¹ Yesu yenine achijira oku ntondo y'Emizetuni. ² Chi eri eba misekeseke, bashubi mubona omu ka Nyamuzinda, n'olubaga lwoshi lwamukunjukako. Ana yikala, arhondera abayigiriza. ³ Abashamuka b'ehano n'Abafarisayo bamulerhera omukazi wa gwarhagwa omu bugonyi, bamuhira ekagarhi k'abantu boshi, ⁴ babwira Yesu: Waliha Mwigiriza,oyu mukazi agwarhirwe mpiru-mpiru omu bugonyi. ⁵ N'omu Marhegeko, Musa aderhere mpu abakazi ba bene abo mabale rhwakababanda. Nawe woyo gurhe obwene? ⁶ Baderhaga ntyo mpu bamurhege, li babona oku bamulega. Chi Yesu achiyunamira, arhondera ayandika ahashi n'omudoke gwage. ⁷ Eri abona barhamurhengako, anachiyinamuka, ababwira: Ola orhasagi jira chaha muli mwabo amubandage ebale lya burhanzi. ⁸ Anachishubiyunama, ashubirhondera ayandika ahashi. ⁹ Eri bayunva eyo myazi, bayongoloka muguma muguma, kurhangirira oku bashaja; na ntyo Yesu ayorha yenine n'ola mukazi wali halala bwimanga. ¹⁰ Okubundi Yesu anachiyinamuka, amubwira: We mukazi, ngahe bali? Ka ntaye wachikuchirire olubanja? ¹¹ Naye: Ntaye, Yagirwa. Yesu: Nani ntako nachikujira. Chigendera, chi omusezi orhachihira okahemuka. ¹² Yesu ashubi babwira: Nyono bulangashane bw'egulu; onkulikire arhankagenda omu mwizimya, chi aba n'obumoleke bw'obuzine. ¹³ Abafarisayo banachi mubwira: Obu wenine ogwerhe wachihamiriza, obuhamirizi bwawe buli ntabo. ¹⁴ Yesu abashuza: Nechi, nyono nyenine nchihamiririza, S'aliko konine obuhamirizi bwani buli bw'okuli, bula nyinji aha ntenga n'emunda nyerekere; s'aliko mwabo murhenji aha mpulukire n'aha nalola. ¹⁵ Mwabo nka mwacha olubanja, mubiri mulola; nyono ntachira nde lubanja; ¹⁶ na nkacha olubanja, olubanja lwani luli lw'okuli, bula ntali nyenine, S'aliko ndi n'owantumaga. ¹⁷ N'omu Marhegeko genyu kuyandikirwe mpu obuhamirizi bwa bantu babiri buli bw'okuli. ¹⁸ Nchihamiririza nyenine, na Darha wantumaga naye ampamiririza. ¹⁹ Banachimudosa: Isho ngahe aba? Yesu abashuza: Murhanyini, murhenji na Darha; muchimanyaga, mwakanamenyere Darha. ²⁰ Eyo myazi aderheraga omu Ka Nyamuzinda, aha bwa lurhamba lw'echibikiro,eri agwerhe ayigiriza. Ntaye waderhere mpu amuhirakw'olunu, bula amango gage garhalizi hika. ²¹ Yesu ashubi babwira: Nachigendera; mwandoza munafane echaha. Aha naja murhankahahika. ²² Abayahudi bakadosana: Ka kuchiniga achiniga obu agwerhe aderha: Aha naja murhankahahika? ²³ Yesu ashubi derha: Mwabo muli b'egulu nani ndi w'enyanya.Mwabo muli b'eno gulu, nani ntali w'e gulu. ²⁴ Nababwirire oku mwafana ebyaha byenyu. Nechi, akaba murhayemerere oku nyono Nye Nahano,mwanafan'ebyaha byenyu. ²⁵ Banachimubwira: Oli nde? Yesu abashuza: Oyo nababwirire. ²⁶ Ngwerhe binene naderha enyanya wenyu, banene bamuchirako olubanja; s'aliko owantumaga arhaderha ebirhali by'okuli, n'ebi nakulaga emwage byo naderha eno gulu. ²⁷ Bowe barhayunvaga oku Eshe aderhaga. ²⁸ Obwo Yesu anachibabwira: Amango mwayinamula Mwene-omuntu, li mwamenya oku nyono Nahano n'oku ntacho njira oku bwani bwani; ebi Darha anyigirizize byo nderha, ²⁹ n'owantumaga rhwembi naye rhuba; arhandekaga nyenine, bula esiku zoshi