¹ Bese labanye baFarisi netati temtsetfo beta kuJesu besuka eJerusalema. Batsi, ² ''Kwentiwa yini kutsi bafundzi bakho bangawahloniphi emasiko alabadzala? Ngobe abatigezi tandla uma badla.'' ³ Waphendlula watsi kubo, ''Nine nentiwa yini kutsi ningayihloniphi imitsetfo yaNkulunkulu ngenca yemasiko enu? ⁴ Ngobe Nkulunkulu watsi, 'Hlonipha uyihlo nenyoko,' futsi 'Loyo lokhuluma lokubi ngeyise nome nenina utawufa nekufa.' ⁵ Kepha nine nitsi, 'Nome ngabe ngubani lotsi kuyise nome unina wakhe, ''Nome nguliphi lusito lobongalemukela kimi manje sipho lesanikelwa kuNkulunkulu,'' ⁶ lomuntfu loyo akasadzingi kuhlonipha uyise wakhe.' Ngalendlela lena nilente labalite livi laNkulunkulu ngenca yemasiko enu. ⁷ Nine batentisi! Isaya waphrofetha ngani yini uma atsi, ⁸ 'Labantfu laba bangihlonipha ngetindzebe tabo, kepha tinhlitiyo tabo tikhashane kimi. ⁹ Bangikhonta ngelite ngobe bafundzisa imitsetfo yebantfu njengekukholwa kwabo.'' ¹⁰ Bese wabita lesicuku kuye watsi kubo, ''Lalelani futsi nivisise- ¹¹ Kute lokungena emlonyeni lokumngcolisako umuntfu. Esikhundleni, lokuphuma emlonyeni, loku ngiko lokungcolisa umuntfu.'' ¹² Bese labafundzi beta kuJesu batsi, ''Uyati yini kutsi labaFarisi bphatseke kabi uma beva lenkhulumo?'' ¹³ Jesu waphendvula watsi, ''Sonkhe sitfombo lesingakahlanyelwa nguBabe wami losezulwini sitawukhishwa emhlabatsini. ¹⁴ Bayekeleni, babaholi labatimphumphutse. Uma umuntfu loyimphumphutse ahola lomunye umuntfu loyimphumphutse, bobabili batawuwela eweni.'' ¹⁵ Phetro waphendvula watsi kuJesu, ''Sichazele lomfanekiso lona.'' ¹⁶ Jesu watsi, ''Nani solo nite kucondza? ¹⁷ Aniboni yini kutsi nome yini leya emlonyeni yendlula esiswini bese iyendlula iphuma iye lapho kulangcwatjwa bantfu khona? ¹⁸ Kepha letintfo letiphuma emlonyeni tichamuka enhlitiyweni. Nguletintfo letingcolisa umuntfu. ¹⁹ Ngobe enhlitiyweni kuchubeka imicabango lemibi, kubulala, kuphinga, bugwadla, kweba, kufakaza emanga, nekuhlambalata. ²⁰ Leti tintfo letingcolisa umuntfu. Kepha kudla ngetandla tingakawashwa akumngcolisi umuntfu.'' ²¹ Wabese Jesu uyesuka lapho waya ngasemaveni alamadolobha eThire neSidoni. ²² Buka, umfati labengumKhenani waphuma achamuka kulelo live. Wamemeta kakhulu watsi, ''Yiba nemusa kimi, Nkhosi, Ndvodzana ya Davide! Indvodzakati yami iphetfwe madimoni kabi.'' ²³ Kepha Jesu akamphendvulanga ngisho ligama. Bafundzi bakhe beta kuye bamucela, batsi, ''Mcoshe, ngobe umemeta emvakwetfu.'' ²⁴ Kepha Jesu waphendvula watsi, ''Angitfunyelwanga kunome ngubani ngaphandle kwaletimvu letilahlekile tendlu ya Israyeli.'' ²⁵ Kepha weta waguca ngemadvolo phambi kwakhe, atsi, ''Nkhosi, ngisite.'' ²⁶ Waphendvula watsi, ''Akusiko kahle kutsatsa sinkhwa sebantfwana bese usijika etinjeni letincane.'' ²⁷ Watsi, ''Yebo, Nkhosi, kepha ngisho netinja letincane tidla timvutfuluka letiwa emafuleni ebaphatsi bato.'' ²⁸ Wabese Jesu uyaphendvula utsi kuye, ''Mfati, lukhulu lukholo lwakho; akwenteke kuwe njengekufisa kwakho.'' Indvodzakati yakhe yaphiliswa kusukela ngalelo hora. ²⁹ Jesu wayishiya leyo ndzawo bese waya madvutane kuloLwandle laseGalile. Wenyukela entsabeni wahlala lapho. ³⁰ Ticumbi letinkhulu teta kuye. Baletsa kuye labangakhoni kuhamba, labangaboni, labangakhulumi, nebantfu labakhubatekile, nalabanyenti labebaphatsekile. Babetfula etinyaweni taJesu, wabaphilisa. ³¹ Ngako leticumbi tamangala uma babona bantfu labangakhulumi bakhuluma, tichwala tentiwe tilunge, labangakhoni kuhamba bahamba, futsi nalabangaboni babona. Badvumisa Nkulunkulu wa Israyeli. ³² Jesu wabitela bafundzi bakhe kuye watsi. ''Ngineluvelo kulesicumbi ngobe sebavele bahleli nami emalanga lamatsatfu futsi kute labatakudla. Angifuni kubahambisa ngaphandle kwekudla, nome bangaculeka endleleni.'' ³³ Bafundzi batsi kuye, ''Singatitfolaphi nje tinkhwa endzaweni lelihlane kanje kutowenetisa lesicumbi lesikhulu?'' ³⁴ Jesu watsi kubo, ''Tingakhi tinkhwa lonato?'' Batsi, Sikhombisa, netinhlati letincane.'' ³⁵ Wabese Jesu utjela leticumbi kutsi tihlale phasi emhlabatsini. ³⁶ Watsatsa letinkhwa letisikhombisa naletinhlanti, bese emvakwekumikisa tibongo, wahlephula tinkhwa watinika bafundzi bakhe. Labafundzi batinika leticumbi. ³⁷ Labantfu badla bonkhe futsi benela. Babese babutsisa emabhasikidi lagcwele tincetu letihleshuliwe lebekasele. ³⁸ Labo labadla bekumadvodza latinkhulungwane letine, ngaphandle kwebantfwana nabonina. ³⁹ Wabese Jesu uhambisa leticumbi wabese ungena esikebheni waya eveni laseMagadani.