25
1
मेत्तीको़ परुदीम् पाईमाखो कदे़म् कन्ने़द:नुङ् थाम्ने झाम्। मे़म्द आनी ददबो़खो़ तो:सी ला:सोमाम् बेउलालाई घ्रु़म्था घ्लु:तामे।
2
मे़म्द:दी ङो बुद्दी माथीआ नुङ् ङो चाईं बुद्दी थीआ बक्तामे।
3
माराङ्खेदा बुद्दी माआद:मी आनी तो:सी ला:तामे, मे़म्द:मी आनीदबनुङ् गे़वा चाईं माला:मेवा।
4
खेदायो बुद्दी थीआद:मी चाईं आनी तो:सीनुङ् धीप्रीदी भरी भरी गे़वा यो ला:तामे।
5
बेउलामी बीयाँलो पाप्ता:ना मे़म्द हप्पे आनी ईप्थु़मी मु़कु़म् पाम्तामे, को़दीङ् याल्ता:मी।
6
खेदायो तु़ङाची 'को:ने बेउला, आम्लाई घ्रु़म्था राने,' दा:ना से़न्दा राता।
7
मेत्तीको़ मे़म् हप्पे कन्ने़द सेँस्तामे, को़दीङ् आनी ददबो़खो़ तो:सी झु़म्स्तामे।
8
बुद्दी माथीआ कन्ने़द:मी बुद्दी थीआद:लाई मो़:तामे, ईनीके गे़वादीङ् गुकुलाई की:ची गीकीनी, माराङ्खेदा अक्के तो:सी दा बे़क्चो पावा।
9
खेदायो बुद्दी थीआद:मी ओ़खो़ दा:तामेको़ मो़:तामे, 'गुकु नुङ् गो़नी नीम्फोलाई ले:आ गे़वा मा:बो हला, बरु पसल्दी लाने को़दीङ् ईनीके लागी जाम्ने।
10
मे़म्द जाप्था दीम्तामेना बेउला झक्राता, को़दीङ् झु़म्सीआद आम्नुङ् लालु़खा खाउमादी आ:घोला ओ:तामे, को़दीङ् लाप्चो ख्रे़म्स्ता।
11
नो:था मे़म् बुद्दी माथीआ कन्ने़द झक्राम्तामेको़ ओ़क्सो़ ब्रे:तामे, "प्रभु, प्रभु, गुकुलाई यो लाप्चो होक्ती गीकीनी।"
12
खेदायो आम्चामी मो़ता:मी, "आजेङ् गु गो़नीलाई मो़:नानी, गु गो़नीलाई मासे़न्तीनानी।"
13
ए़म्चामी चीङ्चीङ् ब:ने, माराङ्खेदा मे़म् नाम्ती नुङ् मे़म् समय गो़नीलाई था: मा:बो।"
14
माराङ्खेदा ए़म् चाईं कङ् मु़रु़ खो़मेङ् हो, मे़म्चामी पर्देस् लाताना आवा:लीद:लाई ळात्ता:मीको़ आसम्पती मे़म्द:के आनी गु़दी गीप्ता:मी।
15
मे़म्चामी ककङ्लाई मे़म्द:के जोक्सुवा को:सोमाम् कङ्लाई ङो सेनारीके खोपीलुङ्, आकङ्मेलाई नीक्सी को़दीङ् आकङ्मेलाई कङ् गीप्ता:को़ मे़म् लाता।
16
मेत्तीको़ ङो सेनारीके खोपीलुङ् ताआमी धवाङ् लाताको़ मे़म् बे़पार्दी पीक्ता:को़ आफा ङो खोपीलुङ् कमेपाप्ता।
17
मो़क्सो़ङ् नीक्सी खोपीलुङ् ताआमी यो आफा नीक्सी कमेपाप्ता।
18
खेदायो कङ् खोपीलुङ् ताआमी चाईं लाताको़ खापी धो़प्ता:को़ आहोपोके सम्पती ख्लु़:सो जु़ल्ता।
19
हक्सीङ् नाम्ती नो:था मे़म् वा:लीद:के आनी होपो राता, को़दीङ् मे़म्चामी मे़म्द:नुङ् हीसाब् पु़न्ता।