njira ebimusimisa. ³⁰ Eri aba agwerhe aderha ntyo, banene bamuyemera. ³¹ Oku handi Yesu anachibwira balala Bayahudi bali bamuyemerere: Mukasera oku myazi yani, mwaba bigirizwa bani b'okunali; ³² mwamenya okuli, n'okuli kwabakula omu buja. ³³ Bamushuza: Rhuli baburha ly'Abrahamu na nta mango rhusagiba baja b'omuntu. Kurhe wankarhubwiraga: Mwayinjiba buzira kushwekwa? ³⁴ Yesu anabashuza: Okuli, mbabwirire, ngasi muntu ojira echaha ali muja. ³⁵ N'omuja arhabera omu nju esiku zoshi; omwana yeke oberamo esiku zoshi. ³⁶ Eri Omugala akabachungula, mwanarhenga omu buja loshi. ³⁷ Nechi, mumenyere oku muli burha ly'Abrahamu; kurharhuma murhalonza okunyirha, bula omwazi gwani gurhabaja emurhima. ³⁸ Nyono nye ndi naderha ebi nabwene emwa Darha, nenyu mujira ebi mwayunvirhe emwa isho. ³⁹ Bamushuza, mpu: Chi Abrahamu ye Darha. Yesu ababwira: Muchibaga bene Abrahamu, singa munajira ak'Abrahamu. ⁴⁰ Chi mw'abo mwalonza okunyirha okwenge namababwira ebinali nayunvirhe emwa Namahanga. Okwo Abrahamu arhajiraga. ⁴¹ Mw'ebyo bijiro bya isho mujira. Banachimubwira: Rhurhaburhagwa omu bugonyi; Darha ali muguma: Ye Namahanga. ⁴² Yesu anababwira: Namahanga achibaga Isho, singa munansima, bula Nyamuzinda ansima n'emwage narhengaga. Arhali nyenine nachilerhaga, chi ye wantumaga. ⁴³ Chi chi chirhuma murhayunva enderho zani? Bula murhakagala kuyunva emyazi yani. ⁴⁴ Isho ye Lyangombe, na nyifinjo za isho mulonza okujira. Kurhenga omurhondero eri ali mwisi wa bantu; arhali wa kuderha okuli, bula okuli kurhamubamo. Nk'aderha eby'obubeshi, omu murhima gwage abikula, bula ali mubeshi ye n'eshe w'obubeshi. ⁴⁵ Nyono murhanyemera, bula nderha okunali. ⁴⁶ Nde mu mwabo wankanyakiriza oku chaha? Akaba nderha okunali, chirhuma murhayemera? ⁴⁷ Oli wa Namahanga ayunva emyazi ya Namahanga; akaba murhayi yunva, kwo kuderha oku murhali na Namahanga. ⁴⁸ Abayahudi bamushuza: Rhurhahabaga eri rhuderha nti oba Musamariya n'oku Lyangombe akubamo. ⁴⁹ Yesu abashuza: Ntalimo Lyangombe, chi ngwerhe na Darha obukuze, nenyu mugwerhe mwanganyaguza. ⁵⁰ Nyono, ntalonza erenge lyani; hali olindozeza, ye wanayinjich'olubanja. ⁵¹ Okuli, okuli, mbabwirire, oshimba emyazi yani arhakabona lufu chiro n'eliguma. ⁵² Abayahudi bamubwira: Lero rhwamamenya bwinja oku Lyangombe akulimo. Abrahamu afire, n'abalebi nabo bafa; nawe: Oshimba emyazi yani arhakabona lufu chiro n'eliguma. ⁵³ Kolushire Darha Abrahamu wafire? N'abalebi nabo bafire. Oli nde nawe? ⁵⁴ Yesu abashuza: Nchi nchikuzaga nyenine, erenge lyani lyali lyaba busha; Darha ye nkuza, ola muderha mpu ye Nyamuzinda wenyu, ⁵⁵ n'obo murhamuyinji. Nyono muyinji n'eri nakaderha mpu muyinji, nanaba nabeshere akenyu. Chi muyinji nanshimba omwazi gwage. ⁵⁶ Isho Abrahamu achivinjag' okuyinjibona olusiku lwani; alubwene anachishinga bwenene. ⁵⁷ Abayahudi banachimubwira: S' orhazibona myaka makumi marhano; ngahe wachiboneraga Abrahamu? ⁵⁸ Yesu abashuza: Okuli, okuli, mbabwirire, eri Abrahamu arhachiba,eri hamba. ⁵⁹ Banachirhola amabale mpu bamubandego, chi Yesu achiyongolokera, arhenga omu ka Nyamuzinda.