24
1
मे़म्दीङ् नो:था येसु मन्दीर्लाङ् घ्लु:तामेको़ लाचो ओ़स्तामेना आनी चे:लाद आम्द:लाई मन्दीर्के खीम्द कोईसो़ पा:चोमी दा:सोमाम् आम्द:के पु़म्दी राम्तामे।
2
खेदायो आम्द:मी मे़म्द:लाई मो़:तामे, "गो़नी ए़म्हप्पे तानी, मा:मो़को़? आजेङ् गु गो़नीलाई मो़:नानी, कङ् लुङ् त:रे आकङ्मे लुङ् रईमा:दु़म्, ककङ् प्री:सोमाम् घ्रप्तीया।"
3
येसु जईतुन् कोङ्कोदी बक्तामेना चे:लाद सु़यो माबक्आ बेला आम्द:केदी राम्तामेको़ हीलो पाम्तामे, "गुकुलाई मो़:कीनी, ए़म् लो: गे़ना दु़म्मे, को़दीङ् गो़नी ले:राचोम् नुङ् ए़म् थोचे रुप्चोम् चीङ्खा मारा दु़म्?"
4
मेत्तीको़ येसुमी मे़म्द:लाई मो़:तामे, होस् ब:ने, सु़मीयो गो़नीलाई माहान्तीनीला।
5
माराङ्खेदा हक्सीङ् मु़रु़ अनीङ्दी 'गु ख्रीस्ट् हो' दा:सोङ् रामे, को़दीङ् हक्सीङ्लाई मारीम्ळा लाम्ला ला:मे।
6
गो़नी मो़नाद नुङ् मोचोम् लोद:के से़न्दा ङीन्नी। माङी:ने, माराङ्खेदा ए़म् दुम्चोङ् दु़म्, खेदायो रुप्चोम् दा मखनाङ् मा:दु़म्।
7
माराङ्खेदा दो:चाके चीचीरे़म्दी दो:चा, को़दीङ् पाईमाखोके चीचीरे़म्दी पाईमाखो बोङ्, को़दीङ् ठङ् ठङ्दी जाचो मान्थी नुङ् ख्री:नाम् पी:।
8
खेदायो ए़म् हप्पे ळो:लोमी बेथा राचो प्रे़ँईसीना हो।
9
"मेत्तीको़ मे़म्द:मी गो़नीलाई दु़खा गीथा ला:नीमी, गो़नीलाई सा:नीमी, को़दीङ् अनीङ्के लागी हप्पे दो:चाद:मी गो़नीलाई ग्राम्दीनीमी।
10
मेत्तीको़ हक्सीङ् मु़रु़ भड्के दु़म्मेको़ लामे, को़दीङ् दु:मे, कङ्चामी आकङ्मेलाई रे़म्ने वादाको़ सुरीम् आम्पादा, को़दीङ् ग्राम्दा।
11
हक्सीङ् लीमो पर्मेस्वर्के लो: ळक्आद घ्लु:मे, को़दीङ् हक्सीङ्लाई मारीम्ळा लाम्ला ला:मे।
12
मारीम्ळा लो:द बार्ताम्चामी हक्सीङ्के माया ळे:सो ला:।
13
खेदायो नो:थासम्म क:नास्मी बक्आ चाईं ब्लन्।
14
को़दीङ् पाईमाखोके ए़म् सुसमाचार् हप्पे चे़ङ्माखोदी हप्पे दो:चाद:के लागी आजे सो:चोलाई ङीन्पा:मे, मेत्तीको़ रुप्चोम् समय रा:।
15
ए़म्चामी गो़नी दानीयल् पर्मेस्वर्के लो: ळक्आलाङ् ळङ्ना पीलुक्ची पाआ ग्राम्ना थोक्से:आ ठङ्दी तानीना,
16
मेत्तीको़ यहुदीयादी बक्आद जोजुओम्फुला झुक्का:मेला।
17
कोउसीदी बक्आद आनी खीम्दी बक्आ सामान् ब्लाथा आधोयु़ मातो:सीमेला।
