¹ Kipin tigo Kutelle masin nafo abura kulidi alenge na iwa yiru ti pitilla i nya udun di zuru nin kwanyana nkifu kudan. ² An wa taun nanya mine wa di alalang, an wa taun yita jijing. ³ Kube na abura alalangye wa yiru tipitilla mine na iwa yaun nmon nuf ugang ba; ⁴ Inung abura ajijingye wa min amon abo nnuf ugang. ⁵ Nene na kwanyana kifu kudangye wa molu kubi, vat mine gbishizino i tunna nmoro. ⁶ Nanya kiitik kitik, ilanza ntet, yeneng, kwanyana nkifu kudangye! Nuzun udas idi zuro nangye.' ⁷ Abura ane tunna ifita vat i ngaatizina tila tipilla mine. ⁸ Alalangye woro na jijijngye, fulonnari nnuf mine bara tipitila bite din cinu ubicu.' ⁹ Inung ajijigye kawa nani i woro, Tidin yenju na mima batiinu nari ligowe na ghinu ba, nbara na can kiti nanan lessu idi seru min mine. ¹⁰ Na inuzu ucin dun di serue, kwanyanan kifu kudane da, inung alenge na iwa di nin nimon mine vat pira kitin teru nilugme nan gye, ¹¹ kimal nane inung aleli abura da iworo, Cikilari, Cikilari, puno nari kibulung.' ¹² Akpana a woro, 'kidegenere ndin bellu minu, na nyiru minu ba. ¹³ Sun uca bara na i yiru lirei sa kubi nsame ba. ¹⁴ Umasin nafo kube na unit din cinu ucindu imon nmin; ayicila a cinme a kosso nani imon nacara me. ¹⁵ Umong anagye ti talents ti taun, umong anagye iba, umong tutung anagye tirum, kogha aw nigye cot nin likara m, anin nya udun cinme. ¹⁶ Na nin molu kubi ba, unan nitaune nya, adi kpliza acara mun, ase imon itaun kitene. ¹⁷ Nanere wang ame ulenge na awa seru iba wase imon iba kitene. ¹⁸ Ame ulenge na awa seru firume wa nyagye, adi wuzu kuwu nanya kutii, a nyeshe ikurfun ncikilari me ku. ¹⁹ Na kubi nkata gbardang cikilari na cin ane kpilla, ada batiza ikurfun me nan ghinu. ²⁰ Kucin kongo na kuwa seru itaun da ada kurtuno imon itaun kitene; a woro, cikilari, uwa nii ti talents ti taun. Yene, nna se ukpinu nimon itaun kitene. ²¹ Cikilari me worogye, gaja kang nin katwa, kucin kugegeme nin lidu licine! Usu lidu licine nanya nimon cing. Meng ma tifin yenju nimon gbardang. Pira nanya liburi libo ncikilarife. ²² Kucin kongo na kuwa seru iba da ada woro. 'Cikilari, uwa nii iba. Yene, nse ukpinu nton ti talents tiba kitene! ²³ Cikilari me worogye, 'gaja kang ni katwa, kucin kugegeme nin lidu licine! Usu lidu licine nanya nimon cing. Meng ma tifi uyenje imon gbardang. Pira nanya liburi libo Ncikilari fe. ²⁴ Kunin kucing kongo na kuwa seru firum da ada woro. 'Cikilari. Men yiru fe unit ulenge na idin kpilizu fi ba: udin pitiru kiti kanga na ubilisa ku ba, udin bassu kiti kanga na ukpewu ku ba. ²⁵ Meng wa lanza fiu, nmini wa do ndi nyeshe fi talent fe nanya kutyen. Yene, kutura fe kongo. ²⁶ Cikilari me kawa aworogye, fe kucin nla liburi ni kugballa, fe yiru ndin pitiru bkiti kanga na nna bilissu ku ba nbassa ki kanga na nna npui ku ba. ²⁷ Uwanani ukpilizu nacara nin nikurfu, kubin sa nigye nwa seru ikurfun nigye nin nmyen kitene. ²⁸ Bara nani seren fi talente kitime ini ulenge na adi nin ti talents kulidei. ²⁹ Vat nle na adi ni nimon, ima kpingye ku gbardan. Ame ulenge na adu mun ba, ilenge na adumune wang ima seru. ³⁰ Gbudulnong inin tecu kucin kuhem kone i filing nanya nsirti mi bibit, kikanga na ama su kuculu nin nyakku nayini ku. ³¹ Kubi kongo na Usaun Nnit ma sa nanya ngongong ligowe nin nono kadura me, ama so kutet ngongong tigo me. ³² Ima nin pitirunu anit timyin timyin vat nbun me, ama nin wucu anite ngangaang, nafo na unan libya asa akoso akam nanya niyiin. ³³ Ama ciu akame ncara ulime me, a niyine ncara ugule. ³⁴ Ame Ugowe mani nin woru na lenge na idin cara ulime me, Daan, anung anan mmari Ncifning, leon ugadu kipin tigo kanga na iwa kyeminu mun, nworu kubi ntunun nyii. ³⁵ Bara na nwadi nin kukpon, inayi imonli; Nwadi nin kotu nayi inayi nmyen nsonu; Nwadi limari ipiri kutii; ³⁶ Nwadi fisere, ishoni imon; Nwadi nin konu ida lissai; in yita licin ida kitinigye. ³⁷ Inung anan katwa kacine ma kawu i woro, 'Cikilari, ninshiyari tiwa yenefi nin kukpong tinafi imolin? Sa nin kotu nayi tinafi nmyen? ³⁸ Sa inweri tina yenefi limara, tinafi kutii? Sa fisere tishonfi imon? ³⁹ Sa nishirari tina yenefi nin konu, sa licin tida kitife? ⁴⁰ Ame Ugawe ma kawu aworo nani. Kidegenere idin bellu minu, imon irika na ina su unit urum nanya na bebene linuananing, myeri ina sui. ⁴¹ Ama woru alenge na idin cara ugule me, cancanan kuponing, anung anan tin nnu, pira nanya nla sa ligan ulenge na ina kye unin bara shintan ku nin nanan kadura me, ⁴² bara na nwadi nin kukpon na inayi imonli ba; Nwadi nin kotu nayi na inayi nmyen ba. ⁴³ Nwadi limari na ipiri kutii ba; fisere na ishoni imon ba; nin konu a kutii licin, na ida lissai ba. ⁴⁴ Inung wang ma kawu iworo, 'Cikilari, tiwa yenefi nweri nin kukpon, sa nin kotu nayi, sa limara, sa fisere, sa nin konu, sa kutii licin na tisufi imonmong ba?' ⁴⁵ Ame manin kawu nani awor, 'kidegen idin bellu minu, bara na ina su ko unit urum nanya nabebene alele imon irum nanya ni lenge imone ba, myeri na ina sui ba'. ⁴⁶ Inung alele ima nyiu udu piru nanya nniu unsa lingang a inung anan katwa kacine udu nanya nlai unsa ligang"