¹ Kube na Yesu wa malu ubellu nliru une vat, a woro nono katwa me. ² "iyiru upaska nlawa ayiri abari cas, ima nakpu Usau Nnit ikotinghe kitene kuca." ³ Ugo na Priest nin nakune nbun nanite wa da pitirin kiti kirum kudaru Ngo na Prieste, ulenge na iwa yirughe nin lissa Kefas. ⁴ Ligowe ipizira tibau nworu ikifo Yeso ku imolughe likire. ⁵ Iwa din bellu, " Na kubin idi paska, bara iwa fya anite ayi." ⁶ Kube na Yesu wa di in Baitanya ngan Simon ukutulu, ⁷ na awa sossin kiti nli nimonli, umong uwani da kitime nin libo nnuf kunya kumang min nikurf gbardang, a kpilya minin litime. ⁸ Na nono katwa me in yene nani, ayi nana nani i woro, "Nyaghari finu nka kimole? ⁹ Iwa lewu mini nin nikurfu gbardaang ikoso nikimon." ¹⁰ Yesu nin yiru nane, a woro iyaghri nta idin bukuru nwani ulele kibinayi? Bara asuyi katwa kacine. ¹¹ Idi ligowe nan nikimone ko kome kubi, na meng ma yitu nan ghinu ko kome kubi ba. ¹² Ule ukpilyu nnufe kidowe na asuyi, asu nani a kelei bara ukassu nigha. ¹³ Nbelin minu kidegen, kiti kanga na ima su ulenge uwaze ku nanya lenge uyeh vat, imon ilenge na uwani ulele nsu ima bellu unin inan lizino nighe. ¹⁴ Umong nanya likure, ulenge na iwa yicughe Yahuda Iskaroti, ado kitin Ngo na Priest ¹⁵ aworo, "Imashinari ima ni meng nakpa minu ame?" Ibataghe azurfa akut atat. ¹⁶ Atunna ipizuru ndina ule na ama nakpu nani ame. ¹⁷ Lirin ncizunu nli fungal nsalin muccu, nono katwa me da kitime iworoge, "Weri udi nin su tidi kyele bara uli npaske?" ¹⁸ Aworo, "Can kitin mon unit nanya kipine iworoghe, 'Cikilari nworo, "kubi nighe nda duru. Meng ba su upaska ngafere ligowe nin nono katwa nighe" ¹⁹ Nono katwawe su nafo ubellu me, I kyele imonli Npaske. ²⁰ Na kubi kuleleng nta, aso ama li ligowe nin nono katwa me likure. ²¹ Idi nanya kilewe, aworo, "Ndin bellu minu kidegen umon nanya mine ma lewui." ²² Ita aburi asirne kang, kogha nanya mine tiringhe, sameri Cikilari?" ²³ Akawa aworo, "ulenge na adin sho ncara kishik kirume nin mi amere ma lewui. ²⁴ Usaun Nnit ma nyiu nafo na ina yerti litime. Kash nnit ulenge na ama liwu Usaun Nnit! Uma katinu unit une nin caut na iwa na marughe ba." ²⁵ Yahuda ulenge na amere ma lewughe woro, "Sa menghari unan dursusu niyerti?" Aworoghe, ubelle nin litife." ²⁶ Na iwa di kilewe, Yesu yauna ufungal, ata nlira ku, a pucco unin. Ana nono katwa me unin aworo, "Seren, leon. Kidowo nighari." ²⁷ Ayauna kakkuke ata nlira ku, a nakpa nani aworo, "Sonon, vat mine. ²⁸ Mone nmii nalikawali nigharibmongo na ina gutun bara gbardang na se ukusu nalapi. ²⁹ Ndin bellu minu, na nma kuru nsono nmyen kumat kuce ba, se loli lire na nma sonu minin mipesse nan ghinu nanya kipin tigo Ncif ning." ³⁰ Na ita avu nimalin, inuzu inya ucindu likup in zaitun. ³¹ Yesu woro nani, "kyitik kane vat mine ma tiru bara meng, bara ina nyerti,'nma kpui unan libyawe ligo nakame ma malu kiti.' ³² Vat nani asa ifyyi, nma nyiu ubun mine udu nanyan Galili." ³³ Bitrus woroghe, " Andi vat min ba diu bara fewe, na meng wasa nma tiro nsunfi ba." ³⁴ Yesu woroghe, meng din bellufi kidegen, nin kyitik kane kukulok mayitu kusa kolsino ba, uba woru na uyiri ba so titat." ³⁵ Bitrus woroghe, Andi ma mma ku ninfi gbas, na nma narifi ba." Ngisin nono katwa me vat belle nanare wang. ³⁶ Yesu tunna a nya ligowe nanghinu udu nkan kiti na idin yiccu kinin Ugetsemani a woro nono katwa me, "Son kikane meng do kikani ndi ti nlira." ³⁷ A yira Bitrus ku nin na saun Zabeden ligowe nanghe atunna a cizina usirzu nayi, ayime nana. ³⁸ A tunna a woro nani, "Liburi nin siro bibit, nafo nku. Son kikane i yenje kiti nan mi." ³⁹ A cancana udu ubun bat, a deo nin nalung ata nlira, a woro, "Ucif ning, andi uwasa uso nani, na kakukkane kata kiti nighe. " Vat nani, na ubellu nighe ba, ubellu fere." ⁴⁰ Ada kiti nnono katwa me ada se nani nmoro, a woro, a woro Bitrus ku, "inyaghar, na uwasa uyenje kiti nin mi kutanki kurumba? ⁴¹ Yenjen kiti isu nlira bara iwa piru nanyan