26
1
येसुमी ए़म् हप्पे लो: दा:ने थु़म्तामेको़दीङ् आनी चे:लाद:लाई मो़:तामे,
2
"गो़नी तु़:तीनीम् ब:, आनाम् नीक्सी नाम्ती नो:था नीस्तार् थो:चे रा:, कोदीङ् मु़रु़के तावा क्रुस्दी चा:चोके लागी सीमे।"
3
मेत्तीको़ कईयाफा नीङ्के आङो:लो पुजाहारीके दर्बार्दी आङो:लो पुजाहारीद नुङ् मु़रु़द:के जोक्आ ङा:चाद खु़म्स्तामे।
4
को़दीङ् मे़म्द:मी येसुलाई गेक्सो़ हान्सो सीचोम्, को़दीङ् सा:चोम् दा:सो मु़लु़ पाम्तामे।
5
खेदायो मे़म्द:मी दा:तामे,"थो:चेके नाम्ती माआ, मा:खेदा मु़रु़द:दी से़गासे़गा दु़म्।"
6
येसु बेथानीयादी लेचाळार् पा:आ सीमोन्के आखीम्दी बक्तामेना,
7
कङ् मीन्चा सीङ्गमर्मर्के कङ् सीसीदी हक्सीङ् आथीङ् परेदु़म्आ अत्तर् रा:सो आम्द:केदी राता, को़दीङ् आम्द जाथा नीस्तामेना आम्चामी मे़म् आनी पीयादी थोक्ता।
8
ए़म् ताम्तामेको़ चे:लाद आनी सोक्सो बोक्ता, को़दीङ् मे़म्द:मी दा:तामे माराके लागी एकोम् नक्सान्?
9
माराङ्खेदा ए़म् अत्तर् हक्सीङ् आथीङ्दी ले:सोमाम् मे़म् ग्रोक्सो दु़खाचाद:लाई गीने झाम्वा।"
10
खेदायो येसुमी ए़म् था: ताम्तामेको़ मे़म्द:लाई मो़:तामे, "गो़नी ए़म् मीन्चालाई माराङ् दु़खा गीनी? मे़म्चामी दा अके लागी कङ् रीम्ळा ते पाप्ताम् ब:।
11
माराङ्खेदा दु़खाचाद गो़नीनुङ् गे़नाखेदायो दु़म्मे। खेदायो गु गो़नीनुङ् गे़नायो मादु़म्ङा।
12
मे़म्चामी ए़म् अत्तर् अराम्दी पीक्सोमाम् थीम्चोके लागी गुलाई झु़म्स्पा:ईम् हो।
13
आजेङ् गु गो़नीलाई मो़:नानी, हप्पे चे़ङ्माखोदी गे़ला ए़म् सुसमाचार् ङीन्पा:या, ए़म् मीन्चामी मारा पाप्ता मे़म् लो: आके मीम्खादी दु़म्।"
14
मेत्तीको़ कदे़म् नीक्सीदीम् कङ् यहुदा ईस्करीयोत् दा:ना आङो:लो पुजाहारीद:केदी लाता।
15
को़दीङ् दा:ता, "गु आम्द:लाई ईनी गु़दी सीपा:नानी खेदा, गुलाई मारा गीईनी?" मे़म्द:मी मे़म्लाई रु़पाके साक्ना खोपीलुङ्गीम्तामे।
16
मखनाङ् यहुदामी आम्द:लाई सीपा:चोम् लाम् लाम्ने प्रे़ँस्ता।
17
खमीर्मान्थीम् सभ्ले़म्के थो:चेदीङ् ङाल्लाम् नाम्ती चे:लाद:मी येसुकेदी राम्तामेको़ दा:तामे, "ईनीके लागी नीस्तार् थो:चेके खाउमा जाचोम् गुकु गे़ला झु़म्सीका?"
