¹ Sô ola kodêlu biri sambari sêlu, ta ku whã kamaia ni osé, kuaji mêa ola. ² Antó mbê sambari anzu ku ta ndjaru kota Dêsu, sô a ra ane sambari koneta. ³ Sô otô anzu tua whã kua sensu olô sô fika ndjaru zuntu atali. A ré yô sensu pa ê flesê ku lason ri turu santu, diba atali ngaviru kota tlonu. ⁴ Sô ri mon anzu banda ba kota Dêsu, irigô sénsu zuntaru ku lason ane santu. ⁵ Sô anzu tua kua sénsu sô sialé ku fogô atali sô zugé pê tia. Sô ê ta ku yô tovara, ku suá ku memeá sô tia wlukua. ⁶ Sô ane sambari anzu ku ta ku sambari koneta pepalá ri toka ane. ⁷ Pumbêlu anzu anzu toka koneta ane, sô tia ta ku stlénu, ku fogô usiru ku sangi! Whã ndjigi tia kema, whã kiba pó kema, ku turu kapina veré kema. ⁸ Segundu anzu toka koneta, sô whã kua mora whã ndjigi mundu komesa ka yêrê ku fogô ma a zuga pê mionga. Sô whã kiba mionga bila sangi. ⁹ sô whã kiba situ vivu mionga muê, sô whã kiba vapô rana. ¹⁰ Sô tisêru anzu toka koneta, sô whã tetembu kiê fô osé komesa ka kema mora whã toxa, diba whã kiba oiô sô ri fontxi aua. ¹¹ Nomi têtêmbu é sa absintu. Whã kiba aua bila absintu, sô yô nkênu muê punda aua ku bila ka manga. ¹² Kuatu anzu toka koneta, sô whã kiba sólo firi, mora whã kiba mbêzi ku whã kiba têtêmbu. Asié whã kiba ane bila kúlu. Whã kiba, tantu sólo kuma nsuku, na luzi wha. ¹³ Sô mbê ndê whã fankó ka pupuga katxi osé ka ngita ku fosa: Ai ai ai ri ysi ku ka vévia tia, punda toki otô koneta ku tô sa ri súa ku tesi anzu.