¹ Nababwirire ogu mwazi, nji bimenye bya ka bagwisa, nji babahiga omu chishagala. ² Aliko lero akasazi kayinjire, ababayirha nji baderha oku balikolera Nyamuzinda. ³ Njibajira ntyo bulala barhenji Darha, nani barhanyinji. ⁴ Nababwirir'ebyola, okuba amango akasanzi kabo kayinja, nji muyibuke oku nalibabwirire byo. Ntababwiraga oku murhondero bulala naliri haguma nenyu. ⁵ S'aliko nkola naja emwo wantumaga na nta muguma ondoseze: Gahe waja? ⁶ Bulala nababwirir'ebyo, omugayo gwanyunjwire emirhima yenyu. ⁷ Aliko bamubwira eby'okuli: Bulibunguke bwenyu ngende, erhinakaba ntagendere, Muka ochere arhayinja; aliko eyi nakagenda nabarhumiraye . ⁸ Naye amango nayinja, nji yemeza Egulu oku biyerekez'echaha, neby'okuli n'ebiyerekez'olubanja. ⁹ Oku biyerekere echaha bulala barhanyemeraga. ¹⁰ Okubiyereker'okuli bula naj'emwa Darha, murhanachimbona, ¹¹ oku biyerekez'olubanja bula mwami w'egulu achirirwe olubanja. ¹² Nchigwerh'emyanzi minene y'okubabwira s'aliko murhakagala kuyiheka buno. ¹³ Amang'omurhulirizi ayinja, ye Muka g'okuli nji abalogolana omu kuli koshi. Bulala nj'aderha byoshi ayunvirhe, n'okubabwira ebyachiyinja. ¹⁴ Nj'ankuza bula nj'arhola ebiribyani, anababwira byo. ¹⁵ Ngasi choshi Darha ajira chiri chani, chochirhumire na kubwira oku nji arhola ebyani anababwira. ¹⁶ Kandi kasanzi katyu murhachimbona, na kandi kasanzi katyu mwambona, bulala nkolija emwa Darha. ¹⁷ Aliko, baguma omu bigirizwa bage, babwirana: babwirana, mwazi guchi ogu ali aderha, kasanzi katyu, murhachimbona na kasanzi katyu mwambona, bulala nkolija emwa Darha? ¹⁸ Baderha k'okuderha guchi oko, kandi kasanzi gatyu? Rhurhamenyire ebyali aderha. ¹⁹ Yesu aber'amenya oku balonza oku mubaza ababwira: charhuma mwabazana mwenyine oku mwenyine: kasanzi katyu murhachimbona na kasanzi katyu mwambona. ²⁰ Okuli, okuli mbabwirire, nji mwalaka nji mwanachiduduma, Alikw'Egulu nji lyasima. Nenyu nji mwagaya, alik'omugayo gwenyu, nji gwahindamuka bushagaluke. ²¹ Omukazi nka kola burha anaba omu malumwa bula akasanzi kage kamageraho, aliko erhi aburha anayibirira enyanya y' obushagaluke na bula amahira omuntu omw'igulu. ²² Nantyo buno muli omu malumwa, aliko nji nababona kandi, n'emirhima yenyu yanashagaluka, nantaye wakabanyega obo bushagaluke bwenyu. ²³ Olo lusiku, murhakambaza mwazi, okuli ,okuli, mbabwirire mwabo ngasi choshi'nji mwahuna Darha okw'izino lyani 'nji mwachihabwa. ²⁴ Kugera buno, ntacho muzihuna okw'izino lyani. Muhune mwahabwa, obushagaluke bwenyu bube bw'okuli. ²⁵ Nababwirire eyi myazi oku migani, aliko akasanzi kayinjire amango ntakachibabwira omu migani aliko nji nababwira okuli kwa Darha. ²⁶ Olo lusiku, nji mwahuna okw'izino lyani, ntanababwirire oku nji nahuna Darha enyanya zenyu. ²⁷ Bula Darha yenyine abasima, bulala mwa nsimire, na bulala mwanyemerere oku narhegag'emwa Darha. ²⁸ Narhegag'emwa Darha nayinja omugulu, bunola nkola rhega omwigulu n'okuj'emwa Darha. ²⁹ Abigirizwa bamubwira, lero oderhere okunali buzira migani, ³⁰ rhukola rhumanyire oku oyinji ebi byoshi, orhagwerh'enyifinjo z'omuntu yeshiyeshi oku kubaza. Chochirhumire rhuyemerere oku warhegag'emwa Nyamuzinda. ³¹ Yesu Abashuza: Mwajire mwa yemera lero? ³² Lola, akasanzi kayinjire kanali, mukola kushandazwa buli muntu olwage lunda nji mwandeka yenyine, aliko ntali yenyine bula Darha ali haguma nani. ³³ Mbabwirir'ebyo byoshi mpu yimuba n'omurhula enyanya zani. Mwaba na malumwa mw'eri gulu' aliko muchihangane, bulala nahimire Egulu.