18
आम्द:मी दा:तामे, "सहर्दी कङ् मु़रु़केदी लाने, को़दीङ् मे़म्लाई मो़:ने, 'गुरुमी दा:मेम् ब: अके समय ने़न्था राताम् ब:। गु अचे:लाद:नुङ् ईखीम्दी नीस्तार् थो:चे मा:ने पाङा'।"
19
मेत्तीको़ येसुमी दा:तामेम् खो़ङ् चे:लाद:मी पाम्तामे, को़दीङ् मे़म्द:मी नीस्तार् थो:चे खाउमा झु़म्स्तामे।
20
नाम् रीक्ताको़दीङ् आम्द कदे़म् नीक्सी चे:लाद:नुङ् जाथा नीस्तामे।
21
आम्द जासोङ् बक्तामेना येसुमी दा:तामे, "आजेङ् गु गो़नीलाई मो़:नानी, गो़नीदीम् कङ्चामी गुलाई सीपा:ईनी।
22
मेत्तीको़ मे़म्द हक्सीङ् आनी ग्वा खा:ताको़ ककङ्मी आम्द:लाई हीलो पाने प्रे़ँस्ता, "प्रभु, मारा मे़म् गु हो?"
23
को़दीङ् आम्द:मी दा:तामे, "गे़म्चामी थाल्दी गुनुङ् सभ्ले़म् प्लु़म्ताम् ब:, मे़म्चामीङ् गुलाई सीपा:ई।"
24
मु़रु़के तावा दा आके धर्म-सास्त्रदी रे़ङ्ना खो़ङ्ला:। खेदायो छी मे़म् मु़रु़लाई, आम्लाङ् मु़रु़के तावा सीमे। मे़म् मु़रु़ दा मागीङ्वाम् खेदा मे़म्के लागी रीम्ळा दु़म्वा।
25
मेत्तीको़ आम्द:लाई सीपा:आ यहुदामी हीलो पाप्ता, "गुरु, मारा मे़म् गु हो?" आम्द:मी मे़म्लाई मो़:तामे, "गो़ ईदबमीङ् दा:ते।"
26
मे़म्द:मी खाउमा जासोङ् बक्तामेना येसुमी सभ्ले़म् तक्तामे को़दीङ् आनीमखला गीम्तामेको़दीङ् आम्द:मी मे़म् जीक्तामे, को़दीङ् चे:लाद:लाई गीम्तामे को़दीङ् दा:तामे, तङ्ने, जाने, ए़म् अराम् हो।
27
मेत्तीको़ कान्छु़रा यो ब्लाम्तामेको़ आनीमखला गीसोङ् आम्द:मी मे़म्द:लाई ओ़खो़ मो:सो गीम्तामे, "गो़नी हप्पेमी ए़म्दीङ् तु:ने।
28
माराङ्खेदा ए़म् आनीन्ता करार्के अहु़सी हो, ए़म् हक्सीङ्के लागी साम्से तील्चोके लागी बगेपाचोदु़म्।
29
खेदायो गु गो़नीलाई मो़:नानी, खी अङ्गुर्के ए़म् आसी:चीलाङ् गु मखनासम्म मातुङु, गे़नासम्म अपापाके पाईमाखोदी गो़नीनुङ् आनीन्ता पासो मातुङु।
30
कङ् भजन् स:लङ् पाम्तामेको़दीङ् आम्द जईतुन् कोङ्कोला घ्लु:तामेको़ लाम्तामे।
31
मेत्तीको़ येसुमी मे़म्द:लाई मो़:तामे, "आना तु़ङाची अके लो:मी गो़नी ईनी नो:थाला याङ्सीनी। माराङ्खेदा ओ़खो़म् रे़ङ्ना ब:, 'गु गोठालालाई सादु, को़दीङ् बगाल्दीम् भे़डाद हर्ला-अखला फु़:सीमे।'
32
खेदायो गु बे़क्आदीङ् आसेली दु़म्ङाको़दीङ् गो़नीदीङ् ङाल्ला गालील्दी लाङा।
33
पत्रुस्मी आम्द:लाई मो़ता:मी, "ईनीके लो:मी हप्पे आनी नो:थाला ले:मे खेदायो गु गे़नायो नो:थाला माले:ङा।
