ना मे़म्डा:काद:सीमी यो ओ़क्सो़ङ् आम्द:लाई रक्तासे।
45
छकाल्दीङ् साम् घ्री:ताम्सम्म हप्पेला देस्दी तु़कु़म्चीमा दु़म्ता।
46
साम् घ्री:ताना येसुमी ओ़खो़ दा:तामेको़ ङो:लो लक्जामी ब्रे:तामे, "ईलोई, ईलोई, लामा सबखथनी?" ए़म् दा:ना, "ए अपर्मेस्वर्, ए अपर्मेस्वर्, गो़नी गुलाई माराङ् प्लन्ती:नीम् ब:?"
47
मेके राप्ळाद:दीम् गेसोमी ए़म् ङीन्तामेको़ दा:तामे, "ए़म् मु़रु़मी एलीयालाई ळा:सोङ् ब:।"
48
मे़म्द:दीम् कङ् धवा धवा अन्सोङ् लाताको़ कङ् स्पन्ज् रा:सो सीर्कादी प्लु़म्ता:को़ चीन्दादी जु़ल्सो आम्द:लाई तु:चो गीप्ता:मी।
49
खेदायो आफामी दा:तामे, "को:या, एलीया ए़म्लाई ब्लन्पात्था रा: खी?"
50
मेत्तीको़ येसु आनायो ङो:लो लग्जामी ब्रे:तामे को़दीङ् आनी साम् लाता।
51
मखनाङ् मन्दीर्दीम् पर्दा आजु़जु़दीङ् आपु़म्सम्म नीक्सी दुम्सो जी:ता, को़दीङ् खापी रुक्ता:, को़दीङ् लुङ्द बुक्ता:मी।
52
सु़लु़म्द होङ्स्तामे, को़दीङ् ईप्ळा हक्सीङ् से:आ मु़रु़द:के बे़क्आ राम् आसेली दु़म्सो बोक्तामे,
53
को़दीङ् मे़म्द सु़लु़म्लाङ् घ्लु:तामे, को़दीङ् बे़क्आदीङ् येसु लीङ्स्तामेको़दीङ् मे़म्द से:आ सहर्दी ओ:तामे, को़दीङ् हक्सीङ्केदी कोईसो़ पास्तामे।
54
मेत्तीको़ कप्तान् नुङ् मे़म्नुङ् येसुलाई गु़वाला गीआद:मी ख्री:नाम् नुङ् मेके दुम्सोङ् बक्आ घट्ना ताम्तामे, मेत्तीको़ ङी:तामेको़ मे़म्द:मी ओ़खो़ दा:तामे, "आजेङ् ए़म् दा पर्मेस्वर्के तावा ङ रेछा।"
55
मेकेदी गालील्लाङ् राआ हक्सीङ् मीन्चाद यो बक्तामे, मे़म्द:मी हारे बक्सोमाम् ए़म्हप्पे को:सोङ् बक्तामे। मे़म्द आम्द:के सेवा पासोङ् गालील्लाङ् येसुके नो:था नो:था राम्तामेम् बक्ता।
56
मे़म्द:दीम् मरीयम् मग्दलीनी, याकुब् नुङ् योसेफ्के आसी मामा मरीयम्, को़दीङ् जब्दीयाके तावाद:के आनी मामा बक्तामे।
57
नाम् रीक्ताको़दीङ् अरीमाथीयादीम् योसेफ् नीङ् पाना कङ् थीआ मु़रु़ राता। मे़म् यो येसुकेङ् चे:ला बक्ता।
58
मे़म्चामी पीलातस्केदी लाताको़ येसुके बे़क्आ राम् पु़न्ता, को़दीङ् पीलातस्मी मे़म् आम्लाई गीचो मो़ता:मी।
59
योसेफ्मी बे़क्आ राम् ब्लाप्ता:को़ से:आ मल्मल्के वा:मी तल्ता
60
को़दीङ् मे़म्चामी लुङ् खोपेपासो बनेपाना आनीकेङ् आनीन्ता सु़लु़म्दी जु़ल्ता, को़दीङ् सु़लु़म्के आसो़: कङ् ङो:लो लुङ्मी सु़म्ता:को़ लाता।
61
सु़लु़म्के आङाल्लादी मरीयम् मग्दलीनी नुङ् आकङ्मे मरीयम् यो नी:सीआ बक्तासे।
62
आदील्लाम्, आङो:लो पुजाहारीद नुङ् फरीसीद पीलातस्केदी खु़म्स्तामे,
63
को़दीङ् दा:तामे, "हजुर्, गुकु मीम्तीकाम् ब:, खी मे़म् ठगाहामी आसेली बक्ताना साम् नाम्ती नो:था गु आनायो बोङ्ङा दा:ताम् बक्ता।
64
ए़म्चाम् साम् नाम्तीसम्म मे़म् सु़लु़म् रीम्मो़खो़ गु़वाला गीचोलाई आरे पाने, मा:खेदा मे़म्के आचे:लाद रामेको़ मे़म्लई कुसो ला:मे, को़दीङ् मे़म् दा बे़क्आदीङ् आसेली दुम्सो बोक्ता दा:सो मु़रु़द:लाई मो़:मे, को़दीङ् मे़म् नो:थाम् धो:का ङाल्लाम्दीङ् झन् मारीम्ळा दु़म्।
65
पीलातस्मी मे़म्द:लाई मो़ता:मी, गो़नीङ् गु़वाला गीआ बक्सोङ् ब:नी, लाने गो़नीमी चाम्नीम्सम्म रीम्मो़खो़ को:ने।"
66
मेत्तीको़ मे़म्द लाम्तामेको़ लुङ्दी युक्सा लाईपाम्तामे, को़दीङ् गु़वाला गीआद खटेपाम्तामेको़ सु़लु़म् रीम्मो़खो़ को:तामे।