¹ Djeso adabuda mutembere ese, wakati watchifamba, Wapfunzi Watche wadaswika kuna Iye kuti Wamupangize kulonziwa kwa thembere. ² Apo Iye adawadaira, atchilanga: "Hamusawoni zvense zvinhu izvi? Tchadiko Ine ndirikukubvunzani: hapalibe buwe linadzagala padzaulu pabuwe kuti halidzakhutchiwi". ³ Patche Djeso akadagala pa Bango la Oliveira, wapfunzi wadauya kuna Iye pawo wonga ese wadalanga: "Tibvunzeni, lini zvinhu zvinezvi pazvozvinadzaitika? Tchidzindikikro tchipi tchakuuya Kwanu futi kuguma kwanguwa ino?" ⁴ Djeso adadaira ese adawati: "Mhole kuti apalibe angakunyengezani. ⁵ Nazvinezvi wazinji wanadzauya mudzina Langu, watchilanga: 'ine ndine Kristu', ese wanadzanyengeza wazinji. ⁶ Munadzabva kulunga nkondo na dungu lankondo; wonani, amusapatiki, thangwe zvinadikana kuti zvinhu zvinezvi zviitike; apo akusi kuguma. ⁷ Thangwe dziko linadzamukira dziko, ese ukulu sososo na ukulu. Kunadzawoneka nzala na kutekenyeka kwambuto zizinji. ⁸ Apo zvinhu izvi ndizvo kutanga kukonza kwakuda kubala. ⁹ Napenepo wanadzakuperekani mukubonera ese wanadzakuulayani, futi munadzazondiwa paense madziko nakuda kwadzina Langu. ¹⁰ Ese wazinji wanadzaboneresiwa, futi munadzanyengezana mwega mwega, munadzazondana mwega mwega. ¹¹ Mazinji maprofiti iyakuphwata wanadzamuka ese watchidzanyengeza wazinji ¹² Nakuthimizirika kwaunyangazi, kuda kwawazinji kunadzatohola. ¹³ Apo weneule kuti analambirira kiswikira kumhera, anadzaponesiwa. ¹⁴ Vangeri iri laukulu linadzapalidziwa pentse pantsi ninga umboo kuna ense madziko; ese napenepo kunadzauya kuguma. ¹⁵ Napenepo, ungadzauya unyangazi wakufudza kuti kudalangiwa na Daniel, muprofiti, akadagala pambuto iyamukho (muerengi ngateteke), ¹⁶ wenweule kuti ali kuDjudea nawale kwenda mubango, ¹⁷ weneule kuti pantsuwa ngaleke kutchitha kuti kutola zvinhu munhumba mwatche, ¹⁸ ese weneule kuti alikumunda ngaleke kuhirira kuti atole nunguwo zatche. ¹⁹ Apo kuna wenewale kuti wanamimbana wenewale kuti walimumamisa nantsiku zenezo! ²⁰ Namatani kuti kuwala kwanu kuleke kuitika pangani iyamainza, kana Mugobera. ²¹ Thangwe kunadzawoneka kubonera kukulu, kuti tchipo zvidaitikakale kuswika tchintchino, futi akudzawonekizve. ²² Zingati ntsiku zenezo zitchileka kugwandizirha, hapalibe angadzaponesiwa; apo, nakuda kwawanyakusankuliwa, ntsiku zenezo zinadzagwandiziwa. ²³ Napenepo, munhu angakubvunzani: 'Wonani alipano Kristu!' kana, Aliuko Kristu!' Hamusatendi. ²⁴ Thangwe wa Kristu wakuphwata na maprofiti iyakuphwata iyanadzuuya ese iyanadzakupangizani zvidzindikilo zvizinji na zvitchamiso kuti wanyengeze, zvingakwanisika nawadasankuliwa. ²⁵ Wonani kuti ndirikuku tchenjezani. ²⁶ Napenepo, angakubunzani, 'Wonani kuti Iye alimurusere', hamusabudi; kana, Muwoneni alimukati mwanyumba', hamusatendi. ²⁷ Thangwe nadyali ninga mhenye inabuda kumabudira dzuwa ese