23
1
मेत्तीको़ येसुमी भीड्द नुङ् आनी चे:लाद:लाई ओ़खो़ मो़:तामे,
2
"मुलु चे़न्आद नुङ् फरीसीद मोसाके ठङ्दी नी:सीमे।
3
ए़म्चामी मे़म्द:मी दा:मेम् थोक् पाने को़दीङ् बी:सीने, खेदायो मे़म्द:मी पामेम् खो़म् चाईं मापाने, माराङ्खेदा मे़म्द:मी चे़न्चो दा चे़न्दीमे, खेदायो मो़खो़म् मापाने।
4
मे़म्द:मी हे़ल्आ नुङ् कु़र्ने माचाप्चोम् कु़रा चुङ्मेको़ मु़रु़द:के आनी तोक्तोदी जु़ल्ती गीमे। खेदायो मे़म्द आनीदब चाईं मे़म् पोक्चोके लागी कङ् आनी ब्रे़प्चोमी यो माखु़:तीमे।
5
खेदायो मे़म्द:मी आनीके हप्पे ते मु़रु़द:लाई कोईसो़ पा:चोके लागी पामे। माराङ्खेदा मे़म्द आनी कु़पी नुङ् ना:रीकेदी मुलुके कागत् ङो:लो बनेपामे, को़दीङ्, आनी वा:के फु़र्काद झो़पा:मे,
6
खाउमाद:दी मे़म्द ङो:लो ठङ्दी नुङ् मुलु खीम्द:दी आङो:लो ठङ्द दक्तीमे।
7
बजार् द:दी सेवा लाम्मे को़दीङ् मु़रु़द:मी गुरु दा:मेम् दक्तीमे।
8
खेदायो गो़नीलाई सु़मीयो गुरु मामो़:नीला, माराङ्खेदा ईनीके चे़न्आ कङ्ङा ब:मे, को़दीङ् गो़नी चाईं हप्पे ङप्सी-लआद हो।
9
गो़नी चे़ङ्माखोदी सु़लाई यो 'पापा' मामो़:ने, माराङ्खेदा परुदी ईनीके कङ्ङा पापा ब:मे
10
गो़नीलाई सु़मीयो 'होपो' मामो़:नीला, माराङ्खेदा ईनीके कङ्ङा 'होपो' ख्रीस्ट् हो।
11
गो़नीदी सु़ हप्पेदीङ् ङो:लो ब:, मे़म् ईनीके वा:ली दु़म्
12
सु़मी आदबलाई ङो:लो पावा, मे़म् आ:चा दु़म्, को़दीङ् सु़मी आदबलाई आ:चा पावा, मे़म्ङो:लो दु़म्।
13
"छी, गो़नी फरीसी नुङ् मुलु चे़न्आद, नाक्ले़न्तीद! माराङ्खेदा गो़नी मु़रु़द:के आनी ङाल्लादी परुदीम् पाईमाखोके लाप्चो ख्रे़प्तीनी। गो़नी ना ईनीदबङ् ओ:नी, ना ओ:चो लाम्ळाद:लाई ओ:ने गीनी।"
14
"छी गो़नीलाई, मुलु चे़न्आरी नुङ् फरीसीद, नाक्ले़न्तीद! माराङ्खेदा गो़नी ख्लुमीद:के आनी खीम् जा:ती गीनी, को़दीङ् झो़आ-झो़आ प्रार्थना पाआ तीङ्सीनी। ए़म्चाम् आफादीङ् गो़नी थे: सुरीम् आम्सीनी।"
15
"छी गो़नी, मुलु चे़न्आ नुङ् फरीसीद, नाक्ले़न्तीद! माराङ्खेदा गो़नी कङ्लाई ईनी लो: ङीन्आ पाचोके लागी सदु़कु़ नुङ् दे़ल् दे़ल् खीर्सीनी, को़दीङ् मे़म्ईनी मु़लु़दी रा:नीको़दीङ् मे़म्लाई ईनीकेदीङ् नीक्सी गुना थे: नरक्दीम् तावा बनेपानी।"
16
"छी गो़नीलाई, काती माताआ अगुवाद, सु़मी दा:नी, 'कोईमी मन्दीर्के रोळो खीक्ताना मारायो मा:दु़म्, खेदायो मन्दीर्दीम् सेनारीके रोळो खीक्ताना मे़म् रोळोमी चु़गा।"
17
मुर्ख नुङ् काती माताआद, गे़म्चाईं ङो:लो हो? सेनारी खी सेनारीलाई सेपा:आ मन्दीर्?"
18
"कोईमी थान्के रोळो खीक्ताना मारायो मा:दु़म्, खेदायो मे़म्त:रे जु़ल्ना भे:टीके रोळो खीक्ताना चाईं रोळोमी चु़गा।"
19
"ए काती माताआद, गे़म्चाईं ङो:लो हो? भे:टी खी भे:टीलाई से:आ पाआ थान्?"
