¹ Haliri muntu muguma w'omufarisayo, ezino lyage y'e Nikodemu, mukulu muguma wa Bayahudi. ² Oyola ajaga emwa Yesu budufu, amubwira: Rabi, rhumenyere oku oli mwigiriza, orhengere emwa Nyamuzinda; Nta muntu wakajira ebimenyiso bili ntya orhali Nyamuzinda abe haguma naye. ³ Yesu amu shuza, ambubwira: Okuli, okuli nkubwirire,nk'omuntu arha burhirwe obwa kabiri arha kabona Obwami bwa Nyamuzinda. ⁴ Nikodemu amubwira: Gurhe omuntu akashubi burhwa obwa kabiri anakala mushaja? Aka chigala kugaluka omunda ya nina obwa kabiri n'oku burhwa? ⁵ Yesu amu shuza: Okuli, okuli nkubwirire, omuntu nka rhaburhirwe oku menji n'omuka, arhakaj'omu bwami bwa Nyamuzinda. ⁶ Echa burhwaga oku mubiri gunali mubiri, n'echaburhwaga oku Muka gunali muka. ⁷ Orhasomeraga oku bona nakubwirire, bihunire oburhwe obwa kabiri. ⁸ Omuhusi gunaj'emunda gulonzeze, n'omulenge gwana yunvikana, aliko ntaye omenyere ngahe gwa rhenga na ngahe gwaja: Nantyo ngasi muntu wa burhwaga oku muka. ⁹ Nikodemu aderha, amubwira : Eyi myazi gurhe ya kagalika. ¹⁰ Yesu aderha, amubwira : Woyo mwigiriza omu Israeli, orha namenyere eyi myazi. ¹¹ Okuli, okuli, nku bwirire, rhunaderha ebirhumenyere, rhuna hamiriza ebi rhwabwene, murhana yemerega obuhamirizi bwerhu. ¹² Nkaba naka babwira mwabo eyi myazi y'egulu murhana yi yemera, gurhe mwaja mwa yemera nka babwira emyazi y'empingu? ¹³ Nta muntu wajir'empingu, orhali olala warhengagayo, muben'omuntu. ¹⁴ Kula Musa amanikaga enjoka omu mpinga, na ntyo kon'oko mw'ene w'abantu ayinamulwe, ¹⁵ Li ngasi muntu omu yemerere abona obuzine bw'esiku n'amango. ¹⁶ Bulala Nyamuzinda asima egulu, ahana omugala w'echusha, mpu ngasi yeshi wa munyemera alek'okuhera, s' abone obuzine bw'esiku n'amango. ¹⁷ Bulala Nyamuzinda arharhumaga omugala omugulu mpu ayinje kuhana egulu, chimpu ly'achiza egulu. ¹⁸ Ngasi omu yemerere, arhakachibirw'olubanja, orha muyemerere, mira olwage lwachibwaga, bula arhayemeraga ezino lya Mugala w'echusha wa Lulema. ¹⁹ Nalo olubanja lw'olu : Obulangashane bwa yinjire enogulu, n'abantu bagala sima omu mwizimya ahali h'obulangashane, bulala ebijiro byabo byali bibi. ²⁰ Bulala ngasi muntu ojir'ebibi, eri kushomba ashomba obulangashane, arhanaja ahali obulangashane, ly'ebijiro byage birhamanyibwa. ²¹ Aliko ojira oku shinganyanya, anaja ahalagere, li babona oku ebijiro byage Nyamuzinda ya bijirira. ²² Enyuma z'ebyo, Yesu na bigirizwa bage bayinja omu chihugo che Yudeya; ajirayo siku haguma nabo, ana balisa. ²³ Naye Yohana eri agwerhe abatiza omu Ainoni, hofi h'e Salimu, bulala amenji galiyo.Bantu banene bayinja kubatizwa. ²⁴ Bulala Yohana arhalizi shwekwa ²⁵ Hana chizuka obuhaka omu bigirizwa ba Yohana n'omu Buyahudi oku kuchishuka. ²⁶ Baja emwa Yohana, bamubwira, mpu: Rabi, ola wali naye eshiriza lye Yorodani, ola wahamiririzaga, naye akola agwerhe abatiza, n'abantu boshi bagwerhe bamushimba. ²⁷ Yohana ana babwira eri : Ntacho omuntu akachiha nka rhachihabirwe kurhenga empingu. ²⁸ Mwenine muli bahamirizi bani kula na derhaga, nti: Arhali nyono Kristu, chi ntumirwe mpu mushokolere. ²⁹ Ogwerhe omuhya eri muhya-mulume; chi omwira w'omuhya-mulume, omuyimangira n'okumuyunva, anasime akayumva omulenge gw'omuhya-mulume. Ogwo gwo mwishingo gwani, na buno gukola mwimana. ³⁰ Kukwanene agandaze, nani nchifunye. ³¹ Owarhenga enyanya ali enyanya ya byoshi; naye wahano gulu anali w'egulu' n'ebyaderha binali by'eno gulu: Owarhenga empingu alushire boshi. ³² Ahamiriza ebya bene n'ebya yumvirhe; chi ntaye oyemera obu hamirizi bwage. ³³ Oyemera Obuhamirizi bwage ayerekana oku Nyamuzinda aderha okunali. ³⁴ Oyu Nyamuzinda arhumaga, binwa bya Nyamuzinda nka ahana Muka ochere arhagera. ³⁵ Darha asima omugala, anahebere byoshi omu maboko gage. ³⁶ Oyemera omugala, agwerhe obubuzine bw'esiku n'amango; olahire okuyemera omugala arhaka bona akalamo, aliko obuhanya bwa Nyamuzinda bwana j'enyanya zage.