20
मेत्तीको़ ङो सेनारीके खोपीलुङ् ताआ वा:लीमी आफा ङो खोपीलुङ् :सो आङाल्लादी राताको़ ओ़खो़ दा:ता, "हजुर्, गो़नीमी गुलाई ङो खोपीलुङ् अगु़दी गीती:नीम् बक्ता। को:ने, गु आफा ङो खोपीलुङ् कमेपा:तङ्मे ब:।
21
होपोमी मे़म्लाई मो़:ता, "से़बास्, रीम्ळा नुङ् रे़प्चोम् वा:ली! गो़ दो़खो़ थोक्दी रे़प्चोम् दु़म्ते, आबो गु गो़लाई हक्सीङ् थोक् ईगु़दी गीना। गो़ ईहोपोके खुसीदी राओ़।"
22
नीक्सी खोपीलुङ्ताआमी यो राताको़ दा:ता, "हजुर्, गो़नीमी गुलाई नीक्सी खोपीलुङ् गीती:नीम् बक्ता। को:ने, गु आफा नीक्सी खोपीलुङ् कमेपा:तङ्मे ब:।"
23
मे़म्के आहोपोमी मे़म्लाई मो़:ता, "से़बास्, रीम्ळा नुङ् रे़प्चोम् वा:ली, गो़ दो़खो़ लो:दी रे़प्चोम् दु़म्ते, आबो गु गो़लाई हक्सीङ् थोक् ईगु़दी गीना। गो़ ईहोपोके खुसीदी राओ़।"
24
कङ् सेनारीके खोपीलुङ् ताआमी यो राताको़ दा:ता, "हजुर्, माख्लु़म्ना रु:लाङ् खु़ब्ळा को़दीङ् माक्राम्ना ठङ्लाङ् रु़प्ळा गो़नी कठोर् मु़रु़ ब:नी दा:सो गुलाई था: बक्ता।
25
ए़म्चामी गु ङी:ती, को़दीङ् लातीको़ ईनी खोपीलुङ् गु खापी ग:यु़ ख्लुत्तङ्। को:ने, ए़म् ईनी खोपीलुङ् ब्लाने।"
26
मे़म्के आहोपोमी मे़म्लाई मो़:ता, "ए दु़खा गीआ, चन्चा वा:ली, माख्लु़म्ना ठङ्दी खुबु, को़दीङ् माक्राम्ना ठङ्दीङ् रुबु दा:सोमाम् गो़ तु़त्तीम् बक्ता खेदा,
27
गो़ असम्पती साहुकेदी जुल्चो दु़म्वाम् बक्ता, को़दीङ् राङावाको़ गु असम्पती बे़ज्नुङ् ले:तुवा।
28
ए़म्चामी मे़म्लाई ए़म् खोपीलुङ्र रो़:तीने, को़दीङ् गे़म्नुङ् कदे़म् खोपीलुङ् ब: मे़म्लाई गीने।
29
माराङ्खेदा गे़म्नुङ् ब: मे़म्लाई आफा यो गीया, को़दीङ् मे़म्नुङ् हक्सीङ् दु़म्। खेदायो गे़म्नुङ् मा:बो, मे़म्नुङ् बक्ळा यो मे़म्लाई रो़:तीया।
30
मे़म् तेमान्थीम् वा:ली चाईं आ:तोला तु़कु़म्चीमादी घ्रप्तीने, मेकेदी मु़रु़द ङङ्मे, को़दीङ् आनी ख्लु़ सीर्दीमे।
31
"गे़ना मु़रु़के तावा हप्पे परुचाद:नुङ् आके महीमादी रा:, मखना आम् आके महीमाके ठङ्दी नी:से।
32
को़दीङ् आङाल्लादी हप्पे दो:चाद खु़म्सीमे, को़दीङ् गेक्सो़ गोठालामी भे़डा नुङ् सङ्गारालाई फगा, मो़क्सो़ङ् आम्चामी मे़म्द:लाई कङ्लाई आकङ्मेदीङ् फगामी।
33
आम्चामी भे़डाद:लाई आझुम्रोला, को़दीङ् सङ्गाराद:लाई आपे:रोला जु़ल्मी।
