¹ Enyuma yaho Yesu aja oku lwindi lunda eburhambi bw'enyanja y'e Galilaya, ye Tiberiya. ² Olubaga lwa mukulikira, bulala balibwene ebisomezwa by'okufumya abalwala, ³ Yesu ashona oku ntondo, n'eyo ana yikala haguma n'abigirizwa bage. ⁴ Nabo e Pasaka eli hofi, lusiku lukulu lw'Abayahudi. ⁵ Alambula amasu gage, abona olubaga lunene lumushimbire, Yesu abwira Filipo, ngahe rhwagulira emigati ab'abantu balya? ⁶ Yesu Amubwira ntyo oku rh'agula, bulala alimenyere bichi ajira. ⁷ Filipo amushubiza, emigati rhwakagula ya dinari magana mabiri erhakagalabo mpu buli muntu abone hityu. ⁸ Muguma w'omu bigirizwa bage Andreya mwene wabo Simoni Petero, amu bwira: ⁹ Hano hali omwana rhabana oherhe migati erhano Yobulo n'efi ebiri, bichi ebyo byakajira abantu boshi? ¹⁰ Yesu aderha : Mubayikaze, ahola hali ebirhi binene, bayikala balume hofi bihumbi birhano. ¹¹ Yesu arhola omugati, ahuna, agabira abaliyikere ahabo n'okw'efi nk'oku banali shondere. ¹² Amango bayugurhaga, abwira abigirizwa bage; murholagule ebichira byoshi biyorhere ntahyo hiherage. ¹³ Bayirholagula, bana bumba rhurhanda ekumi na rhubiri rhwebichira bya yorhaga by'emigati erhano y'obulo enyuma lya boshi okulya. ¹⁴ Abo bantu, babere babona ebisomezwa Yesu ajiraga, baderha: Oyu ali mulebi okwanene okuyinja omu gulu. ¹⁵ Na Yesu amenya oku balonzeze oku yinja kumurhola abe mwami wabo, achikula okubo kandi aja oku ntondo, yenine. ¹⁶ Eri kuba golo, abigirizwa bage bayandagalira oku nyanja. ¹⁷ Eyi baja omu nkugwe, bashabuka enyanja baja e Kaperanahumu. Bwali bukala budufu, na Yesu arhanaza hika okubo. ¹⁸ Echihusi chayinja, n'enyanja yaja m'omulaba. ¹⁹ Eri bamala vugama hofi ntambu makumyabiri n'erhano changwa makumi masharhu, babona Yesu ya lambagira oku nyanja n'oku shegera ebwa nkuge, bayoboha. ²⁰ Yesu aba bwira, ali, nyono, murhayobohaga. ²¹ Balonza okuja murhola omu nkuge, oku mango enkuge yaba ya mahik'eshi emunda baja. ²² Echigusho chayorhaga eshi babona okw'enkuge yaliri nguma, na Yesu arhalijire mw'eyo nkuge haguma na bigirizwa bage, s'aliko baligendere bonine. ²³ Buch'esezi, ezindi nkuge zarhenga e Tiberiya hofi na halala balyaga emigati enyuma ya Nahano okuhana. ²⁴ Abantu b'echigusho, eri babona oku Yesu na bigirizwa bage barhaliho, baja bonine mw'eyo nkuge baja e Kaperenahumu kulonza Yesu. ²⁵ Bamubona hale n'enyanja, bamu bwira: Mwigiriza, mangochi wayinjag'eno? ²⁶ Yesu abashubiza okuli, okuli: Mba bwirire, yi mwanshonda, arhali okuba mwabonaga ebisomerene, s'aliko okuba mwalyaga emigati mwa manayugurha. ²⁷ Mukole, aliko arhali enyanya ly'ebiryo bibiha, s'aliko enyanya wabilala by'akalamo, n'okubona akalamo k'esiku n'amango. Ok'omwana w'omuntu njabaha; yewe nk'eshe, na Nyamuzinda amuhebere kw'echimenyiso ²⁸ Aba bwira: Chichi rhujirage lirhukola akasi ka Nyamuzinda? ²⁹ Yesu abashubiza: akasi ka Nyamuzinda, ali mwabo oku yemerera ola arhumaga. ³⁰ Bamubwira, bisomerene bichi wajirire rhubone kuyemera na rhukuyemere? Chi wajirire? ³¹ Badarha balyaga amana omu mpinga, nk'oku biyandikirwe: Abaha omugati gw'empingu g'okulya. ³² Yesu ababwira: Okuli, okuli mba bwirire, Musa arhabahaga omugati gw'empingu aliko darha abahere omugati gwinja gw'empingu; ³³ Bulala omugati gwa Nyamuzinda, g'ogula gurhenga empingu go kuhana akalamo omu gulu. ³⁴ Amu bwira: Nahano, orhuhe ngasi mango ogo mugati. ³⁵ Yesu abwirabo: Ndi mugati gw'akalamo. Owayinja