18
घे़:रादी बक्आ आखास्टो ब्लाथा माले:ला।
19
हाय! को:जामीद नुङ् नु़चु़ तु़न्आद:लाई मे़म्नाम्ती।
20
खेदायो हीउँदोदी खी नास्चोम् नाम्ती गो़नी झुक्का:चो मा:दु़म्ला दा:सोमाम् प्रार्थना पाने।
21
माराङ्खेदा मखना ओ़खो़म् ङो:लोदु़खा दु़म्, मे़म् चे़ङ्माखो जो़स्ताम्दीङ् ओ़खो़ अखनासम्म दु़म्ताम् मा:बो, ना नो:था गे़नायो दु़म्था दी:।
22
मे़म् नाम्ती घटे मापाना खेदा, गे़मेयो मु़रु़ ब्लन्ने माचापावा, खेदायो यो़नाद:के लागी मे़म् नाम्ती घटेदु़म्।
23
को़दीङ् गो़नीलाई कोईमी 'को:ने, ख्रीस्ट् एके ब:, खी मेके ब:' दा: खेदा मारे़प्तीने।
24
माराङ्खेदा लीमो ख्रीस्ट्द नुङ् लीमो पर्मेस्वर्के लो: ळक्आद घ्लु:मे, को़दीङ् चाम्मे खेदा यो़नाद:लाई यो भड्के पाचोलाई ङो:लो-ङो:लो चीङ्खाद नुङ् सीङ्लङ्पा:आ तेद कोईसो़ पामे।
25
मीम्खा जु़ल्ने, गु गो़नीलाई ङाल्लाङ् मो़:तानानीम् ब:।
26
मे़म्द:मी गो़नीलाई 'को:ने, आम् तते़र्खा-बुरीखादी ब:', दा:सोमाम् दा:मे खेदा आ:तोला घ्लु:नेको़ मालाने। को़दीङ् 'को:ने आम् आ:घोला कोठाद:दी ब: दा:मे खेदा यो मारे़प्तीने।
27
माराङ्खेदा गेक्सो़ सयलादी प्लक्सा पावाना नेवालासम्मङ् थ:दा, मो़क्सो़ङ् मु़रु़के तावा ले:सो रा:।
28
गे़ला सी:नु दु़म्, मेकेदी गीद्धाद यो खु़म्सीमे।
29
"मे़म् दु़खा ताचोम् नाम्ती धवाङ् नो:था, नाम् तु़कु़म्ची दु़म्, त:सलामी आके छेछेवा मागीवा, को़दीङ् ताराद धमोलाङ् दोङ्मे, को़दीङ् धमोदीम् सा:द यो:सीमे।
30
मेत्तीको़ मु़रु़के तावाके चीङ्खा धमोदी ता:से, चे़ङ्माखोदीम् हप्पे दो:चाद ङङ्मे ब्रे:मे, को़दीङ् मे़म्द:मी मु़रु़के तावालाई धमोदीम् कुक्से़ल्द:दी सा: नुङ् ङो:लो आसीलोङ्मा नुङ् युसोङ् बक्आ तामे।
31
आम्चामी आके परुचाद:लाई तुरहीके ङो:लो से़न्दानुङ् फ्ली:मी, को़दीङ् मे़म्द:मी धमोके कङ् छेउदीङ् आकङ्मे छेउसम्म हप्पेलाङ् आके यो़नाद:लाई खु़बामी।
32
"खेदायो फोस्चीके ढे़क्सीलाङ् कङ् लो: चे़ईंसीने: गे़ना मे़म्के आळे़क्सी माचोक्ळा दु़म् को़दीङ् ढे़क्सीके आलीम् पा:ता, मखना गर्मी याम् राता रेछा दा:सो गो़नी था: तानी।
33
