¹ Ese Djeseo adamudaira paswa na mutsazaniso, atchilanga: ² "Ukulu waKudzaulu udatsazana nankulu mulu kuti adaita phwando la mutchato wamwana watche. ³ Iye adatuma wanyamubasa watche kuti adaidze wenewale wadadaidziwa kuphwando lamutchato, apo iwowadalamba kuuya. ⁴ Paswa, mukulu mukulu adatuma wenango wanyamubasa, atchilanga: "Bvunzani wenewale kuti wadadaidziwa: 'Wonani, ine ndalongedza tchiswuswulo; n'gombe zangu na zvifuyo ndaulaya, ese zvense zvapera. Uyani ku pwando la mutchato"'. ⁵ Apo iwo hawalibe kuteteka ese wadaenda: mubodzi kumbunda watche, unango kagulisa: ⁶ Ese wenango wadabata wanyamubasa wa mukulu mukulu, wadawaita zvakunyazisa futi wadawaulaya. ⁷ Mukulu mukulu adagumbuka ese, adatuma masodja iyatche, wadaulaya waulayi wenewale futi wadapitsa luwani lawo. ⁸ Napenepo adalanga kuna wanyamubasa watche: 'Phwando la mutchato ladikhonzekera, apo wenewale kuti wadadaidziwa awakalibe kukwanira. ⁹ Nazvinezvi endani mumisangano iyazinjira ese wanumunaswikira wadaidzeni ku phwando la mutchato'. ¹⁰ Wanyamubasa wadaenda nazinjira ese wadakwetchaniza wense wawo wadawonawo, wamuche na wakunyangala. Napenepo, nyumba idadzala na wanyakudaidziwa. ¹¹ Apo, patche mukulu mukulu adapinda atchiwona wanyakudaidziwa, adawona mwamuna mubodzi kuti akalibe nguwo zamutchato ¹² ese adamuti: "Chamwali, wapidatani pano haulibe nguwo zaphwando?" Ese mwamunayo adawatama. ¹³ Napenepo mukulu mukulu adati kuna wanyamubasa: 'Sungani manja na mwendo iya mwamuna wenei ese muthuseni kumudima kunza, kua tchiliro na kugeda geda kwa mwadzino'. ¹⁴ Thangwe wazinji wadadaidziwa, napenepo wadoko wadasankuliwa. ¹⁵ Napenepo wafalisi wadaenda ese wadapangana kuti wanamubata tani Djeso pakulanga kwatche tchaiko. ¹⁶ Ese wadamutumira wapfunzi watche pabodzi na waherodi. Iwo wadalanga kuna Djeso: 'Mupfunzisi, ife tirikudziwa kuti ndiwe watchadiko ese munapfunzisa njira iya Mulungu natchadiko futi hamulibe basa nanzeru zamunhu ese amupangizi mutsauko pakati pawanhu. ¹⁷ Napenepo tibvunzeni kuti mukufunganyi? Zvinaita kubadala musonko kuna Cezar kana kuti nkabe? ¹⁸ Patche adabva marha iyawo, Djeso adawabvunza: "Thangwerani mulikundiesera, mikukutu iyanu? ¹⁹ Ndipangizeni nzolozka". Napenepo Wadamuuyisira denari libodzi. ²⁰ Djeso adawabvunza: "Njawani nkope iyi na dzina iri?" ²¹ Iwo wadamudaira: "Nja Cezar". Napenepo Djeso adawabvunza: "Pasani Cezar zva Cezar, ese kuna Mulungu zva Mulungu". ²² Pawo wabva izvi, wadachamisika, Wadamusiya ese wadaenda zvawo. ²³ Pantsiku eneyo, wadaenda kuna Iye masadusi, wacthilanga hakulibe kumuka, ese Wadamubvunzisa, ²⁴ watchilanga: "Mupfunzisi, Mozisi adati: 'Angati mwamuna mubodzi afa, alibe kusiya wana, mubale watche anadikana kulola mukadzi watcheyo ese aite mwana mubodzi kuna mubale watche"'. ²⁵ Pakana wabale wanomwe. Wakutanga adalola ese napenepo adafa. Halibe kuita mwana, adasiya mukadzi kuna mubale watche. ²⁶ Zvibodzibodzizvo kuna watchiwiri, watchitatu ese kuswikira watchinomwe. ²⁷ Pakupera kwa wense iwo, mukadziyo adafa. ²⁸ Tchintchino pakumuka, anadzagala wawani mukadziyo pawabale wanomwe? Thangwe wense wadagala wawo. ²⁹ Djeso, napenepo adawadaira: "Imwe mudaponyeka, thangweranyi amudziwi Zvinembwa kana ntsimba iya Mulungu. ³⁰ Thangwe pakumuka iwo awalolani futi akudzatchatiwi. Kunza kwa izvi, ndiwo ninga ngirozi za kudzaulu. ³¹ Apo, pamusana pakumuka pawanyakufa, hamulibe kuerenga zvanu mudabvunziwa na Mulumgu: ' ³² Ine ndine Mulungu wa Abrahama, Mulungu wa Izaki, futi Mulungu wa Djakobo?' Mulungu hasi Mulungu wawanyakufa, apo wawanyakulalama". ³³ Payo mbumba idabva izvi, wadachamisika na Pfunziso Latche. ³⁴ Apo, pawo wafalisi wadaba kuti Djeso awatamiza masadusi, iwo wadaungana. ³⁵ Mubodziwawo, mubodzi mukulu wa Mutemo, Adamubvunzisa, Atchimuesera: ³⁶ "Mupfuzisi, diwo upu Mutemo ukulu?" ³⁷ Djeso adawabvunza: "Ida Tchangamire Mulungu wako na moyo wako wense, na muzimu wako wense na nzeru zako zanse'. ³⁸ Uyu ndiwo ukulu futi mutemo wakutanga. ³⁹ Ese mutemo watchiwiri udayambana nauyu: 'Ida nyauyako ninga zvako unazvida iwe mubodzibodzi'. ⁴⁰ Pa mitemo miwiriyi inanyengerera wense Mutemo na waprofiti". ⁴¹ Pawo wafalisi watchidaungana, Djeso adawabvunzisa, atchiti: ⁴² "Mulikufunganyi pamusana wa Kristu? Ndi mwana wawani iye?" Iye adawabvunza: "Mwana wa Davidi". ⁴³ Adawabvunza Djeso: "Ninga napenepo Davidi, pamuzimu, anamudaidza Tchangamire, atchiti: ⁴⁴ "Tchangamire alanga kuna Tchangamire wangu: 'Gala ku marjo kwangu, kuswikira kuti ine ndaiga wanyamarha wako pantsi pantsoka zako?"'. ⁴⁵ Angati Davidi, napenepo, anadaidza Kristu "Tchangamire", zvinaitatani kuti Iye agale mwana wa Davidi? ⁴⁶ Apalibe Adamudaira masoko mabodzi iyoga, ese hapalibe munhu adamubvunzisazve kubudira ntsiku eneyo kwenda kumberi.