emwani arhakabona eshali, na owanyemera arhakayunva enyorha. ³⁶ Aliko, babwirire, mwa bwene, murhana yemeraga. ³⁷ Ngasi boshi Darha ampere bayinj'emunda ndi, n'ola wakayinj'emunda ndi ntaka muheba embunga. ³⁸ Bulala na yandagalaga empingu oku yinjijira arhali bulonza bwani, aliko obulonza bolala wantumaga. ³⁹ Kula kuba, bulonza bo wantumaga, oku ntacho mpezage oku baw'ampere. S'aliko nfule boshi oku lusiku l'obuzinda. ⁴⁰ Obulonza bwa Darha, ngasi yeshi obona omugala oku muyemera abe n'akalamo k'esiku n'amango, njina mufula esiku z'obuzinda. ⁴¹ Aba Yahudi bachiveba enyanya wage, bulala aderhaga mpu: Nye mugati gw'arhengaga empingu. ⁴² Baderhaga: Oyu arhali ye Yesu, mugala wa Yusufu, olala rhuyinji Eshe na Nina? Gurhe akaderha oku: Narhenga empingu? ⁴³ Yesu abashuza: Murha chivebaga. ⁴⁴ Ntaye wakayinja emwani, nka Darha wantumaga arhamukulwire, njina mufula olusiku luzinda. ⁴⁵ Biyandikirwe omu balebi: Nji bayigirizwa boshi na Nyamuzinda. Olala wayunvirhe Darha n'oku yemera enyigirizo zage njaja emwani. ⁴⁶ Ntaye oshwiragibona Darha, orhali olala warhengaga emwa Nyamuzinda; oyola y'ewa bwene Darha. ⁴⁷ Okuli, okuli, mba bwirire, ola onyemerere aherhe akalamo k'esiku n'amango. ⁴⁸ Nyono nye mugati gw'akalamo. ⁴⁹ Basho balire amana omu mpinga, banafa. ⁵⁰ Ogu gw'omugati gurhenga empingu, owagulyako arhakafa. ⁵¹ Nye mugati guzene gwarhengaga empingu; Owalya kw'ogo mugati alama esiku zoshi; n'omugati nahana, gwo mubiri gwani gwalerhera egulu obuzine. ⁵² Ahola nyanya, Abayahudi baja buhaka bonine oku bonine, mpu: Gurhe oyu muntu ankarhuha omubiri gwage mpu rhugulye? ⁵³ Yesu ana babwira, eri: Okuli, Okuli, mbabwirire, akaba murhalire omubiri gwa mwene omuntu murhana nywere eshagama yage, nt'akalamo muherhe. ⁵⁴ Olya omubiri gwani n'okunywa eshagama yani aherhe akalamo k'esiku n'amango, nji na bafula olusiku luzinda. ⁵⁵ Bulala omubiri gwani by'ebiryo by'okunali, n'eshagama yani ch'echinyobwa chinja. ⁵⁶ Olya omubiri gwani n'onywa eshagana yani andimo nani imulimo. ⁵⁷ Nk'oku Darha wantumaga azene, nani nzene muli Darha, na ntya ondya alama haguma nani. ⁵⁸ Lola omugati gwarhengaga empingu. Gurhali gwo muguma n'ogu basho balyaga amana bafa: Olya ogu mugati nj'alama esiku n'amango. ⁵⁹ Yesu aderha ebyo bintu omu chishagala, ayigiriza e Kaperanahumu. ⁶⁰ Banene omu bigirizwa bage, bamalire muyunva, baderha: Guno mwazi gu komere; nde waka guyunva? ⁶¹ Yesu, amenya oku baherhe bachiveba kw'ogo mwazi, ababwira: Gwabagayisize? ⁶² Biribichi mwabona mwene omuntu ashona emunda arhengaga? ⁶³ Omuka gwo gubamwo akalamo, omubiri gwa busha. Emyazi naba bwirire biri muka n'akalamo. ⁶⁴ Aliko muli mwabo muli mwa barhayemerere. Bulala Yesu ayinji gurhenga mira bande abarhamuyemeraga, na nde nji wamuhana. ⁶⁵ Ashubiza: Cho chirhumire na babwiraga ntaye wankaja emunda ndi, nka Darha arhamumpaga. ⁶⁶ Kurhenga ago mango, banene omu bigirizwa bage bachiyegula baleka oku mukulikira. ⁶⁷ Oku buzinda Yesu abwira ekumi na babiri: Nenyu kamu rhagenda? ⁶⁸ Simoni Petero amushuza: Nahano, rhwakaja emwa nde? Emwawe eri emyazi y'akalamo k'esiku n'amango, ⁶⁹ rhwana yemerere n'okubona ok'oli Kristu, mushinganyanya wa Nyamuzinda. ⁷⁰ Yesu abashuza: arhali nyono nyenabalondolaga, mwabo ekumi na babiri? Na muguma wenyu ali muzimu! ⁷¹ Aderhaga Yuda Esikariote, mugala wa Simoni; bulala yewe yi nji wamuhana, ali, muguma w'ekumi na babiri.