34
मेत्तीको़ हङ्मी आके झुम्रोलाम्द:लाई मो़:दामी, "राने अपापाके आसीलोङ्माकेद! चे़ङ्माखो जो़स्तानाङ् ईनीके लागी झु़म्सीना पाईमाखोदी हक् पाने।
35
माराङ्खेदा गु सो:ली बे़क्तीम् बक्ता, गो़नीमी गुलाई जाचो गीती:नी। गु ळ:कु़ दक्तीम् बक्ता, गुलाई ळ:कु़ तु:चो गीती:नी। गु पर्देसी बक्ती गुलाई ब:ने गीती:नी।
36
नाङ्गा बक्ती, गुलाई फीस्चोम् वा: गीती:नी। रु़:आ बक्ती, गो़नी गुलाई को:था रान्तानी। गु झे़ल्खान्दी बक्ती, गो़नी अकेदी रान्तानी।
37
मेत्तीको़ धर्मी मु़रु़द:मी आम्लाई मो़:मे, "ए प्रभु, गे़ना गुकु गो़नीलाई सो:ली बे़क्आ ताक्ताकु़, को़दीङ् जाचो गीक्ताकु़? गे़ना ळ:कु़ दक्तानीम् ताक्ताकु़को़ तु:चो गीक्ताकु़?
38
गे़ना गुकु गो़नीलाई पर्देसी ताक्ताकु़को़ गो़नीलाई ब:ने गीक्ताकु़? गे़ना नाङ्गा ताक्ताकु़को़ वा: फीस्पात्ताकु़?
39
को़दीङ् गे़ना गुकु गो़नीलाई रु़:आ झे़ल्खान्दी ताक्ताकु़को़ ईनीकेदी राक्ताकु़?
40
मेत्तीको़ हङ्मी मे़म्द:लाई मो़दामी, "आजेङ् गु गो़नीलाई मो़:नानी, गो़नी ए़म् अलआद:दीम् हप्पेदीङ् याक्केदी कङ्लाई गेसो पान्तानी, मे़म् गो़नीमी गुलाई ङ पातीनी।"
41
मे़म्दीङ् नो:था आम्चामी आपे:रोलाम् मु़रु़द:लाई मो़दामी, "सराप् ताआ मु़रु़द! गुदीङ् हारे लाने, को़दीङ् दीयाबलस् नुङ् मे़म्के दु:चाद:के लागी झु़म्सीना गे़नायो मारु़प्ळा मी:दी लाने।"
42
माराङ्खेदा गु सो:ली बे़क्आ बक्ती, गो़नीमी गुलाई जाचो मागीईनीवा। ळ:कु़ दक्आ बक्ती, खेदायो गो़नीमी गुलाई तु:चो मागीईनीवा।
43
गु पर्देसी बक्ती, गो़नीमी गुलाई बक्चोम् मागीईनीवा। नाङ्गा बक्ती, गो़नीमी गुलाई फीस्चोम् मागीईनीवा, रु़:आ नुङ् झे़ल्खान्दी बक्ती, गो़नी गुलाई को:था मारानीवा।"
44
मे़म्द:मी यो ओ़खो़ दा:सोमाम् मो़:मे, "प्रभु, गे़ना गुकु गो़नीलाई सो:ली बे़क्आ नुङ् ळ:कु़ दक्आ ताक्ताकु़, पर्देसी, नाङ्गा नुङ् रु़:आ ताक्ताकु़, खी झे़ल्खान्दी ताक्ताकु़ को़दीङ् ईनीके सेवा मापाकावा?"
45
मेत्तीको़ आम्चामी मे़म्द:लाई मो़दामी, "आजेङ् गु गो़नीलाई मो़:नानी, ए़म् हप्पेदीङ् याक्केद:दीम् कङ्लाई गेसो मापानीवा, मे़म्गो़नीमी अके लागी मापानीवा।"
46
मेत्तीको़ ए़म्द गे़नायो मारु़प्ळा सुरीम् ग:रे ओ:मे, को़दीङ् धर्मीद मारु़प्ळा राम्साम्दी ओ:मे'।"