¹ Napenepo Djeso adaidaira mbumba na wapfunzi watche, ² atchilanga: "Wanembi na wafalisi wanagala pa mupando wa Mozisi. ³ Napenepo mulikuda kuti iwo watemerenyi, waitenyi futi wakoyenyi. Apo amusatewezere basa lawo, thangwe iwo wanalanga, apo hawazviiti. ⁴ Ande, iwo wanasunga mitolo iyakulema kuti inachupha kudzusa, ese watchiiga mumapewa iyawanhu. Apo iwo awatekenyesi katchala kabodzi kuti wadzuse. ⁵ Iwo wanaita mabasa iyawo ense kuti wawoneke kuna wanhu, nazvinezvi wanathimizira tchinamato tchawo futi wanalaphisa nguwo zawo. ⁶ Iwo wambada mbuto zakutanga paphwando namipando iyakutanga musinagogi ⁷ na kukwaidzisana kwakhodzo mumisewu ese wadaidziwe 'Mupfunzisi' na mbumba. ⁸ Apo amudikani kudaidziwa 'Rabi', thangwe kuna imwe kuna mubodzi basi Mupfunzisi, ese mwense imwe ndimwe wabale. ⁹ Futi hamusadaizi kana munhu pantsi pa baba wanu, thangwe kuna imwe kuna Baba mubodzi basi, ese Iye alikudzaulu. ¹⁰ Apalibe anadikana kudaidziwa 'mupfunzisi', thangwe kuna imwe kuna Mupfunzisi mubodzi basi, Kristu. ¹¹ Apo weneule kuti ndiye mukulupakati panu anadzagala nyamubasa wanu. ¹² Weneule kuti anazvikuza anadzatcheswiwa, ese weneule anazvitcheswa anadzakuziwa. ¹³ Apo kuna imwe, wanembi na wafalisi, wakukutu! Imwe kuti munavalira Ukulu Wakudzaulu kuna wanhu. Nazvinezvi hamupindi futi hamudzasiyi kupinda wenewale kuti wanapinda. ¹⁴ [Kuna imwe, wanembi na wafalisi, wakukutu! Munafudza nyumba zawazvitche mutchiwasiriza na minamato mikulu. Munadzatambira kutongiwa kukulu. (Zvinembwa wakalekale zvinatewezera mukati mwa 14, wenango wanaiga kumberi kwa mukati mwa 12)]. ¹⁵ Kuna imwe, wanembi, wakukutu! Nazvinezvi munatenderedza bala na pantsi kuti muite tchithemeso. Ese patche iye anatenderedza mubodzi, unakuita kairi mwana wagehena kupinda imwe. ¹⁶ Kuna imwe, nkweyi mapofu, kuti munalanga: 'Weneule kuti anadumbira napakutchena, hazvisenzi, apo weneule kuti anadumbira na golide la pakutchena, adamanikidziwa na kudumbira kwatche'. ¹⁷ Mapofu maswiru! Mbani mukulu, golide napakutchena panatchenesa golide? ¹⁸ Ese Weneule anadumbira na alitali, hazvisenzi. Apo weneule anadumbira nazvakupereka kuti zviri pamusana patche, adamanikidziwa na kudumbira kwatche'. ¹⁹ Mapofu! Ntchipi tchikulu, zvakupereka na alitali kuti inakuza zvakupereka? ²⁰ Napenepo weneule kuti nanadumbira na alitali, anadumbira naiye, futi nazvense zvinhu zviri pamusana patche. ²¹ Ese weneule anadumbira napakutchena, anadumbira naiye na weneule kuti analalama mwenemo. ²² Ese weneule anadumbira nakudzaulu, anadumbira na mupanda wa Mulungu na weneule anaugalila. ²³ Kuna imwe, wanembi n wafalisi, wakukutu! Nazvinezvi munapereka tchakumi tcha hortelani, tcha endro natcha kominyo, apo mutchisiya njira zakukhodzeka za Mutemo--wakutemera, ntsisi na kutenda. Apo munadikana kuita zvinhu izvi nkabe kutewezera eneire. ²⁴ Nkeyi mapofu, kuti panapikinyula mbudu ibodzi, apo inakudyula kamela ibodzi! ²⁵ Kuna imwe, wanembi na wafalisi, wakukutu! Napenepo munatsuka kunza kwa ndiko na ndiro, apo mukati mudadzala nazvilombo na kutsausa. ²⁶ Wafalisi mapofu! Tsukani tchakutanga mukati mwandiko na ndiro, kuitira kuti kunzawo basi mugalewo mudatchena. ²⁷ Kuna imwe, wanembi na wafalisi, wakukutu! Nazvinezvi ndimwe ninga masiye iyakubvunda, kuti nakunza iyanaita ninga iyakudekedza, apo mukati mudadzala na mafupa iyawanyakufa nazvakunyangala. ²⁸ Zvibodzibodzivzvo, kunza basi munawoneka ninga wakutendeka kuna wanhu, apo mukati mudadzala aukukutu nazvakunyangala. ²⁹ Kuna imwe, wanembi na wafalisi! Thangwe mukulonza masiye iyamaprofiti munadekedzesa nhutu zawkutendeka. ³⁰ Imwe munalanga: "Deka titchirikulalama pantsiku zawa baba wathu, deka tiribe kugala wawoneki na iwo pakuerera kwagazi lamaprofiti". ³¹ Nazvinezvi, munadairira sososo naimwe wabodzibodzi kuti ndimwe wana wawawenewale kuti wadaulaiya maprofiti. ³² Pezesani basi mhimo iyawa baba wanu. ³³ Nyoka, dzinza lanyoka, munapunyuzika tani mukutongiwa kwa gehena? ³⁴ Napenepo wonani, ine ndirikukutumirani muprofiti, wadziwi na wanembi. Wenango watche mutchadza waulaiya ese mutchawakokomerera, ese wenango mutchadza wanera mumasinagoga ese mutcadzawatewerera mumasinagoga luwani na luwani; ³⁵ kuitira kuti lidzauiye pamusana panu lense gazi lawakutendeka wadathusiwa pantsi, kubudira pa Abeli, wakutendeka, kuswikira Zakaria, mwana wa Barakiasi, wanu mudaulaiya pakati pakutchena napaalitali. ³⁶ Tchadiko ine ndirikukubvunzani: "Zvense zvinhu izvi zvinadzauiya pamusana padzinza iri". ³⁷ Djerusalema, Djerusalema, kuti munaulaiya maprofiti futi mutchiphaiya wenewale kuti ndinakutumirani! Kangasi ine ndidaesera kuunganiza wana wanu, ninga nkuku inaunganiza titiyo tatche pantsi pamapapirhe iyatche, apo udalamba! ³⁸ Wona, nyumba iyanu itchadzasiyiwa rusere. ³⁹ Ine ndirikukubvunzani, hamutchadzandiwonizve kubudira nyamuntsi kwenda kumberi kuswikira ndalanga: 'Zvidakomborerha zvinabuda mudzina la Tchangamire'.