¹ Napenepo Ukulu wa Kudzaulu unadzatsazanisiwa wanyamankunda kumi kuti wadatola wakubvenekesa zvawo ese wadabuda kawonana nazvikomba. ² Wachanu wawo wakali waswiru ese wachanu wakali wakungwala. ³ Ese pawo maswiru wadatola zvakubvenekesa zvawo, iwo awalibe kutola mafuta kuna iwo; ⁴ apo wakungwala wadawisa mavedulu iyana mafuta pabodzi nazvakubvenekesa zvawo. ⁵ Ese tchikomba tchitchinongwa, wense iwo wadabatiwa nantsiye ese wadagona. ⁶ Apo pakati pausiku, kudabvika kukhuwa kubodzi: 'Wonani tchikomba! Budani muyasangane natcho'. ⁷ Napenepo wense wanyamankunda wadamuka ese wadaunganiza zvakubvenekesa zvawo. ⁸ Maswiru wadabvunza akungwala: 'Tipaseniwo mafuta padoko thangwe zvakubvenekesa zvathu zvikuthima.' ⁹ Apo wakutchenjera wadadaira, watchiti: 'Hazvikwanisiki, haiyawoneki iyakukwana kuna ife na imwe, endani kuna wagulisi ese gulani iyanu.' ¹⁰ Pawo iwo wadaenda kagula, tchikomba tchidaswika, ese wenewale kuti wakadakonzekera wadaenda natcho kuphwando lamutchato ese tsasa lidavaliwa. ¹¹ Pakupeza izvi wanyamankhunda wenango wadaswikawo basi ese wadalanga: 'Tchangamire, tchangamire, tivulireniwo tsasa'. ¹² Apo iye adadaira ese adati: 'Tchadiko ndirikukubvunzani kuti handikudziwini.' ¹³ Napenepo lindirani, thangwe hamudziwi ntsiku kana nguwa. ¹⁴ Thangwe zvidagala ninga mwamuna mubodzi kuti patche akaliduze kwenda dziko linango, adadaidza wanyamubasa watche ese adawaiga wawonereri waupfumi watche. ¹⁵ Kumubodzi watche adamupasa madenari machanu, unango adamupasa mairi, ese kuna unango iye adamupasa libodz - mubodzinamubodzi zvinapindirana naiye tchaiye, ese adaenda ulendo. ¹⁶ Tchiriporipotcho, weneule kuti adatambira zvichanu adaenda kazviita muphinduphindu ese adawonazve madenari machanu. ¹⁷ Zvibodzibodzizvo, adatambira zviwiri adaitazve zvinango zviwiri. ¹⁸ Apo weneule kuti adatambira tchibodzi adaendazvatche, adatchera buli pantsi ese adafutchira male iya tchangamire watche. ¹⁹ Ese pakupera nguwa ikulu, tchangamire wa wenewale wanyamubasa adahirira ese adalangilana na iye. ²⁰ Nyamubasa kuti adatambira madenari machanu adauya ese adauysa enango machanu; iye adati: 'Tchangamire, imwe mudandipasa madenari machanu. Wonani iyalipano enango machanu.' ²¹ Tchangamire watche adamubvunza: 'Zvamuche, nyamubasa wamuche futi wakutchena! Wagala wakutchena pazvinhu zvidoko; pamusana pazvizinji nditchakupasa. Pinda pamufantso wa tchangamire wako'. ²² Ese adafedzera kuna nyamubasa kuti adatambira madenari mairi adati: 'Tchangamire, imwe mandipasa madenari mairi. Wonani iyalipano enango mairi.' ²³ Tchangamire watche adamubvunza: 'Zvamuche, nyamubasa wamuche futi wakutchena! Wagala wakutchena pazvinhu zvidoko; pamusana pazvakuwanda nditchakupasa. Pinda pamufantso wa tchangamire wako'. ²⁴ Napenepo nyamubasa kuti adatambira denari libodzi aadati: 'Tchangamire, ine ndirikudziwa kuti munaukali; munakonkha panu mulibe kuzvara; ese munaunganiza panu mulibe kumwaza. ²⁵ Ine