¹ Nanya kubi kone, Firauna lanza ubeleng Yesu. ² Aworo nono katwa kilari me, "Ulele Yohanna unan shintuzunu nanit mmyena; ana fita nanya na nan kule. Unnare nta adi nin na kara nsu nna nitwawe." ³ Hiridus wa kifo Yohanna ku, a tere gbe, a ceo ghe nanya kilari licin bara Herodiya, uwani ngwana me Filibus. ⁴ Bara Yohanna wa belinghe, "Na uma caunu ba uyiru ghenafo uwani fe." ⁵ Hiridus wa molu ghe, ama awa lanza fiu nanit bara iwa yirughe nafo unan liru nin nuu Kutelle. ⁶ Na lirin marun Hiridus wa kuru likeo lida, ushonon Herodiya su avu kiyitik nanit a puo Hiridus ku ayi. ⁷ Ame wang poa ghe ayi, a ceo ghe uliru nin nisilin nworu vat nimon ile na atiringhe ama nighe. ⁸ Na unene ndi kyeghe ulirue, a woro, "Nai kikane, kukurum, litin Yohanna unan shintu nanit mmyen." ⁹ Ugowe ayi ine wa fita kan nin tirinu me, amma bara isiling me, tutung bara alenge na iwa di lni nimonle vat ninghe, ato idi so nani. ¹⁰ A to idi werin litin Yohanna nanya kilari licine. ¹¹ Itunna ida nnun lite nanya kukurum ina kubure ina kubure ado adi ni uanme. ¹² Nono katwa me tunna ida, iyira libie, idi kassu linin. Kimal nani, ido idi bellin Yesu ku. ¹³ Na Yesu nlanza nani, ama suna kitene nanya nzirgin mmyen ado nkankiti likot. Na ligozi nanite nlanza nani, i nuccu nipiin pin mine nin nabunu i dofinghe. ¹⁴ Yesu yunna ada ubun mine a yene ligozi nanit. Alanza nkune kunemine a shizino nin na nan tikonu mine. ¹⁵ Na kuleleng nta, nono katwa we da kitime i woro, "Kiti kane di nin nanit ba, tutun kuleleng nta. Suna anite inya, inan se iducu nanya nigbiri idi sesu atimine imonliku." ¹⁶ amma Yesu woro nani, "Na ucaun inya ba. Anung nan nani imonmong ili." ¹⁷ I woroghe nenge, "Kikane tidi nin fungal utaunari cas nin nibo iba." ¹⁸ Yesu woro nani, "Dan nani inin." ¹⁹ Yesu woro ligozi nanite isozo nkpi kutyene. A yauna ufungal utaume nin nibo ibe, a yene kitene Kutelle, ata nkoli ku apuco unin anin na nono katwa we unin, nono katwa we ani wani ligozi nanite unin. ²⁰ Iwa li vat ishitizo. Inani wa pitiru ngissin nimon ile na iwa nazu nfungale nin nibowe-akuzun likure tinap gbem gbem. ²¹ Alenge na iwa li wa di nafo nanilime amui ataun, kimal na wani nin nono. ²² Ata nono katwa we ipira nanya nzirga mmyen i kafina uleli uwul kurawe, ame nin man ti ligozi nanit inya. ²³ Kimal na ata anitee inya, aghana kitene likup ussan me adi ti nlira. Na kulelen nta kang, awa lawa kitene ussan me. ²⁴ Amma kubi uzirgi mmyene wa yita kiyitik kurawe, iwa nin pya kang nin lin nin zirge bara fibark mmyene nin furu na uwa kurtuzun nani. ²⁵ Nin nikoro inas nin kiyitik Yesu da kitimine, awa din cin kitene mmyene. ²⁶ Na nono katwa we in yene ghe adin cinu kitene mmyene, ilanza fiu i woro, "Ilele mmolyari," Itunna in tizun tet bara fiu. ²⁷ Yesu tunna a lirina nan ghinu a woro, "Tan ayi akone! Menghari! Na iwa lanza fiu ba." ²⁸ Bitrus kawa ghe aworo, "Cikilar, andi fere, ta meng ku ndak kitife nin cin kitene mmyene." ²⁹ Yesu woroghe, "Da." Bitrus tunna anuzu nanya nzirge acina kitene mmyene ucin du kitin Yesu. ³⁰ Amma na Bitrus in yene ufunu, fiu kifoghe. Na a cizina upicu nan nya mmynenen a ta kuculu a woro, "Cikilari, tucui." ³¹ Yesu tanna anakpa ucara me mas, a kifo Bitrus ku, a woroghe neng, "Fe unan yinnu sa uyenu bat. Iyaghari nta umini a jirjir?" ³² Na Yesu nin Bitrus npira uzirge, ufunue yissina. ³³ Nono katwa we nanyan zirgin mmyene su Yesu ku usujada, iworo, "Kidegenere fe usaun Kutelleari." ³⁴ Na ikaffina uleli uwul kurawe, i tolon Janisarata. ³⁵ Na anit kiti kane in yinno Yesu ku, isa kadura udu nigbiri nanga na kilin nani, idi pilu anan ti kunu vat ida mun kiti me. ³⁶ I foghe acara nworu na ise idu do kulada kulutuk me cas, vat ngbardang nanit alenge na iwa dudo kunin wa se ushinu.