¹ Eri agera, abona omuntu waburhwaga ali muhurha. ² Abigirizwa bage bamudosa: Waliha Mwigiriza, nde wajirire echaha,oyu muntu eri babusi bage, obula aburhirwe muhurha? ³ Yesu: Oli yewe oli ababusi bage nta chaha bajirire, chi mpu li obuhashe bwa Namahanga bubonekana kuli yewe. ⁴ Obula bwachibona, kukwanene njire akasi kw'owantumaga: Obudufu bunayinja, n'obudufu burhakola. ⁵ Obu nchiri eno gulu, ndi bumoleke bw'egulu. ⁶ Eri aba amaderha ntyo, anachira okudaho, ajira orhushoho n'amachanira gage, arhushiga oku masu ga gula muhurha. ⁷ Okubundi amubwira: Jaga ochishuke omu chisima cha Silowamu, kwo kuderha: Orhumirwe. Gula muhurha gwagenda, gwachishuka gwa nagaluka eri gukola gwabona bwinja. ⁸ Abalungwe bage n'abantu bakazagi yorha bamubona aja ahunahuna, baderha: K'arhali ola wakazagi yorha ahunahuna oyu? ⁹ Baguma: Yewe. Abandi: Arhali yewe, chi wundi omushushire. Naye: Nyono. ¹⁰ Bamudosa: Kurhe amasu gawe gahumukire? ¹¹ Abashuza: Ola baderha mpu ye Yesu, ye wajiraga orhushoho, arhunshiga oku masu, anambwira: Jaga ochishuke omu chisima cha Silowamu. Nanajayo, nanachishuka, nanabona. ¹² Bamudosa: Ngahe ali? Naye: Ntenji. ¹³ Banachikanyanya ola muntu wali muhurha emw'Abafarisayo. ¹⁴ Olusiku Yesu ajiraga orhushoho anamuzibula amasu lwali lwa Sabato. ¹⁵ Abafarisayo nabo bashubi mudosa gurhe amasu gage gazibulaga. Naye: anshiga orhushoho oku masu, nagenda chishuka, nankola ngwerhe nabona. ¹⁶ Bafarisayo baguma: Oyo muntu arharhenga emwa Namahanga, bula arhakenga Sabato. Abandi: Gurhe omunya byaha akajira ebisomerene biri nk'ebi Bachigabamo bonine na bonine. ¹⁷ Banachishubi dosa ola wali muhurha: Nawe gurhe oderhere enyanya y'owakuzibulaga amasu? Naye: Ali mulebi. ¹⁸ Chi Abayahudi barhalonzaga oku yemera oku oyo muntu ali muhurha n'oku akola agwerhe abona. Kwo kuhamagala ababusi bage. ¹⁹ Babadosa: Ka mugala wenyu oyu, ola muderha mpu aburhwaga muhurha? Gurhe akolaga agwerhe abona ²⁰ Ababusi bage bashuza: Rhuyinji oku rhwabano rhwamuburhaga n'oku aburhwaga eri afire amasu. ²¹ Chi oku akola agwerhe abona n'owamuzibulaga amasu, rhurhamumenyere. mumudose; akola mulume, yenine achiderhera. ²² Bwoba bwa Bayahudi bwarhumaga ababusi bage baderha ntyo; bula bali bahigire owaderhere oku Yesu ye kristu ana chibwe omu Sinagogi. ²³ Che charhumaga ababusi bage baderha: Akola mulume; mumudose yenine. ²⁴ Abayahudi bashubi muhamagala obwa kabiri, bamubwira: Okuze Namahanga. Rhwabano rhuyinji oku ola muntu ali munyabyaha. ²⁵ Naye: Akaba ali munya-byaha, ntenji; kantu kaguma konine mumenyere: Nali muhurha na buno nkola ngwerhe nabona. ²⁶ Banamudosa: Gurhe kula akujirire? Gurhe akuzibwire amasu? ²⁷ Abashuza: Nababwirire mira, murhanayunvirhe. Charhuma mwalonza nshubi babwira? Nkaba nenyu mwalonza okuba bigirizwa bage? ²⁸ Banarhondera bamujachira: Okaba mwigiriza wage. Rhwabano rhuli bigirizwa ba Musa. ²⁹ Rhwabano rhuyinji Musa yi Namahanga abwirir'emyazi yage; chi oyu rhurhamuyinji ali wa ngahe? ³⁰ Ola mulume abashuza: Lero namasomerwa. Murhenji ali wa ngahe omuntu onfumize obuhurha. ³¹ Rhuyinji oku Nyamuzinda arhayunviriza banya byaha, chi omuntu omurhumikira n'ojira oku alonza yewe ayunviriza. ³² Ka mukola muyunvirhe omuntu azibwire amasu gw'owaburhwaga muhurha? ³³ Achibaga arhali emwa Namahanga arhenga, ntacho akajirire. ³⁴ Bamushuza: Kurhenga omu nda ya nyoko eri oyunjwire byaha, onakola mpu warhuyigiriza. Banachimulibirhako. ³⁵ Yesu ayunva oku bamulibirhireko. Eri bachishimanana, amubwira: K'oyemerere Mwene omuntu? ³⁶ Naye: Ye Nde, Nahano, nani muyemere? ³⁷ Yesu amubwira: Omubwene, ye gwerhe akuderhesa. ³⁸ Naye: Nyemerere, Nahano. Anafukama embere zage. ³⁹ Okuhandi Yesu anachiderha: Kuchiranula kwa nderhere eno gulu: Lya Barhabona babona, n'ababona babe mihurha. ⁴⁰ Abafarisayo baliriho eri bayunva, bamudosa: Ka Rhuli mihurha nerhu? ⁴¹ Yesu ababwira: Muchibaga mihurha, singa nta chahamugwerhe. Chi mwabo: Kubona mubona. Cho chirhumire echaha chenyu ha chinali.