¹ Nyono nye muzabibu, na Darha ye muhinzi. ² Buli murhabi guli omu kagarhi kani gurhaherhe malehe nagucha gurhenge. Na buli murhabi guherh'amalehe, naguhirira homwavu, yiguburh'amalehe ganene. ³ obo ntya mukala muli bachesibwa enyanya w'omwazi nababwiraga. ⁴ Muber'omu kagarhi kani nani naber'omu kagarhi kenyu. Nko k'omurhabi gurhakahek'amalehe gurhanali omu murhi, ntyo nenyu murhakahek'amalehe nka murhayikere omu kagarhi kani. ⁵ Nye murhi g'omuzabibu, nenyu mwe marhabi. Eyi ndi omu kagarhi kage, naye omu kagarhi kani,aba n'amalehe ganene, bulala ntacho mwakagala buzira kub'omu kagarhi kani. ⁶ Ey'omuntu akab'arhayiker'omu kagarhi kani anakabulwa embuga nka murhabi guyumire. Nantyo banarhola ogo murhabi, banaguhir'oku muliro, n'okugudwika. ⁷ Mukaber'omukagarhi kani, n'emyazi yani ekabera omu kagarhi kenyu, mukahem'echimulonzeze choshi, Darha abahacho. ⁸ Mukaburh'amalehe ganene, Darha anahabwa obukuze; nantyo mwanaba bigirizwa bani. ⁹ Nko ku Darha ansimire, nani nabasimire. Enyanya w'ebyo, muber'omubuzigire bwani. ¹⁰ Mukafarh'amarhegeko gani, nji mwabera omu buzigire bwani. Nk'oku nani nafarhag'amarhegeko ga Darha, n'okubera omu buzigire bwage. ¹¹ Nababwirir'ebi byoshi y'obusime bwani bub'omukagarhi kenyu, n'obusime buger'oku buzinda. ¹² Eri ly'erhegeko lyani: Musimane mwenyin'oku mwenyine, nk'oku nabasimaga. ¹³ Ntabuzigire bunene nk'okuhan'akalamo enyanya za bera. ¹⁴ Muli bera bani eyi mwankakol'ebinabarhegekere. ¹⁵ Ntachibayirikire bakozi bulal'omukozi arhameny'ebi nawabo yakola. Aliko nabahamagere bera bani bulala nabamenyesez'ebi namenyere gurheng'emwa Darha. ¹⁶ Arhali mwe mwandondolaga, aliko nyono nabalondwere kudera mpu mugende muburh'amalehe, nago malehe gabeho; yi buli choshi nji mwahema Darha omu zino lyani, abakolerecho. ¹⁷ Echi mbarhegekere, musimane mweshi baguma n'abandi. ¹⁸ Eri gulu lyakabashomba, mumeny'okulyanshombag'embere zenyu. ¹⁹ Nka mwali b'egulu, egulu lyakasimir'ebiri byalyo. Aliko bulala murhali b'egulu, na nabalondwere omu ahagarhi k'egulu; enyanya w'ebyo, egulu lyabashomba. ²⁰ Muyibuk'omwazi nababwiraga: Omukozi arhali mukulu ku nahamwabo. Akaba bandibwize, nenyu njibabalibuza. Nakaba babikir'omwazi gwani, nenyu njibabik'omwazi gwenyu. ²¹ Kandi njibabakoler'ebi byoshi enyanya w'ezino lyani bulala barhenji nde wantumaga. ²² Nkantayinjaga, na nkantababwirag'ebi nababwirire; barhakakoler'ebyaha. Aliko lero, ntabubabale n'obuguma behabw' enyanya ze byaha byabo. ²³ Buli muntu yeshi ongayire eyi anagayire Darha. ²⁴ Nka ntakolaga omu kagarhi kabo, ebijiro birhakolwaga n'owundi muntu; barhankabere n'echaha. Aliko lero, barhubwene, banarhugaya, nyono na Darha ntyo. ²⁵ Aliko lihikirire omwazi gwayandikagwa omu marhegeko gabo: Bangayire busha. ²⁶ Alik'omurhabazi amango nj'ayinja, olala njinabarhumira kurheng'emwa Darha, Muka w'okubinali njiwayinja kurhen'emwa Darha, yinji wampamiriza; ²⁷ na nenyu mwanahamiriza bulala muli haguma nani gurhenger'oku murhondero.