मो़क्सो़ङ् गो़नीमी यो, गे़ना ए़म्हप्पे थोक्द दु़म्ळा तानी, मखना आम् ने़न्थाङ्, लाप्चोदीङ् ब: दा:सोमाम् तु़:तीने।
34
आजेङ् गु गो़नीलाई मो़:नानी, ओ़क्सो़ ए़म्हप्पे मा:झङ्मेसम्म ए़म् नीनीनाप्चा मा:बे़ङ्।
35
परु नुङ् चे़ङ्माखो रुप्सो ला:, खेदायो अके लो:द रुप्सो मालामे।
36
खेदायो मे़म् नाम्ती नुङ् मखनाम् लो:दी पापादीङ् आफा सु़मीयो मातु़:तीमे, ना परुदीम् परुचाद:मी ना तावामी।
37
मु़रु़के तावा राचोम् नोआके समयदीम् खो़मेङ् दु़म्।
38
माराङ्खेदा ळ:कु़दी वाम्सोमाम् पीलुक्ची दुम्चोदीङ् ङाल्ला नोआ रोबोदी ओ:चोम् नाम्तीसम्म मु़रु़द जासोङ्, तु:सोङ् को़दीङ् लालु़खा पासोङ् बक्तामे,
39
को़दीङ् ळ:कु़मी वाम्चोम् समय राताको़ सो:रे पाईमालातावामीम्सम्म मे़म्द:मी था: मातामेवा। मु़रु़के तावा ले:राचोम् यो मो़खो़मेङ् दु़म्
40
मखना नीक्सी घे़:रादी दु़म्से, कङ्लाई ला:या, आकङ्मेलाई जु़ल्वा:या।
41
नीक्सी मीन्चाद:सी खुरुवा ख्री:सोङ् दु़म्से, कङ्लाई ला:या, आकङ्मेलाई जु़ल्वा:या।
42
ए़म्चामी चीङ्चीङ् ब:ने, माराङ्खेदा गे़म् नाम्ती ईनी प्रभु रा:, मे़म् गो़नी मातु़:तीनी।
43
खेदायो ए़म् तु़:तीने, खीम् आहोपोमी कु़न्चा तु़ङाची गे़म् बेला रा: दा:सो तु़:ता खेदा, आम् चीङ्चीङ् ब:वा, को़दीङ् आखीम् पङ्ने मागीउवा।
44
ए़म्चामी गो़नी यो झु़म्सीनेको़ ब:ने। माराङ्खेदा मु़रु़के तावा गो़नी मामीम्सीनीम् नाम्ती रा:।
45
रे़प्आ नुङ् बुद्दी थीआ वा:ली सु़ हो, मे़म्लाई आहोपोमी आके जहान्दीम् वा:लीद:लाई जु़प्ळा समयदी जाचो गीवाला दा:सोमाम् फगाको़ जु़ल्?
46
मे़म् वा:ली आसीलोङ्माके हो, गे़म्लाई आहोपो रा:ना मो़खो़ङ् पासोङ् बक्आ थीदा।
47
आजेङ् गु गो़नीलाई मो़:नानी, होपोमी मे़म्लाई आके हप्पे सम्पती जीम्मा गीवा।
48
खेदायो मे़म् दु़खा गीआ वा:लीमी 'अहोपोमी बीयाँलो पावा' दा:सोमाम् आग्वादी मीम्से,
49
आम्नुङ् ते पाआ वा:लीद:लाई घीचो नुङ् दुङ्पा:आ थोक् जाआ तु:आद:नुङ् जाने तु:ने प्रे़ँईसे खेदा,
50
मे़म् वा:लीके आहोपो मे़म्चामी मामीम्सेम् नाम्ती नुङ् मातु़:ताम् नाम्ती झक्रा:।
51
को़दीङ् आहोपोमी मे़म्लाई ङो:लो सुरीम् आबा, को़दीङ् मे़म्लाई नाक्ले़न्तीद:के आनीलु़म्बु़दी घ्रप्ता, मेके मु़रु़द ङङ्मे को़दीङ् ख्लु़ सीर्दीमे।