28
1
नास्चोम्दीङ् आदील्लाम् सा:ताके ङाल्लाम् नाम्ती रीम्रीम् उजे़लो दु़म्ताना मरीयम् मग्दलीनी नुङ् आकङ्मे मरीयम् सु़लु़म् को:था रातासे।
2
ङो:लो ख्री:नाम् पीता, माराङ्खेदा परम्प्रभुके कङ् परुचा परुलाङ् यु़ता, को़दीङ् पीताको़ लुङ् याक्सो मे़म् त:रे नीस्ता।
3
आके ङाली बीजुली खो़म् को़दीङ् आवा: फु़म् खो़म् बुबुम् बक्ता।
4
मे़म्के ङी:मामी मे़म् गु़वाला गीआ मु़रु़द थुरुरु रुक्ता:मी, को़दीङ् बे़क्आ खो़ङ् दु़म्तामे ।
5
को़दीङ् परुचामी मे़म् मीन्चाद:सीलाई मो़ता:सी, "गो़सी माङी:से, माराङ्खेदा गुलाई था: ब:, गो़सी क्रुस्दी चा:ना येसुलाई लाम्सोङ् बक्सी।
6
आम्द एके माब:मे, माराङ्खेदा आम्द:मी दा:तामेम् खो़ङ् आम्द आसेली दु़म्सो बोक्तामेम् ब:। पीसे, आम्द:लाई जु़ल्ना ठङ् को:से।
7
मेत्तीको़ धवा लासेको़ आनी चे:लाद:लाई मो़:से, खी आम्द बे़क्आदीङ् आसेली दु़म्सो बोक्तामेम् ब:, आम्द गो़सीदीङ् ङाल्ला गालील्दी लासोङ् ब:मे। गो़सी आम्द:लाई मेके तासी। को:से, गु गो़सीलाई मो़:तानासीम् ब:।"
8
को़दीङ् मे़म्द:सी ङी:मा नुङ् मारी आनन्दमी धवाङ् सु़लु़म्लाङ् घ्लु:तासेको़ लातासे, को़दीङ् आनी चे:लाद:लाई मो़:था अन्तासे।
9
अचानक् येसुमी मे़म्द:सीलाई थी:तामेको़ मो़:तामे, "सान्ती!" मे़म्द:सी आम्द:के पु़म्दी पीतासेको़ आनी खु़लीदी झा:सो आम्द:लाई सेवा चन्तासे।
10
मेत्तीको़ येसुमी मे़म्द:सीलाई मो़:तामे, "माङी:से। लासेको़ अलआद:लाई गालील्दी लाने मो़:से, मेके मे़म्द:मी गुलाई ताईमी।"
11
मखना मे़म् मीन्चाद:सी लाम्दीङ् बक्तासे, कोई कोई गु़वाला गीआद सहर्दी लाम्तामेको़ आङो:लो पुजाहारीद:लाई मेके दु़म्ताम् घट्ना मो़:तामे।
12
मेकेङ् आङो:लो पुजाहारीद जोक्आ ङा:चाद:नुङ् खु़म्स्तामे, को़दीङ् मे़म्द:मी मु़लु़ पाम्तामे, को़दीङ् सीपाईंद:लाई ओ़खो़ मो:सोमाम् हक्सीङ् ग्रोक्सो गीम्तामे,
13
"गो़नी दा:ने, खी गुकु ईप्ळा बक्ताकु़ना आचे:लाद राम्तामेको़ मे़म्लाई कु़म्तामेको़ ला:तामे रेछा।"
14
हाकीम्के आनो़:दी ए़म् लो: झङ् खेदा, गुकु आम्लाई बीस्पा:काको़ गो़नीलाई जोगेपाआ।
15
मेत्तीको़ मे़म्द:मी मे़म् ग्रोक्सो ब्लाम्तामे,
को़दीङ् चे़न्ना खो़ङ् पाम्तामे। को़दीङ् यहुदीद:दी आनाम् नाम्तीसम्म ए़मेङ् लो: फु़स्ताम् ब:।
16
मे़म् कदे़म् कङ् चे:लाद गालील्दीम् मे़म् कोङ्कोदी लाम्तामे, मेके येसुमी मे़म्द:लाई लाने मो़:तामेको़ आरे पाम्तामेम् बक्ता।
17
मे़म्द:मी येसुलाई ताम्तामेको़ सेवा चन्तामे, खेदायो गेसोमी चाईं सङ्का पाम्तामे।
18
मेत्तीको़ येसु मे़म्द:केदी राम्तामेको़ दा:तामे, "परु नुङ् चे़ङ्माखो हप्पे अगु़दी गुलाई गीना ब:।
19
ए़म्चामी लाने, को़दीङ् हप्पे देस्दीम् दो:चाद:लाई चे:ला बनेपाने, पापा नुङ् तावा को़दीङ् से:आ ळालाके नीङ्दी मे़म्द:लाई बप्तीस्मा गीने,
20
गु गो़नीलाई आरे पान्तानीम् हप्पे लो: रे़प्चो मे़म्द:लाई चे़न्दीने। को:ने, गु थोचे मा:रु़म्मेसम्म गे़नाखेदायो गो़नीनुङ् दु़म्ङा।"