34
येसुमी मे़म्लाई मो़:तामे, "आजेङ् गु गो़लाई मो़:ना, आना तु़ङाची भा:ले घ्री:चोदीङ् ङाल्ला गो़ गुलाई साम् खेप् वार्दी।"
35
पत्रुस्मी आम्द:लाई मो़ता:मी, "गु गो़नीनुङ् बे़क्चो दु़म् खेदायो गु गो़नीलाई मावार्दीनानी। आफा हप्पे चे:लाद:मी मो़खो़ङ् दा:तामे।
36
मेकेङ् येसु गेत्समनी दा:ना ठङ्दी मे़म्द:नुङ् लाम्तामे, को़दीङ् चे:लाद:लाई मो़:तामे, "गो़नी एकेङ् ब:ने, गु चाईं आका:ची हार्ला लाङाको़ प्रार्थना पाङा।"
37
को़दीङ् आम्द:नुङ् पत्रुस् नुङ् जब्दीयाके नीक्सी तावाद:सीलाई ला:सो आम्द सोक् नुङ् बे़कुल् दु़म्ने प्रे़ँस्तामे।
38
मेत्तीको़ आम्द:मी मे़म्द:लाई मो़:तामे, अके साम् ङो:लो सोक्मी बे़क्चो खो़ङ् दु़म्ताम् ब:। गो़नी एकेङ् ब:ने, को़दीङ् गुनुङ् माईप्थु़ ब:ने।
39
को़दीङ् आम्द भ्ले़कु़म् पासोमाम् प्रार्थना पाम्तामे, "ए अपापा, नु़: खेदा ए़म् कान्छु़रा अकेदीङ् याङ्सेला। खेदायो गु ग्वा पाङाम् खो़म् माआ, गो़नी ग्वा पानीम् खो़म् दु़म्ला।
40
मेत्तीको़ आम्द चे:लाद:केदी राम्तामेको़ मे़म्द याल्आ का:आद थी:तामे, को़दीङ् पत्रुस्लाई मो़:तामे, "मारा गो़नी गुनुङ् कघन्टा यो ब:ने माचाम्नीवा?
41
मायाल्दीने, प्रार्थना पाने, को़दीङ् परीक्छे़दी परेमादु़म्ने। ळाला दा आजेङ् झु़म्सीआ ब:, खेदायो राम् सा: मान्थी ब:।
42
मेकेदीङ् नो:थाम् खेप् यो आम्द:मी प्रार्थना पाम्तामे, "अपापा, गु मातुथु़ङ् मा:नु़ खेदा ईनीकेङ् ग्वा झङ्ला।
43
आम्द आनायो राम्तामेको़ मे़म्द:लाई याल्आ का:आ थी:तामे, माराङ्खेदा मे़म्द:के आनी मीची ख्रे़म्स्ताम् बक्ता।
44
ए़म्चामी आम्द:मी मे़म्द:लाई आनायो प्लन्तामे, को़दीङ् लाम्तामेको़ मे़मेङ् युप्तीद ले़न्सोङ् आकङ्मे खेप् प्रार्थना पाम्तामे।
45
मेत्तीको़ आम्द चे:लाद:केदी पीम्तामेको़ मे़म्द:लाई मो़:तामे, गो़नी आनायो ईप्सोङ् नुङ् नास्चोङ् ब:नी? को:ने, समय ने़न्था राने थु़म्स्ताम् ब:। मु़रु़के तावा साम्सेचाद:के आनी गु़दी दुम्चो ओ़स्ताम् ब:।
46
बोङ्ने लाया। को:ने, सीपा:आ ने़न्थाङ् ब:।"
47
आम्द ळक्सोङ् बक्तामेना कदे़म् नीक्सीदीम् कङ् यहुदा राता। मे़म्नुङ् आङो:लो पुजाहारीद नुङ् मु़रु़द:के जोक्आ ङा:चाद:मी फ्ली:ना कङ् ङो:लो भीड् तर्वार् नुङ् घचा रा:सो राता।
48
आम्द:लाई सीपा:आमी मे़म्द:लाई कङ् चीङ्खा गीप्ता:मीम् बक्ता, "गे़म् मु़रु़लाई गु चुम्मा पाङा, मे़मेङ् हो, मे़म्लाई सीने।"