ndidagala naurtchi, napenepo ndidaenda ese ndidakoya pantsi denari lanu. Pano ndina zvanu mudandipasa'. ²⁶ Apo tchangamire watche adamudaira, atchilanga: "Nyamubasa wakunyangala ese nyopi, unadziwa kuti ine ndinakonkha pangu andina kuzvara futi ndinaunganiza pangu andilibe kugweza. ²⁷ Napenepo, ungadapereka male iyangu kuna wakoyi, ese pakuhirira kwangu ine ndingadaitambira nainango iyakutsanzikira. ²⁸ Napenepo, budisa denari latche ese pasa kuna weneule kuti anakumi madenari. ²⁹ Thangwe wense weneule kuti anazvo, zvakuwanda anapasiwazve - futi anadzagala nazvakuwanda. Apo weneule kuti alibe zvinhu, kuswira kuti iye adzatolerha. ³⁰ Thusani nyamubasa hasenzi kunza, mumakuti. Kweneko kunadzawoneka tchiriro na kutetemeka kwamadzino'. ³¹ Ese patche Mwana Wamunhu angauya mukukuza Kwatche na ngirozi zense naIye, napenepo Iye anadzagala pamupando Watche wakukuza. ³² Pamberi Patche iyanadzagala iyadaungana ense madziko, ese Iye anadzamwaza libodzi nalibodzi, ninga muuswi anamwaza mabira nambuzi. ³³ Iye anaiga mabira kuboko Latche lamadyo, apo mbuzi kuboko Latche lazvhere. ³⁴ Napenepo Mukulu Mukulu anadzalanga kuna wenewale wali kuboko Latche lamadyo: 'Uiyani, wakukombolerha kuna Baba Wangu, galani nhaka iyaUkulu kuti mudalongedzerha kubuda pakusikiwa kwa dziko. ³⁵ Thangwe Ine ndikana nzala ese Mudandipasa zvakurja; ndikana nyota ese Mudandipasa zvakumwa; ndikali mulendo ese mudanditambira; ³⁶ ndikalipezi ese Mudandipfekeza; ndikakonziwa ese Mudandisapota; ndikaliperezo ese Mudauya kandiwona'. ³⁷ Napenepo wakutendeka wanadzaira, watchilanga: "Tchangamire, ndirini pathu 44 tidakuwonani munanzala, ese Titchikurjisani? Kana na nyota ese Tidakupasani zvakumwa? ³⁸ Futi lini pathu Tidakuwonani muli mulendo ese Titchikutambirani? Kana pezi ese Tchikutsimizani? ³⁹ Ese lini pathu Tidakuwonani mulikukonziwa kana muperezo ese tidauya Kakuwonani?" ⁴⁰ Ese Mukulu Mukulu anadzadaira: "Tchadiko Ine ndirikukubvunzani kuti, zvanu mudaitira kuna mubodziwatche wabale Wanguwa wadokodoko, kuna Ine mudandiitirawo'. ⁴¹ Napenepo Iye anadzabvunza kuna wenewale wali kuboko Latche lazvhere: "Fundukirani kuna Ine, imwe wanyangazi, kumoto wakugala nakugala kuti udalongedzerha kuna dyabu na ngirozi zatche, ⁴² thangwe Ine ndikana nzala ese hamulibe Kundipasa zvakurja; ndikana nyota ese hamulibe Kundipasa zvakumwa; ⁴³ ndikalimulendo ese hamulibe Kunditambira; ndikalipezi ese hamulibe Kundipfekeza; mutenda ese muperezo futi hakulibe kundiwona'. ⁴⁴ Napenepo iwo wadadairawo basi, watchilanga: "Tchangamire, lini pathu ife Tidakuwonani nanzala, kana na nyota, kana mulendo, kana pezi, kana kukonziwa, kana muperezo, ese hatiribe Kukuwonani?' ⁴⁵ Napenepo Iye adawadaira: "Tchadiko Ine ndirikukubvunzani, zvanumulibe kuitira kuna mubodzi wawadokodoko Wangu, zvinezvo hamulibe kuitawo kuna Ine." ⁴⁶ Awa wanadzaenda kuphanitchi lakugala nakugala, apo akutendeka wanadzaenda kulalama kwa kwenda nakwenda.