¹ Omurhima gwenyu gurhakangukaga. Muyemere Namahanga, munyemere nani. ² Omu mwa Darha muba ntebe zinene. Achibaga arhali ntyo, nali nababwira; najibarheganyiza entebe. ³ Na hano mba najire barheganyiza entebe, nachiyinja barhola, mbaheheke aha ndi, li nenyu mubera aha ndi. ⁴ N'enjira y'emunda naja muyimenyere. ⁵ Tomasi amubwira: Yagirwa, rhurhamenyere ngahe waja. Gurhe rhwankachimenyaga enjira? ⁶ Yesu amushuza: Nyono Nye Njira, nyono nye Okuli, nyono nye Kalamo. Ntaye wankaja emwa Darha arhanangerereko. ⁷ Mukamenya, mwanamenyere Darha. Kurhenga buno mukola mumumenyere mwanamubwene. ⁸ Filipo amubwira: Yagirwa, orhuyereke Isho, bili byangenzi. ⁹ Yesu amushuza: Filipo, aga mango goshi ndi nenyu orhanasaga mumenya? Ombwene eri abwene na Darha. Gurhe wankachiderha: Rhuyereka Isho? ¹⁰ K'orhayemerere oku ndi mu Darha, n'oku Darha andimo? Emyazi ngwerhe nababwira, ntayiderhere oku buhashe bwani: S'aliko Darha ombamo ye gwerhe akola ebyo byoshi. ¹¹ Nyemerere. Ndi Muli Darha na Darha andimo. Akaba murhayemerere, muyemere ebijiro byani birhumire. ¹² Okuli, okuli, mbabwirire, onyemerere, naye anajire ebijiro ngwerhe najira. Anajira chiro n'ebilushire, bula naja emwa Darha. ¹³ Na ngasi kantu mwahuna Darha oku zino lyani, nabajirirako, li Darha akuzibwa n'Omugala. ¹⁴ Echi mwahune oku zino lyani, nabajiriracho. ¹⁵ Akaba munsima, mushimbe amarhegeko gani. ¹⁶ Nani nayinji shenga Darha abahe owundi murhulirizi wabera nenyu esiku zoshi. ¹⁷ Ye Muka gw'okuli, n'egulu lirhagala kumuyankirira, bula lirhamubona lirhamuyinji. Mwenine mumuyinji, bula ali haguma nenyu anabalimo. ¹⁸ Ntabaleka bufubi. Nachigaluka emunda muli. ¹⁹ Kandi kashanji kageke egulu lirhachimbona. S'aliko mwabo mwambona, bula nzene nenyu mwaba n'akalamo. ²⁰ Olwo lusiku mwamenya oku ndi mu Darha, n'oku nenyu muli mu nyono, n'oku nani ndi muli mwabo. ²¹ Omenyere amarhegeko gani akanagashimba, oyo ye onsima, na ngasi onsima, ayinji simwa na Darha, nani namusima nanchiyerekeye. ²² Yuda, arhali ola w'e Keriyoti, amudosa: Yagirwa, gurhe wankachiyerekana emunda rhuli okaleka kuchiyereka egulu? ²³ Yesu amushuza: Omuntu onsima, anabikirira emyazi yani, naye Darha anamusima, rhwanaja omu mwage, rhunahebemo entebe yerhu. ²⁴ Orhansima arhabikirira emyazi yani. N'eyo myazi wayunvirhe erhali yani, s'aliko eri ya Darha wantumaga. ²⁵ Mbabwirire ebyo byoshi nchiri ahakarhi kenyu. ²⁶ S'aliko Omurhulirizi, Muka muchesibwa, Darha arhuma oku zino lyani, ye wayinja bayigiriza byoshi anabakengeze ebinamubwirire byoshi. ²⁷ Mbalekere omurhula, mbahere omurhula gwani. S'aliko ntabaherego kulala egulu liguhana. Muhire omurhima omu nda, murhanayubahaga. ²⁸ Mwayunvirhe oku na babwirire: Nagenda, s'aliko nagaluka emunda muli. Muchibaga munsima, singa mugwerhe mwachishinga, bula kuba naja emwa Darha, bula Darha ye mukulu kundusha. ²⁹ Ntyo nababwirire ebyo embere bibe, nti omusezi byamaba li muyemera. ³⁰ Ntachibabwira binene, bula omurhwali w'egulu ayinjire. S'aliko nta buhashe agwerhe ku nyono. ³¹ S'aliko ku kwanene egulu limenye oku nsima Darha n'oku ebi Darha ambwirire bi njira. Muyumuke. Rhurhenge hano.