49
धवाङ् येसुकेदी लाताको़ मे़म्चामी दा:ता, "ए गुरु, सेवा!" को़दीङ् मे़म्चामी आम्द:लाई चुप् पाप्ता:मी।
50
येसुमी मे़म्लाई मो़:ता, "वार्चा, गो़ मारा पाथा रातेम् ब:, मे़म् पाईवार्दो़, मेत्तीको़ मे़म्द राम्तामेको़ येसुलाई सीम्तामे।
51
येसु नुङ् बक्आद:दीम् कङ्चामी आगु़ पोक्ता:को़ तर्वार् थे़क्ता:, को़दीङ् आङो:लो पुजाहारीके आवा:लीलाई आप्ता, को़दीङ् मे़म्के आनो़: युक्तीगीप्ता।
52
मेत्तीको़ येसुमी मे़म्लाई मो़:तामे, "ईतर्वार् दाब्दी पीको़, माराङ्खेदा तर्वार् ब्लाआद हप्पे तर्वार्मीङ् पीलुक्ची दु़म्मे।
53
गो़ मारा मीम्से, मारा गु अपापालाई ले़म्को पाने माचाबु, को़दीङ् आम्द:मी धवा-धवा परुचाद कदे़म् नीक्सी पल्टन्दीङ् थे: अके लागी फ्ली:ती मागीईमी ङा?
54
मो़खो़ खेदा ए़म् लो: ओ़क्सो़ दुम्चोङ् दु़म् दा:सो धर्म-सास्त्रदी रे़ङ्ना लो: गेक्सो़ झक्चोम्?"
55
मखनाङ् येसुमी भीड्लाई मो़:तामे, "डा:काके चीचीरे़म्दी राना खो़ङ्गुलाई सीथा तर्वार् नुङ् घचाद रा:सो गो़नी माराङ् रान्तानी? गु नाम्ती-नाम्ती मन्दीर्दी चे़न्सोङ् बक्ती, को़दीङ् गो़नीमी गुलाई मासीईनीवा।
56
खेदायो पर्मेस्वर्के लो: ळक्आद:के धर्म-सास्त्रदी दा:ना लो:द झङ्मेला दा:सो ए़म् हप्पे दु़म्था राम्तामेम् हो।" मेत्तीको़ हप्पे चे:लाद आम्द:लाई प्लन्सो झुक्का:तामे।
57
येसुलाई सीआद:मी आम्द:लाई आङो:लो पुजाहारी कईयाफाकेदी ला:तामे। मेकेदी मुलु चे़न्आद नुङ् जोक्आ ङा:चाद खु़म्स्तामेम् बक्ता।
58
खेदायो पत्रुस् हारेलाङ् आङो:लो पुजाहारीके आखीम्दीम् दे़म्बु़लु़सम्मङ् आनी नो:था नो:था लाता, को़दीङ् नो:था मारा दु़म्आ हो, मे़म् को:चोके लागी आ:घोला ओ:सोमाम् गु़वालाद:नुङ् नीस्ता।
59
आङो:लो पुजाहारी नुङ् हप्पे आङो:लो मुलुखीम्मी येसुलाई सा:चोलाई आम्द:के चीचीरे़म्दी लीमो लो: लाम्ने प्रे़ँस्तामे।
60
हक्सीङ् लीमो चल्आद राम्तामे, खेदायो मे़म्द:मी गे़मेयो आजे लो: माथी:मेवा। नो:था नीक्सी मु़रु़ मेकेदी रातासे,
61
को़दीङ् दा:तासे, "ए़म् मु़रु़मी 'गु पर्मेस्वर्के मन्दीर् प्रीदुको़ साम् नाम्ती ग:रे ए़म्लाई राम्पा:ने चाबु' दा:ता।"
62
मेत्तीको़ आङो:लो पुजाहारीमी बोक्ताको़ आम्द:लाई मो़ता:मी, "मारा गो़ मारायो मादाने?" ए़म् मु़रु़द:मी ईके चीचीरे़म्दी सो:मेम् आजे मारा हो?"
