¹ Lilonne Yesu wa nuzu nanya kilari ado adi so nbiu kurawa. ² Ligozi nanit gbardang da pitirino kitime, afita a pira nanya njirigi mmeyen a so ku; vat ligozie yissina licicin nbiyu kurawe. ³ Yesue bele nani iuliru bardang nin tinan tigoldo. A woro, "Yenen unan tibila wa nuzu tibila. ⁴ Da na a bilisa, imon imus disso likot libau, anyin tolo da ida leo inin. ⁵ Imon disso nanya napparang, kika na ise mmin ku gbardang ba. Na nin molu kubi ba inuzu, bara na mmine wadi pit ba. ⁶ Da na uwui nghana, ilo bara na iwa dinin tiling ba, itunna ikoto. ⁷ Imon imus disso nan nya nimart. Aca imarte kunjo i parda ining. ⁸ Imong imus disso mmin micine itaa iyip. Imong nkoli akalt akalt imong akut kutocin, a imong atat. ⁹ Ame ule na adi nin na tuf na a lanza. ¹⁰ Nono katwawe da ida woro Yesu ku, "Iyanghari nda usu anite uliru nin tinan tigoldo?" ¹¹ Yesu kawa a woro nani, "Anung ina ni minu uyinnu nworu iyinin imon izikiki kipin tigo kitene kani, amma kiti mine na ina nani ba. ¹² Bara kiti lenge na adimun, amere ima kpinghe ku, tutung ama nin yitu mun gbardang. Amma ame ulenge na a salin mu, kitime ima seru i cingilinghe na adi mune. ¹³ Bara nani ndin su uliru nan ghinu nin tinan tigoldo, vat nin yenju mine, na idin yenju gegeme ba, vat nin lanzu mine, na idin lanzu gegeme ba, ana idin yinnuzu ba. ¹⁴ Kiti mine anabcin Ishaya na kulo, ale na ana woro, 'Nanyan lanzu, ima lanzu, amma nanyan ko lome libo na ima yinnu ba. Nanyan yenju ima yenu, ama nanyan ko lome libo na ima se uyinnu ba. ¹⁵ Bara nibinai nanit alele na ti gotek, atuf mine ani nati getek nlanzue, iyizi mine ina tursu inin, Nsa nani ba se uyinnu nin niyizi mine, lanza nin na tuf mine se uyinnu ni nibinai minee, inin se utpillu tutung, meng ma ni nani ushinu.' ¹⁶ Amma imong koliari iyizi mine; idin yenju nin natuf mine, adin lanzu. ¹⁷ Kidegenere ndin belu minu, a anbawa gbardang nin na nan katwa kacine npizira iyene imon ile na idin yenju, amma na ina yene a, na yita nin su ilanza imon ile na ina lanza, amma na ina lanza ba. ¹⁸ To lanzan tinan tigoldo nnan tibuk. ¹⁹ Asa umong nlanza uliru kipin tigowe ana a yinno ba, ame kugbergenuere nda kuda bolo imon ile na ina bilisu nanya me. Amere ulenge na iwa bilsu ghe libo. ²⁰ Ame ulenge na iwa bilisu ghe napzmbara amere ulenge na awa seru uliru nin liburi libo dedei. ²¹ Vat nani na adi nin tiling tin liti me ba, amma awa yissin gangang nin kabiri bat. na uniu nin gbagba wa dak bara uliru ntucue, awa diu dedei. ²² Ame ulenge na iwa bili ghe nanya nimart, amere ulenge na awa lanza ulirue, amma adadu in yii nin karusuzo nimon in yii, ma pardu ulirue, ama so sa kumat. ²³ Ame ulenge na iwa bili ghemmin micine, amere ulenge na alanza ulirue amimin yinno unin, anere ulenge na a macca nono a pitirino ni nin bara kidegene; imon nkoli akalt akalt, imong akut akut kutocin, a imong akut atat." ²⁴ Yesu kuru a belle nani umon uliru nin tinan tigoldo. Aworo, "Kipin tigo Kutelle masin nafo unit ule na abilisa imus kine kunen me. ²⁵ Nin kitik na anit ndo nmoro, udon nivira me da ada bilisa kunya nileli imusse nanya kunene, anya udughe. ²⁶ Na i nuzu i kuno ita iyip, inin kunyawe wang nutuno ati. ²⁷ Nono katwa nnan kunene da ida woroghe, 'Cikilari, na imus in alkamari uwa bilisu kunen fe ba? Iyiziari nta amamu ketilin ku?' ²⁸ A woro nani, 'Unan nivirari nasu nani.' Nono katwa wwe worooghhe nenge, 'Udi nin su ti do tidi dussu anina?' ²⁹ Unan kunene woro, 'Nanere ba, iwa na do ndussu na manue, ima dussu alkame ligowe nin na mamue. ³⁰ Na vat mine kunjo ligowe uduru kubin pitiru kiti. Kubi npitiru kiti mma woru anan pitiroe, "Tun kalizan