20
ए़म्चामी थान्के रोळो खीक्आमी थान् नुङ् मे़म् त:रेम् हप्पे थोक्के रोळो खीक्ता।
21
मदीर्के रोळो खीक्आमी मन्दीर् नुङ् मे़म् ग:रे बास् बक्आके रोळो खीक्ता।
22
परुदीम् रोळो खीक्आमी पर्मेस्वर् बक्चोम् ठङ्के नुङ् मे़म्त:रे बक्आके रोळो खीक्ता।
23
छी, गो़नीलाई, मुलु चे़न्आ नुङ् फरीसीद, नाक्ले़न्तीद! माराङ्खेदा गो़नी पदेना नुङ् सुप् को़दीङ् जीराके कदे़म् अंस गीनी, खेदायो मुलुदीम् ङो:लो लो:द, खी नीसाफ् पाचोम्, सीस्को:को पा:चोम् नुङ् रे़प्चोम् लो:लाई ग्राम्तानीम् ब:। गो़नीमी कदे़म् अंस गीचोम् ते पाचो दु़म्ळा बक्ता, को़दीङ् मे़म् ङो:लो लो:द ग्राम्सु़ मानु़आ बक्ता।
24
काती माताआलाई लाम्कोईसो़ पा:आद, गो़नी सु़पे़ल् से़ल्नी, खेदायो उँट्लाई चाईं धङ्नी।
25
छी गो़नी, मुलु चे़न्आ नुङ् फरीसी, नाक्ले़न्तीद! माराङ्खेदा गो़नी कान्छु़रा नुङ् थाल्के आ:तोला से़क्तीनी, खेदायो आ:घोला खेदा ब्लोङ्स्चो नुङ् ग्वा चीम्ने माचाप्चोम् लो:मी भरेदु़म्ळा दु़म्नी।
26
काती माताआ फरीसीद, ङाल्ला कान्छु़रा नुङ् थाल्के आ:घोला रीम्ळा पाने, को़दीङ् मे़म्के आ:तोला रीम्ळा दु़म्।
27
"धीक्कार् गो़नीलाई, मुलु चे़न्आ नुङ् फरीसीद, नाक्ले़न्तीद! माराङ्खेदा गो़नी चुन् ख्ले़ङ्ना सु़लु़म्द खो़म् ब:नी, मे़म् आ:तोला रीम्ळा ता:से, खेदायो आ:घोला खेदा बे़क्आ मु़रु़द:के रु़सेद नुङ् हप्पे मासे:आ थोक्द:मी भरेदु़म्ळा दु़म्मे।
28
ओ़क्सो़ङ् गो़नी यो आ:तोला खेदा मु़रु़द:के आनी ङाल्लादी धर्मी ता:सीनी, आ:घोला खेदा हान्चोम् लो: नुङ् दु़खा गीचोम् नीवामी भरेदु़म्ळा ब:नी।
29
"धीक्कार् गो़नीलाई, मुलु चे़न्आ नुङ् फरीसीद, नाक्ले़न्तीद! माराङ्खेदा गो़नी पर्मेस्वर्के लो: ळक्आके सु़लु़म्द बनेपानी, को़दीङ् धर्मीद:के मुर्तीलाई रीम्ळा पानी,
30
को़दीङ् दा:नी, 'गुकु अक्के कीकीद:के समयदी खेदा पर्मेस्वर्के लो: ळक्आद:के हु़सी बगेपाचोम्दी आम्द:नुङ् माग्रो:सीकावा।'
31
ओ़क्सो़ गो़नी पर्मेस्वर्के लो: ळक्आद सा:आके तावातामीद हो दा:सो गो़नी ईनीदबलाई ङ कोईसो़ पानी।
32
ईनी कीकीद:मी पाना साम्सेके ते गो़नी थु़म्ने।
33
"बु़साद, साँभे बु़साके तावातामीद, गो़नी नरक्दीम् सुरीम्लाङ् गेक्सो़ झुक्का:ने चाम्नी?
34
ए़म्चामी गु ईनीकेदी पर्मेस्वर्के लो: ळक्आद, बुद्दी थीआ मु़रु़द नुङ् मुलु चे़न्आद फ्लीङुमी। मे़म्द:दी गेसोलाई गो़नी सा:नी, को़दीङ् क्रुस्दी चा:नी, को़दीङ् गेसोलाई ईनी मुलुखीम्द:दी कोर्रा लाईपानी, को़दीङ् सहर्सहर् पीत्था दु़खा गीनी।
35
ब्लोयुदी बगेपाना हप्पे धर्मी मु़रु़के हु़सी, दोस् मान्थीम् हावील्के हु़सी को़दीङ् बेरेके़हके तावा जकरीयाके हु़सीसम्म, मे़म्लाई गो़नी से:आ ठङ् नुङ् थान्के आलु़म्बु़दी सा:तानी। मे़म् ईनीकेङ् पीयादी रा:।
36
आजेङ् गु गो़नीलाई मो़:नानी, ए़म् हप्पे लो: ए़मेङ् नीनीनाप्चा त:रे रा:।
37
"ए यरुसलेम्, ए यरुसलेम्, गो़ पर्मेस्वर्के लो: ळक्आद:लाई सा:आ को़दीङ् ईकेदी फ्ली:नाद:लाई लुङ्मी आप्ळा! गेक्सो़ घ्लुमोमी आबुक्ळालोद:लाई आळाफ्ले़म्ग:यु़ खु़बामी, मो़क्सो़ङ् गु हक्सीङ् खेप् ईबेबाचाद खुप्चोम् ग्वा पा:तङ्, खेदायो गो़ माबी:सेवा।
38
को:ने ईनी खीम् फीङ्गा-फीङ्गा प्लन्ना ब:।
39
माराङ्खेदा गु गो़नीलाई मो़:नानी, 'परम्प्रभुके नीङ्दी राआ आसीलोङ्माके ब:मे' मादा:नीम्सम्म गो़नी गुलाई माताईनी।"