¹ Nantyo Nahano amenyere oku aBafarisayo bayunvirhe oku akola agwerhe bigirizwa banene kulusha Yohana n'oku agwerhe abatiza bantu banene kumulusha, ² n'obwo arhali Yesu yenine wakazaga batiza, chi bigiriza bage, ³ arhenga e Yudeya, achishubira e Galaliya. ⁴ Kwali kukwanene agerere omu Samariya. ⁵ Anachihika omu chishagala chiguma ch'e Samariya, chiderhwa Sukari, hofi n'eshwa Yakobo ahaga omugala Yusufu. ⁶ He chisima cha Yakobo chali aho. Yesu ali amarhama n'enjira; ana yikala oku chikunguzo ch'echisima. Zaliri nka saa ndarhu. ⁷ Mukazi muguma w'omusamariya ayinji doma. Yesu anachi mubwira : Mpa nani amenji nywe. ⁸ Abigirizwa bage bali bajire gula ebiryo omu chihugo. ⁹ Ola mukazi w'OmuSamariya amu bwira : Gurhe we Muyahudi wankampuna amenji, nyono Musamariya? Bula Abayahudi n'Abasamariya barhabonananako. ¹⁰ Yesu amushuza: Ochimenyaga eshokano ya Nyamuzinda okanamenya nde oku bwirire : Mpa nani nywe, wakabere we muhuna, naye akana kuhere amenji g'obuzine. ¹¹ Ola mukazi amu bwira: Yagirwa, chi Orhagwerhe echi wankadomeramo, n'echisima chilehere. Ngahe wankachibona amenji g'obuzine? ¹² K'olushire darha Yakobo warhuhaga echi chisima, anyweramo yewe n'abana n'ebintu byage? ¹³ Yesu amushubiza: Ngasi yeshi onywa kwago menji, ashubi yunva enyorha; ¹⁴ chi owanywe oku menji namuha, arhaka yunva nyorha chiro n'eliguma; bula amenji namuha gamuhindamukamo chisima chakazirhengamo amenji g'obuzine bw'esiku n'amango. ¹⁵ Nyamukazi: Waliha, mpa nani kwago menji, ly'omusezi ntachiyunvaga nyorha, nji ntana chiyinja doma hano. ¹⁶ Yesu amubwira: Genda, ohamagale balo, ogali galuka. ¹⁷ Ola mukazi amushuza: Ntajira mulume Yesu amushubiza: Nechi, ku binali, orhajira mulume. ¹⁸ Bula wamaja omu mwa balume barhano, n'oyu oli omu mwage arhali balo. Nechi, orhabeshere. ¹⁹ Nyamukazi: Yagirwa, namabona oku oli mulebi. ²⁰ Badarha bakazaga haramya kw'eyi ntondo, nenyu mpu Yerusalemu ho hantu h'okuharamya. ²¹ Yesu amubwira: We mukazi, nyemera, amango gahikire, arhanachiri kweyi ntondo eri e Yerusalemu mwachikaharamya Darha. ²² Mwabo munaharamya echi murhenji, rhabano rhunaharamya echi rhuyinji; bula obuchire omu Bayahudi burhenga. ²³ Haba amango gayinja, nago ganakala gagano abaharamya okunali bakola baharamya Darha omu murhima gwabo n'okuli; bula abo bo Darha alonza mpu bamuharamye. ²⁴ Nyamuzinda aba Muka, n'abamuharamya kukwanene bamuharamye omu murhima n'okunali. ²⁵ Ola mukazi anachimubwira: Nyinji oku Masiya, ola baderha Kristu, ayinja. Amango ayinja, ye warhuyigiriza byoshi. ²⁶ Yesu amushuza: Nyono ndi nakuderhesa. ²⁷ Hon'aho abigirizwa bage bayinja, basomerwa eri babona agwerhe aderhesa omukazi. Chi ntaye washagere mpu amudose: Chi