¹ Among a Farisawa nin na nan ninyerte ds kitin Yesu in Urushalima. I woro, ² "Iyaghari nta nono katwa fe din nanzu utandu na kune? Bara na idin kuzu acara mine ba andi ima li imonli." ³ Yesu kawa a woro nani, "Anung wang-iyanghari ntaa idin patulu uduka Kutelle bara utanda mine? ⁴ Bara Kutelle na woro, 'Ta ucife nin na fine ku gongong,' tutung, 'Ame ulenge na ashu uliru unanzang liti ncife sa nna me, Kidegene aba ku.' ⁵ Amma anung ani na woro, 'Vat nlenge na a woro ncif me sa uname, "Vat ubuunu ulenge, na una seru kiti ning nene ufilluari udu kiti Kutelle,"' ⁶ na unit une caun ati ucife gongong ba. Nanya nloli libowe unanza uliru Kutelle bara utanda mine. ⁷ Anun an rusuzu nati, gegememiari Ishaya na liru nin nuu Kutelle nati mine na awa woro, ⁸ 'Anit alele din tizui gongong nin nakpa tinuu minere, amma nibinai mine di pit nin mi. ⁹ Idin su usujada lemmari, amma idin dursuzu adadu nduka nanittari. ¹⁰ Atunna ayicila ligozi nanite udak kitime a woro nani, "Lanzang iyinin- ¹¹ Na imon mong diku na asa ipira unuu din nanza unit ba. Amma imong ilenge na inuzu nnuu nnit nnare din nanzu unit." ¹² Nono katwa we dak ida woro Yesu ku, "Uyiru nworu Afarisawa nin nana ayi na ini lanza uliru une?" ¹³ Yesu wa kwan a woro, "Vat kuca kongo na Ucif nighari nbila ba iba dusulu kunin. ¹⁴ Sunan nani usan min, anan durusuzu nanitari liboo amma aduu. Asa unit uduu nwanno uduu Liboo vat mine ma di diu nanya kuu." ¹⁵ Bitrus kawa aworo Yesu ku, "Durso nari tinan tigoldo tone." ¹⁶ Yesu woro, "Anung wang duusa uyirue? ¹⁷ Na uyene nworu vat nimon ile na ipira nanya nnu maadi katu udu nanya kiti npunju ba? ¹⁸ Amma imon ile na inuzu nnuu ida unuzu kibinaiyari innare imon ile na idin nanzu unit. ¹⁹ Bara unuzu nanya kibinaiyari ukpilizu unanzang din nucu ku, umolsu nanit, upiziru nawani, kaput ndinong, likiri, ushaida kinnu, nin tizogo. ²⁰ Ile imonere din nanzu unit. Amma uli nimonli sa utusu nacara din nanzu unit ba." ²¹ Yesu nya kikane ado kusarin Taya nin Sida. ²² Umong uwani na Kananiyawa nuzu kusari kone. A ta ntet a woro, "Lanza nkunekune nighe, Cikilari, usaun Dauda; ushono nin din sonu ngbada bara kugbergenu." ²³ Amma na Yesu nworo iyang ba. Nono katwa me da ida foghe acara, i woroghe, "Woroghe anyaa bara adin gbejullu kang kidung bite." ²⁴ Amma Yesu kawa nani aworo, "Na ina tuuyi kitin mon ba se kiti nakam uwulusu nnonon Israila." ²⁵ Amma ada ubun me a tumuno, aworo, "Cikilari, buuni." ²⁶ Akawa aworo, "Na ucaun i yiru imonli nnono ini nono ninau ba." ²⁷ A woro, "Nanere, Cikilari, amma nono ninuawe asa ileo ibure na asa disso kitene kutebul ncikilari mine." ²⁸ Yesu kawa aworoghe, "Uwani, uyinna sa uyenu udyawari, na isu fi nafo nafe di nin suu we." Ushonoe uni wa tannun ashino kubi kone. ²⁹ Yesu uni wasun kiti kane anya udu kupo kurawan Galili. Amini wa ghana likup adi so ku. ³⁰ Ligozi nanit gbardang daa kitime. Iwa dak nan ghinu anan kentu, aduu, aturi nin na nan salin nabunu, nan na mong gbardang na iwa di nin tikonu. Ina ni wa ceo nani nabunun Yesu amini wa shin nin ghinu vat. ³¹ Ligozi nanite ani fiu wa kifo nani na iwa yene unan sali nabunu nshino, unan kentu din cin, uturi din liru a uduuin yenju kiti. Iwa zazin Kutellen Israila. ³² Yesu wa yicila nono katwa me kiti me aworo, "Nlanza nkunekune lipitin nanite, idi ligowe nan mi ayiri atat na idi nin nimonmon na ima li ba. Na idi nin su nworo nani inyaa sa uli nimon ba, Iwa dissu liboo bara kukpong." ³³ Nono katwa we woro ghe, "Tima se ufungal gbardang nweri kikanee na anit diku ba ubatin ligozin nanit alengen vat?" ³⁴ Yesu woro nani, "Ufungal umashiniari idi mun?" Iworo, "Kuzor nin nibo ibebene cin." ³⁵ Yesu woro ligozin isozo kutyin. ³⁶ A yauna ufungal kuzor nin nibowe, na ataa nliraa, apuco ufungalle ana nono katwa we. Nono katwa we naa ligozi nanite. ³⁷ Anite vat leo ishitizo. Ipitirino agissin niburi nimonle na ileo, ikulo akuzun kuzor. ³⁸ Alenge na iwa li wadi amui anas banin nawani nin nono. ³⁹ Yesu woro ligozi nanite inyaa, ame doo adi piru nanya nzirgi mmyen anyaa udu kusari Magadan.