amamue itecu agum agum, idi juju, amma pitirinon alkane udu filai nighe."'" ³¹ Yesu kuru ana nanii umoon uliru nin tinan tigoldoe. A woro, "Kipin tigo Kutelle masin nafo fimus kuca kukuu na unit in yira a bila nan nya kunenme. ³² Fimus fonee finare fi bene nanya nimu vat. Amma uwa bilu fining fi kuno, ku katin vat naca nanya kunene asa kuta kuca kudya, asa anyin kitene kani da ida kye tido mine tilanghe." ³³ Yesu kuru a belle nani nton tinan tigoldo aworo, "Kipin tigo Kutelle masin nafo uyist ule na uwani nwa yiru a munu nanya nbulung ayangi atat asa mite hogogo mi ghana." ³⁴ Vat ni lenge imone Yesu wa belu ligozi nanite nin tinan tigoldo. Andi na nin tinan tigoldo ba na awa belin nani imon ba. ³⁵ Uwa so nani bara vat nimon ile na iwa belin kiti nanan liru nin nuu Kutelle nan so kidegen, na iwa woro, "Mma punu unu ning nin tinan tigoldo. Mma bellu imon ile na inyeshin uworsu kubi ncizunu nkye in yii." ³⁶ Yessu suna ligozi nanite a pira nan nya kilari. Nono katwa me da kiti me iworo, "Durso nari tinan tigoldo kunyua kunene." ³⁷ Yesu kawa a woro, "Ame ulenge na a bilisa inus in alkama Usaun Nnitari. ³⁸ Kunene uyii ulelere; a imus in alkama inughere nono kipin tigowe. Amamue annare nono nnan katwa kananzanghari, ³⁹ a unan nivire na ana bilisu inin kugbergenuari upitiru kiti unare imalin in yii, a anan pitiru kiti unare imalin in yii, a anan pitiru kiti inughere nono kadura Kutelle. ⁴⁰ Nafo na iwa pitirin amamue ijuju nanyan nla, nanere una so kubi nimalin in yii. ⁴¹ Usaun Nit ma tu nono katwa me, ima du idi pitirin imon vat na idi tizzu anit utazuna, nin na lenge na ina su nitwa ni nanzang. ⁴² Ima ta nani nan nya nla ugbagbai, kikanga na kuculu ma yitu ku nin nyaku nayini. ⁴³ Inung anan katwa kacine ma nin waltu nanya kipin tigo Ncif mine. Ame ulenge na adi nin natuf na alanza. ⁴⁴ Kipin tigo Kutelle masin nafo utamani na unyeshin nanya kunen. Unit wase unin a nyeshe unin. Nanya liburi libo me anya, adi lewu vat nimon ile na adi mun, a sere kunen kone. ⁴⁵ Tutung kipin tigo Kutelle masin nafo unit na adi kupatiki adin piziru filu'ulu'u icine kujama me. ⁴⁶ Na ase filu'ulu'u fi gegeme fin nikurfun idya, awa nya adi lewu nimon me vat a sere finin. ⁴⁷ Tutung kipin tigo Kutelle masin ukuma na iwa bworin nanya kurawa, a kifizo inawa mmyen ngangang ⁴⁸ Na uwa kulo, unan kifizu nibowe wunno unin likot udu ubiwu kurawe. ima nin so iferu inawa icine iti nanya nakuzung, amma imon i nanzaghhe ima fillu ining. ⁴⁹ Nanere uma yitu nin nayiri nimalin inyii. Nono kadura Kutelle ma dak ida feru anan katwa kananzaghe nanya na nan katwa kacine. ⁵⁰ Ima nin tu nani nanya nla unoiwu ugbagbai, kikanga na kuculu ima yitu ku nin nya ku nayini. ⁵¹ Iyinno ile imone vatta?" Nono katwa we woro ghe, "Tiyinno." ⁵² Yesu tunna aworo nani, "Nanere vatt nnan ninyerte na alawa gono katwa kipin tigo Kutelle a massin nafo unit ulenge na adi nin kilari, na a kaliza imon ikisse nin nipesse nan nya filai me." ⁵³ Kube da na Yesu nmala tinan tigoldo tone, anya asuna kiti kane. ⁵⁴ Yesu nya a pira nanya mmin me a tunna ndursuzu nanite nanya kutyi nlira, na ilanza fiu kifo nani i woro, "Unit ulele nse ule uyirue nin nimon izikiki ilele nweri? ⁵⁵ Na unit ulele usaun nnan kye nibulung unereba? Na unamere Maryamu ba? Na nwana nilime mere an Yakubu, Yusufu, Simon a Yahuda ba? ⁵⁶ Na nwana nishono mere vat di ligowe nan ghiruk kakane ba? Ani unit ulele nase ile imone vat nweri?" ⁵⁷ Iwa lanza ayi ninghe. Amma Yesu woro nani, "Na annabi diu diru ngongong ba se mmyin me nin na nan ngame." ⁵⁸ A na awa tizzu imon izikiki gbardang kikane ba bara udiru in yinnu mine.