inaetimira kuswika kumadokera, dyali anadzauuya Mwana Wamunhu. ²⁸ Panatchitumbi, penepo nkonye zinaungana. ²⁹ Ese nazvinezvi pakupera kumbonera kwantsiku zenezo, dzuwa linadzaita dima, mwezi haudzagaki, nyenyezi zinadzagwa kudzaulu, ese ntsimba zakudzaulu zinadzatekenyesiwa. ³⁰ Napenepo tchidzindikiro tcha Mwana Wamunhu anadzawoneka kudzaulu, ese ense mitupo iyapantsi inadzamuka futi wanadzawona Mwana Wamunhu atchiuya padzaulu pamakuti, nantsimba na kukuza kukulu. ³¹ Iye anadzatumira ngirozi Zatche nadungu likulu latolopito, ese iwo wanadzaunganiza wanyakusankuliwa Watche pamakhona manai iyapantsi, mumakhona ense iyakudzaulu. ³² Pfunzirani mutsazaniso wamuwonde: Nadyali payo mithai ingasarha ese inaphwikira masamba iyate, dziwani kuti tchirimo tchadipaduze; ³³ dyali basi, panu munawona zvense zvinhu izvi, zvinadikana mudziwe kuti Iye alipaduze, napamisuwo. ³⁴ Tchadiko Ine ndirikukubvunzani kuti dzinza iri halidzapindi, hazvisati zvaitika zvense zvinhu izvi. ³⁵ Kudzaulu na Pantsi zvinadzapinda, apo masoko Iyangu tchipo iyanadzapinda. ³⁶ Apo, pamusana pantsiku eneyo na nguwa, hapalibe anadziwa, kana ngirozi zakudzaulu, kana Mwana, apo ega basi Baba. ³⁷ Nadyali ninga zvidaitika Pantsiku za Nowa, zvinadzaitikawo basi pakuuya kwa Mwana Wamunhu. ³⁸ Thangwe pantsiku akusati kwaguma, iwo wakarja na kumwa, watchilolana ese watchita, kuswikira ntsiku zakuti Nowa apinda mungalawa; ³⁹ ese hawalibe kuzvierenga, kuswikira kuguma kwauya ese kudatola wense- nadyali zvinadzaita kuuya kwa Mwana Wamunhu. ⁴⁰ Napenepo wamuna wairi walimumunda; mubodzi anadzatoliwa, ese unango anasiiwa. ⁴¹ Wakadzi wairi wanadzagala walikugaisa; mubodzi anadzatoliwa, ese unango anasala. ⁴² Napenepo lindani, thangwe hamudziwi ntsiku ipi inadzauya Tchangamire wanu. ⁴³ Apo dziwani izvi: angati mwenekatchiro muyi anadziwa nguwa kuti mbava inauya, iye angadagala adalinda futi angadatenderalini kuti nyumba iyatche iphwaniwe. ⁴⁴ Napenepo, basi imwe munadikana kugala mudalongedzeka, thangwe Mwana Wamunhu anadzauya panguwa kuti amudzaemeri. ⁴⁵ Nadyali, mbani nyamubasa watchadiko futi mudziwi, kuti tchangamire watche amusiira kuwonerera wana watche, kuitira kuti awapase zvakurja panguwa tchaiiyo? ⁴⁶ Adakombolerha ndiye weneule nyamubasa kuti tchangamire watche anamuswikira alikuita izvi patche anauya. ⁴⁷ Tchadiko Ine ndirikukubvunzani: tchangamire watche anadzaiga pamusana paiye zvense zvatche anazvo. ⁴⁸ Apo nyamubasa wakunyangala adalanga mumoyo watche: 'Tchangamire Wangu alikunongwa', ⁴⁹ ese adatanga kunera wana watche, futi atchirja na kumwa namadzimwe; ⁵⁰ napenepo tchangamire wanyamubasa weneyo anadzauya pantsiku kuti iye hasikuemera, ese panguwa kuti hasi kudziwa, ⁵¹ ese anadzamugwanda maphisi ese anadzaundesa kubodziko nawa kukutu; kweneko kunadzawoneka tchiriro na tetemeka kwa madzino.