63
खेदायो येसु से़न्दा मान्थी बक्तामे। आङो:लो पुजाहारीमी आम्द:लाई मो़ता:मी, "आसेली पर्मेस्वर्के रोळो खीक्सोमाम् दा:ङा, गुकुलाई दा:नो़, मारा गो़ पर्मेस्वर्के तावा ख्रीस्ट् हो?"
64
येसुमी मे़म्लाई मो़:तामे, "गो़नीमीङ् दा:तानी वार्तानी। खेदायो गु गो़नीलाई मो़:नानी, आबोदीङ् हारे गो़नीमी मु़रु़के तावालाई हप्पेदीङ् ङो:लो सा: थीआके आनी झुम्रोला नी:सीआ, को़दीङ् धमोदीम् कुक्से़ल्दी यु़आ तानी।
65
मेत्तीको़ आङो:लो पुजाहारीमी आवा: ची:ता को़दीङ् दा:ता, "ए़म्चामी दा ईस्वर्लाई सुवा जेत्ता। गो़ईलाई आबो आफा साँची मार्चो चाईदु़म्ता? गो़नीमी अखना ए़म्चामी ईस्वर्लाई सुवा जेत्ताम् ङीन्तानी वार्तानी।
66
ईनीके मारा लो: ब:?" मे़म्द:मी दा:तामे, "ए़म् सा:चोम् खाल्के ब:।"
67
मेत्तीको़ मे़म्द:मी आनी कु़लीदी तोक्सी पा:सोमाम् आम्द:लाई मुड्कीमी घीम्तामे, कोई कोईमी ओ़खो़ दा:सोङ् लपटामी घीम्तामे,
68
"ए ख्रीस्ट्, लो़, ळको़! गो़लाई घीआ सु़ हो?"
69
पत्रुस् आ:तोला दे़म्बु़लु़दी नी:सीआमो़खो़ बक्ता। कङ् वा:लीनीमामी मे़म्केदी राताको़ दा:ता, "गो़ यो गालील्दीम् येसुनुङ् बक्ते।"
70
खेदायो मे़म्चामी मे़म्द हप्पेके आनी ङाल्लादी माबीस्चोङ्दा:ता, "गो़ मारा दा:सोङ् बङे, गु मातु:तु।"
71
मे़म् आ:तोला पीन्दीदी घ्लु:ताको़दीङ् आकङ्मेचामी मे़म्लाई ताप्ता, को़दीङ् मेकेदी बक्आद:लाई मो़ता:मी, "ए़म् मु़रु़ यो येसु नास्रीनुङ् बक्ता।"
72
मे़म्चामी आनायो रोळो खीक्सो माबी:सेवा, "गु मे़म् मु़रु़लाई मासे़न्तु।"
73
कच्छीन् नो:था मेके बक्आद:मी यो ने़न्था पीसोमाम् पत्रुस्लाई मो़:तामे, आजेङ् गो़ यो मे़म्द:दीम् कङ् हो, माराङ्खेदा ईके ळक्सु़मीङ् से़न्ने थु़म्स्तेम् ब:।
74
मेत्तीको़ पत्रुस्मी आदबलाई ङ सराप् पासोङ् रोळो खीक्चो लाम्ता, "गु मे़म् मु़रु़लाई से़न्नेङ् मासे़न्तु।" को़दीङ् मखनाङ् भा:ले घ्री:ता।
75
मेत्तीको़ पत्रुस्मी येसुमी मो़:तामेम् ए़म् लो: मीम्ता:,"भा:ले घ्री:चोदीङ् ङाल्ला गो़ गुलाई साम् खेप् वार्दी।" मेत्तीको़ आम् आ:तोला लाताको़ धुरुधुरु ङक्ता।