¹ Sô kintu azu toka koneta, sô mbê whã tetembu osé ku ta kiê ni tia. ² Sô a ré sabi fundu fénu. Sô ê biri fundu fenu, sô digô banda fô fundu whã fóno ngairu sô ku digô fundu é, kulu nkumbi ku lóndé. ³ Sô satasata siê fô digô é bi tia, sô a ré porê mora ma samangungu tê ni tia. ⁴ A manda ane pa ane na rana kapina, né kuakuali kua vêrê ô pó wha, masi nkênu ku na tê sinali Dêu tesa wha. ⁵ Sô na plometê mata ane nkênu é wha mazi, ka tometa ane duranti tanó mêzi. ka tometa ane mora ma samangungu ka morê nkênu. ⁶ Dié, ane nkênu ka ngolo motxi sô ane na ka bê wha sô ane ka pindji motxi mazi motxi ka fuzi ane. ⁷ Pólo ane satasata é sa mora kabalu pepalaru ra ngela. Diba ntê ane tê kua mora klôa olô, sô pólo ane kakô pól ngê. ⁸ Sô ane tê pena ntê mora pena ntê méngay, dentxi ane ta mora dentxi lion. ⁹ Ta ku klôa mora famenta felu, sô son aza ane ta mora son ri yô karu ku ka kolê ba ngela. ¹⁰ Ta ku kosi opé mora felon samangungu, sô kosi opé rê ta ku porê raná nkênu tanó mêzi. ¹¹ Sô ê ta mora alê diba ané anzu fenu nomi rê atô lúngua sa Abdon sô ni gegu sa Apolion. ¹² Pumbêlu Ai pasa, Sô ku turu kua é dosú Ai ka tô bi. ¹³ Sestu anzu toka koneta, sô ndê whã vozu ku bi fô kuana ponta atali olô ma a ka bê kota Dêsu. ¹⁴ Vozu fa sestu anzu ku tê koneta: " libeta ane kuana anzu ku sa nhegaru kota oyô ngairu Eufadi. ¹⁵ Ane kuana anzu ku sa pepalaru ra ola, ria mezi ku anu, a sota ane ri mata whã kiba ngê. ¹⁶ Ndjira kavaleru soré é sa duzentu milhon. Ndê ndjira rê. ¹⁷ Asié kua ma mbê, sa kabalu ku kavaleru é ta ku klôa bobôru mora fogô, zulu mora zasintu sô amarela mora ketxi fogô. Ntê ane kabalu tá mora ntê lion sô boka rê ta ka siê fogô ku digô fogô ketxi. ¹⁸ Whã kiba ngênu muê ku tesi paga é: fogô ku digô ku ketxi fogô ku ta siê fô boka ane. ¹⁹ Punda porê ane kabalu é ta boka ane ku kosi opé ane, punda kosi opé rê ta mora kiongô, Sô ê ta ku ntê rê ku ta ka povega motxi ra povô. ²⁰ Sô ane nkênu ku na muê punda pagá é, na lependê ri kua ma ane ta ka zi, né ane na desa baza ntê ra demono ku fêgula olô, plata blonzi, buru ku pó, ku na ka poi bê, né ndê né nda wha. ²¹ Sô ane na lependê ri mata otô, né ri baia, né ri dumi ku otô sô né ri futa wha.