¹ Yesu nuzu nanya kutii nlira a tunna ncin me; non katwa me da kitime ida dursoghe makeke kutii nlira. ² A kpana aworo nani, na anung din yenju ile imone vat ba? "Idin bellu minu kidegen, na litala lirum duku longo na ima sunu kitene ilong sa ukpiliwu ba." ³ Na aso likup in Zaitun, non katwa me da kitime likot iworo. "Belle nari, ile imone mayitu nishiyari? Iyaghari ma dursu udakfe nin nimalin inyii? ⁴ Yesu kpana aworo nani. "Yenjen umon wa rusuzu minu. ⁵ Bara anit gbardang ma dak nin lissa ning; ima woru 'myari Kristi', tutung ima rusuzu anit gbardang. ⁶ Ima lanzu ubeleng likum nin liru likum; yenjen ayi mine wa fita, bara ilenge imone ma dak gbas a na imaline nsa da ba. ⁷ Bara nmon min ma fitu nivira nin mon min, tigo kitene ntong tigo. Ima su akpon nin hirtizu nmyen niti niti. ⁸ Vat ninlenge imone ma yitu ucizunu nniuwari. ⁹ Tutung ima nin nakpu minu nacara na lenge na ima timinu ineo, imolsu minu. Uyii vat ma nari minu bara blissa ning. ¹⁰ Anit gbardang ma tirzu inin lessu ati. ¹¹ Anan bellu liru nin nuu Kutelle kinu ma fitu gbardang, iba wultunu anit gbardang. ¹² Bara na likara linanzang bati gbardang usu nanit ma ti camcam. ¹³ Vat ulenge na a tere kibinayi nanya neu udu imalne, amere ma se utucu. ¹⁴ Ule uliru umang nbelleng kipin tigo Kutelle ima su unin nyii vat unan so kutuf kunba timin timin vat; imaline ma nin dak. ¹⁵ Nene asa iyene adadu an fiu, alenge na Daniel unan liru nin nuu Kutelle wa bellin, yissin nanya kiti kilau, (na unan bellu niyerte yinnin). ¹⁶ na alenge na idi in Yahudiya cum udu akup. ¹⁷ na ame ulenge na kitene kutii kitene nwa tolu adi yiru imonmong nan nya kilare ba. ¹⁸ ame ulenge na adi kunen na awa kpilin kilari ada yiru ugudun ba. ¹⁹ Ushe nawani alenge na ima yitu nin naburi, nin nalenge na ima yitunmazunun nono kubi kone! ²⁰ Sun nlira na ucum mine waso nin kubi likus sa liri na Sabbat ba. ²¹ Bara uniu ma yitu kang, umusun lenge na isa su unin ba tun ucizunu inyii udak kitimone, ana imakuru isu umusun nnin ba. ²² Sasa na ima canu ayiri ane ba, na unit wase utucu ba; bara alenge na ina fere, inani ma canu ayiri ane. ²³ Asa umong woro minu, yeneng Kristi ule; sa a "Kristi uni" na iwa yinin ba. ²⁴ Anan kinuu nKristi nin nanan liru nin nuu Kutelle kinuu ma dak isu imon fiu izikiki gbardang, iwultun anit libau, umunu wang alenge na imal ferui nani. ²⁵ Yenen nbellin minu a kubi dutu sa udak ²⁶ Bara nani, iwa bellin minu, "yenen, Kristi di nanya kusho," na iwa nuzu udue ba, iwan woro minu, adi nanya kutii limot, na iwa yinin ba. ²⁷ Nafo na umalzinu kiti asa unya kusari kitene udu kadas, nanere wang udak in Saun in Nit ma yitu. ²⁸ Kikanga na libi nonku kikanere agbulluk ma pitirnu ku. ²⁹ Kimal na leli ayiri nniuwe uwui ma siriu, na upui mani nkanang me ba, iyini ma dissu unuzu kitene kane, akara kitene kani ma zullunu kidowo. ³⁰ Udursu kulap ndak in Saun in Nit ma nuzu kanang kitene kani, vat tilem inyii ma su tiyom. Ima yenu Usaun Nnit din cinu nanya nawut kitene kani nin likara a ngogong midya. ³¹ Ama nin tu nono kadura me nin liwui kulangtung kanan, inung manin pitirunghe anit alau me na sari anas vat kiti kirum, unuzu nlo ligang kitene kani udu loli liganghe. ³² Sen uyinu nimoimon kiti kuca kupau. Asa ulang in nutuno tifa tipese, yinnon kussik nda susut. ³³ Nanere wang, asa iyene ile imone, yinnon nworu a daduru, adi susut nin kibulunghe. ³⁴ Kidegennere nbellin minu, na ko kuje ma katu ba, se ilenge imone nse ukulu vat. ³⁵ Kitene kani nin kadas ma katu, a na uliru ning ma katu ba. ³⁶ Ubellen nwui une nin kube na umong yiru ba, umunun inung nono kadura kitene kane, sa Usaunne, Uciffere cas yiru. ³⁷ Nafo na ayirin Nuhu wadi, nanere ma yitu udak Nsaun Nnit. ³⁸ Nafo aleli ayirin kulu nmyen inye wa dutu sa udak iwa din li iso, ipilla awani a iniza a shono mine nilugma udi duru lire na Nuhu wa piru uzirge, ³⁹ na iwa yiru imoimon ba nmyene da kulo uye umila nani, nanere ma yitu udak Nsaun Nnit. ⁴⁰ Ima se anit naba kunen; ima yiru unit urum, i sun urum. ⁴¹ Awani aba mayitu tiyazun; ima yiru urum, isun urum. ⁴² Nanya nani sun lisosin nca, bara na iyiru liri longo na cikilari mine ma dak ba. ⁴³ Yinnon ulele, Cikilari nwa yiru kubi kongo na ukiri din cinu, ama su uca na ama yinnu i puro kilae ipira ba. ⁴⁴ Nanere anung wang imasu uca bara Usaun Nnit ma dak kubi kongo na ima yiru ba. ⁴⁵ Ani ghari kucin kone kujijing, na kuyina cikilari me tighe in yenju ngame, anan niza nani imonli mine nanya kubi dert? ⁴⁶ Unan nmari ari kucin kone, ulenge na cikilari me ma dak ada seghe nsu nani. ⁴⁷ Nbellin minu kidegene cikilari une ma tardughe kitene nvat nimon ilenge na a dimun. ⁴⁸ Andi kucin kunanzang nworo nanya kibinei me. Cikilari nigye ndandauna; ⁴⁹ anin cizin ufo nadon licinme, anin li aso nin nanan so nadadu, ⁵⁰ Cikilari kucin kone ma dak liri longo na kucin kone nceo kibinei ku ba, ⁵¹ Cikilari me ma kifigye a fogye anin ceo gye urume nan nanan rusuzu nati, kikanga na kuculu mayiti ku nin nyakku nayini.