wamudosa: Charhuma wamuganiza? ²⁸ Nyamukazi anachihesa akabindi kage, alibirhira eka, aj'ibwira abantu: ²⁹ Muyinje mubone omulume wamambwira ebinajirire byoshi. K'arhankaba ye Kristu? ³⁰ Banachirhenga omu lugo, baja emunda ali. ³¹ Ago mango abigirizwa bage balemaga bamuyinginga banamubwira: Waliha Mwigiriza, ebiryo bino. ³² Naye abashuza: Ngwerhe ebiryo murhenji. ³³ Abigirizwa bage badosana: Nkaba hali owamulerhere eby'alya? ³⁴ Yesu ababwira: Ebiryo byani kuli kujira obulonza bw'owantumaga n'oku yeneza akasi kage. ³⁵ Ka murhaderha: Hayorhere myezi ene emyaka eyere? Nani mbabwirire: Yinamula amasu, mubone oku amashwa gakola gayakirize n'emyaka. ³⁶ Omushaluzi akola ahabwa oluhembo lwage; akola agwerhe alunda emburho oku buzine bw'esiku n'amango, na ntyo owarhweraga naye akola asima haguma n'omushaluzi. ³⁷ Nechi ogu mwazi gunali g'okuli: Orhwera ali wago, n'oshalula ali wago. ³⁸ Namurhumire okuji shalula ebi murhalibukiraga; banene balibukire, nenyu mwalya emyaka y'amalibuko gabo. ³⁹ Basamariya banene becho chishagala bamuyemera eri gula mwazi g'ola mukazi gurhuma: Anambwirire ebi najirire byoshi. ⁴⁰ Eri bamuhikako, bamuyinginga mpu achumbike. Ajirayo siku ebiri zonine. ⁴¹ Bandi banene bamuyemera eri nyigirizo zage zirhuma. ⁴² Babwira ola mukazi: Arhachiri myazi yawe erhumire rhwayemera; nerhu rhwenine rhwamuyunvirhe, rhunakola rhumenyere bwinja oku ku binali, oyu ye Muchiza w'egulu. ⁴³ Eri zila siku ebiri zigera, anachilikula, aja e Galilaya. ⁴⁴ Yesu yenine ali aderhere mpu nta mulebi okengwa omu chihugo chabo. ⁴⁵ Eri ahika e Galilaya, abanya Galilaya bamuyankirira, bula bali eri babwene ebi ajiraga e Yerusalemu byoshi oku lusiku lukulu; bula nabo bali oku lusiku lukulu. ⁴⁶ Ashubija e Kanana y'e Galilaya,ela ahindamulaga amenji okuba divayi. Yali murhambo muguma walwazaga omugala e Kapernahumu. ⁴⁷ Oyo mulume eri ayunva oku Yesu ahika e Galilaya kurhenga e Yudeya, amubugana omu njira, anamushenga mpu ayandagalire emwage, ajifumya omugala wali hofi h'okufa. ⁴⁸ Yesu amubwira: Ka Mukaba murhabwene ebisomerene n'ebirhangazo murhayemera? ⁴⁹ Naye nyamurhwali: Muhanyi, yandagala embere omwana anfirire. ⁵⁰ Yesu amubwira: Gendaga, mugala wawe ali mugumaguma. Nyamulume anachiyemera ogo mwazi gwa Yesu, agenda. ⁵¹ Oku achiri omu njira y'okuyandagalira emwage, abambali bayinja, bamubwira mpu omugala afumire. ⁵² Abadosa esaa yonine arhonderaga okuyunva amagala. Bamushuza: Mulegolo aha saa mushanvu eshushira lyamurhengagamo. ⁵³ Eshe abona oku ye saa Yesu amubwiraga: Mugala wawe ali muranga. Anachiyemera yenine n'ab'omu mwage boshi. ⁵⁴ Echo che chisomerene cha kabiri Yesu ajirire eri ashubira e Galilaya kurhenga e Yudeya.