dumuzunu. Uruhe yinna, kidowere dinin likara ba." ⁴² Ado tutung unba adi ti nlira, aworo, "Ucif ning, andi na uwasa ukata nani ba se nsono uning, na ubellu fere so." ⁴³ Ada tutung ada se nani idin moro, bara iyizi mine wa ti getek nin moro kang. ⁴⁴ Akuru a nya tutung, adi ti nlira uti un tat a belle uliru urume. ⁴⁵ Yesu da kitin nono katwa me aworo nani, "Idu nmoro nin shinua? Yeneng, kubi mal da duru, imal lewu Usaun nnit nacara nannan nalapi. ⁴⁶ Fitan nari ti nya. Yenen ulenge na aba lewiye nda duru." ⁴⁷ A dutun nlirue, Yahuda, umong nanya mine likure da. Ligozin gbardang wa di ligowe ninghe unuzu kiti ngo na priest nan nakune nanite. Ida nin na sangali nan tica. ⁴⁸ Nene unit ulenge na amere ma lewu Yeseku wa tinani udursu, aworo, "Ulenge na in nyukkunghe, amere kiffonghe." ⁴⁹ Ata mas ada kitin Yesu aworo, Ndin lissufi una dursuzu ninyerte! A nyukunghe. ⁵⁰ Yesu woroghe, "Udondong su imong irika na uda nsue." Inughe tunna ida, i kiffo Yesu ku, i nya ninghe. ⁵¹ Umong nanya nalenge na iwa di ligowe nan Yesu tunna a nakpa ucara me, a shuku kusangali, a kowo kucin Ngo na Priest, a weringhe kutuf. ⁵² Yesu tunna aworoghe, kpilla ushon kusangali fe kuparinme, bara vat nalenge na idin molsu nin na sangali iba molsu nani nin na sangali. ⁵³ Udin yenju na meng wasa in yicila Ucif ning, a toyi nin nono kadura me a lenge na ima katunu amui akut atat nin kutocin ba? ⁵⁴ Ani iba ti iyizari uliru Kutelle kulo, nworu unan so nani gbas?" ⁵⁵ Kubi kone, Yesu woro ligo nanite, "I da nin na sangiali nan tica ida kifoi nafo ukirya? Ndin sozu ndursuzo anit nanya kutii nlira kolome liri, ana i kiffoi ba. ⁵⁶ Vat ilenge imone so nani iyerte nanan liru nin nu Kutelle nan kulo." Nono katwa me tunna isunghe ico. ⁵⁷ Alenge na i kiffo Yesue ku nya nighe udumun kiti Kefas ugo na Priest kikanga na anan niyerte nin nakune wa pitin ku ligowe. ⁵⁸ Bitirusa cas wa dortughe kidun piit udu kudaru nwuccu nliru ndya kutii nlirie. A wa piru nanya a so ligowe nin nan ca ayene inyaghari iba su ninghe. ⁵⁹ Nene udya kutii nlirie nin nanan kpilzu me vat pizira uliru bellu litime na ise Yesu ku nin kulapi, bara inan se finu nliru imolughe. ⁶⁰ Na iwa se uliru ba, vat nin nan liru kinuwe na iwa da ida su. kimal nani among naba da ⁶¹ I woro, "Unit ulele wor, meng wasa npuco kutii nlira Kutelle nkpila nke kunin nanya nayiri atat." ⁶² Udya kutii nlire fita ayisina, aworoghe, "na udin liru ule na uma kpanu ba? Inyaghari ilele idin bellu litife?" ⁶³ A Yesu yita nin kutike. Udya kilari nlira woroghe, "Ndifi kucukusu nin Kutellen lai, belle nari sa fere Kriste, Gono Kutelle." ⁶⁴ Yesu kawaghe, "Ubelle nani litife. Meng bellinfi nene, udu ubun uma yenu Usaun nnit sossin ncara ulime un likara, adin cinu kitene nawut kitene kani." ⁶⁵ Udya kilari nlire marya kulutuk me aworo, "A zogo Kutelle. Iyaghari nta tutung ti kuru ti du nin su nmon uliru? Yeneng nene anung lanza tizogoe. ⁶⁶ Iyaghari idin kpilizue?" Ikawaghe i woro, "Abatina ukul." ⁶⁷ Itufuzunghe ataf nmoro, ikuru iruzoghe, ifoghe tutung nin nacara mine, ⁶⁸ I woro, "Sunari anabci fe Kristi. Ame ghari ulenge na a riofi?" ⁶⁹ Kubi kone, Bitrus wa sossin ndas nbun kutii nwuccu nlirue, nkan kabura kucin da kitime a woro. "Fewang di ligowe nin Yesu Ngalili." ⁷⁰ Ata amusu kun nbun mine vat, aworo, "Na meng yiru imon ilenge na udin liru kitene ba." ⁷¹ Na anuzu udu kibulung, nkon kubura kucin ugan tutung yeneghe a woro alenge na iwa di kitene, "Unit ulele wang wa di ligowe nin Yesu Nnazaret." ⁷² Akuru ata amusu ku tutun nin nisiling, "Na in yiru unite ba." ⁷³ Nin kubiri bat, alenge na iwa yissin kitene da ida woro Bitrus ku, "Kidegenere, fe wang umong nanya minere, bara lilemfe ndursofi." ⁷⁴ Atunna a cizina izogo nin nisiling, "Na in yiru unitte ba." Na nin dandaunu ba, kukulok kolsuno. ⁷⁵ Bitrus lizino ulire na Yesu nin bellinghe. "Kukulok mayitu kusa kolsuno ba, uma ti umusun yiru nin titat." A nuzu ado udas adi gilu kang.