¹ Okuli, okuli, mbabwirire: Orhagerere omu lunvi lw'okuja omunju y'ebibuzi, aliko akagera omuyindi njira chishambo. ² Alik'ogerera oku lunvi lw'ebibuzi Ali lungere. ³ 0mulanzi amuchingulir'olunvi, n'ebibuzi binayunv'omulenge gwage, anahamagala ezino lya buli chibuzi, n'oku bihek'embuga. ⁴ Achimala hulus'embuzi zage zoshi, alambagit'embere wezo mbuzi; nezo mbuzi zamukulikira, bulala ziyinji omulenge gwage. ⁵ Ezi mbuzi zirhakakulikir'omugenzi, zanamulibirha hale bulala zirhayinji omulenge g'omugenzi. ⁶ Yesu abwirabo ogu mugani, aliko barhayunvag'ebyaliri kubabwira. ⁷ Yesu ababwira kandi: Okuli, okuli, mbabwirire ndi lunvi lw'embuzi. ⁸ Balala boshi bayinjir'embere zani bali bishambo na bishambo; aliko embuzi zirhabayunvirizaga. ⁹ Ndi lunvi. Ey'omuntu akangerer'ako, nj'achunguka; nj'ajamo anahuluke,. nj'anabon'erango. ¹⁰ Ochishambo chiyinja eyi kushamboha, kuyirha, n'okubihya; nyono, nayinjire y'embuzi zibon'akalamo, njizinakabone okubunene. ¹¹ Ndi Lungere mwinja. Na Lungere mwinja anahan'akalamo oku bibuzi byage. ¹² Alik'omugenzi, arhali lungere, eyi n'embuzi zirhali zage. Eyabona lushagamwa lwayinjire, analek'embuzi, analibirha, na lushagamwa anazirhola n'okuzishandaza. ¹³ Omugenzi anabihya bulal'ali mugenzi, arhababal'embuzi. Ndi Lungere mwinja. ¹⁴ Nyinji embuzi zani, nazo zinyinji. ¹⁵ Nk'oku Darha anyinji na nk'oku nyinji Darha, nahan'akalamo kani oku mbuzi zani. ¹⁶ Ngwerhe kandi ezindi mbuzi, zirhali zamuchino chishumba; ezola, bihemere nzisholere; njizayunv'omulenge gwani, njizaba chishumba chiguma na Lungere muguma. ¹⁷ Darha ansima, bulala nahan'akalamo kani nashub'enkarhole. ¹⁸ Ntaye wankakanyega, aliko nakahanire nyenine. Ngwerh'obuhashe b'okugahana, ngwerh'obuhashe b'okugarhola; ly'erhegeko nahabirwe na Darha. ¹⁹ Enyanya z'ebyo binwa, Abayahudi bachigaba. ²⁰ Banene omubo baderha: Agwerh'omuzimu, ali musire; gurhe mwakamuyunvirhiza? ²¹ Abandi baderha: Birhali binwa by'ogwerh'omuzimu. K'omuzimu akagala kuhumul'empumi? ²² Byaba ntyo. Bajir'olusiku lukulu lw'aka Nyamuzinda e Yerusalemu. Gali mango g'emboho. ²³ Na Yesu achilambagiza omu ka Nyamuzinda, omulunvi lwa Solomono. ²⁴ Abayahudi bamuzunguluka n'okumubwira: Kugera mangochi nji waleka okuzulus'emirhima yerhu? Nkaba we Kristu, orhubwir'okunali. ²⁵ Yesu abashubiza, nababwirire murhanayemerere. Ebijiro ndi nakol'omuzino lya Darha biri byampamiriza. ²⁶ Aliko murhayemerere, bulala murhali b'omu mbuzi zani. ²⁷ Embuzi zani ziyunv'omulenge gwani, zinyinji; nazo zinankulikira. ²⁸ Nazih'akalamo k'esiku na mango; zirhakanafa na ntaye nji wazikula omu maboko gani. ²⁹ Darha, wazimpaga, ali mukulu kulusha boshi; nantaye wakagala kuzinyeg'omufune za Darha. ³⁰ Nyono na Darha rhuli muguma. ³¹ NKandi Abayahudi barhol'amabale mpu bamuyirhe. ³² Yesu ababwira: Nabayereker'ebijiro binene byarheng'emwa Darha: Kw'ebyola munyirhe na mabale? ³³ Abayahudi bamushubiza: Rhurhakuyirh'okubijiro binja s'oku chijachi, na bulala woy'oli muntu, wachijira Nyamuzinda. ³⁴ Yesu ashubiz'abo; Kabirhayandikirwe omurhegeko lyenyu: Naderhere; muli ba biheko? ³⁵ Nakab'erhegeko lyakayirika ba biheko balal'omwazi gwa Nyakasani gwahikire, nakab'olwandiko lurhagafa lwafire, ³⁶ eyi Darha acheseze anamurhum'omwigulu, mumubwire: Oliwajachira! Nabulala naderhere: Ndi mwene Nyamuzinda. ³⁷ Eyi nankaba ntali najir'ebijiro bya Darha, murhanyemeraga. ³⁸ Akaba ndi nabijira, s'aliko murhanyemerere, muyemer'ebi bijiro, yi mumenya n'okuyemera oku Darha ali omukagarhi kani nani okundi omu kagarhi kage. ³⁹ Kw'ebyola, balonza kumufarha, aliko afumabo. ⁴⁰ Yesu agenda kandi kurhaluk'e Yorodani, ahantu Yohana abatizizaga burhanzi. Aber'aho. ⁴¹ Abantu banene bamushimba n'okuderha: Yohana arhajir'ekisomerene n'echiguma aliko ebyaderhaga k'oyu mulume byaliri by'okunali. ⁴² N'ahola hantu, abantu banene bwenene bamuyemera.