¹ Ma kua é pasa mbê kuana anzu ndjaru kuana kiba tia, ane tê kuana ventu tia pa ventu na sopua diba tia, né diba mionga né kontê né whã pó wha. ² Sô mbê otô anzu ku subi kiba ma sólo ka nasê né, ta ku sêlu Dêsu vivu. Sô ngita ku fosa ra ane kuana anzu ku ta tua odji ri rana tia ku mionga, ka fa: ³ Na rana tia, né mionga né pó atê nó ka séla tesa ane nkênu ku ka sivi Dêsu non. ⁴ Ndê numeru ane si ma a séla, ku sa sentu kuarenta kuatro mili ri turu zelason ane ná Israeli: ⁵ zelason Zurá kuiny dosú mili ma a séla. Zélason Rubén, kuine dosú mili, Zélason Gady kuine dosú mili, ⁶ Zélason Azé kuine dosú mili, Zélason Naftali, kuiny dosú mili, Zélason Manasé kuini dosú mili. ⁷ Zélason Simon, kuini dosú mili, Zélason Lévi, kuini dosú mili. Zélason Izaka, kuini dosú mili, ⁸ Zélason Zêbulon, kuini dosú mili, Zélason Zozé, kuini dosú mili, Zélason Bêzami kuini dosú mili ma a séla. ⁹ Ma kua pasa, sô mbê yô nkênu ma né whã nkênu na poi tanga turu nason zelason povô ku lungua, ndjaru whê tlonu ku whê kodêlu bisiru kabisi ziaru, ku fia pema mon rê, ¹⁰ Sô ngita ku fosa, ka fa: Savason sa ri Dêsu, non, ku sa tasoru tlonu, sô ku kodêlu. ¹¹ Turu anzu tá ndjaru, kondoka tlonu, ane soba ku kuana sitú vivu, sô baza ntê ku mpuna son whê tlonu sô lispeta Dêsu. ¹² Sô fa: "Amé, vungu ku goia, sêberô ka ra gasa onra ku porê ku fosa toka Dêsu non ra turu sekulu Amé!" ¹³ Sô whã sôba komesa ka lumba ka fa un: " Ane ta ka bisi kua bisi ziaru, Ngê sa ane sô andji ane fô!" ¹⁴ Sô un faré: Sumu bô ta. Sô ê fara un: " Yé sa ane ku bi fô parisê foga wha sô laba kua bisi ane sô bilé ziaru ku sangi kodêlu." ¹⁵ Ra kua é ane sa kota tlonu Dêsu sô ka sivi É pomonha ku nsuku ni ngêza Rê. Ysi ku sa tasoru tlonu ka sendê tenda Rê diba ane. ¹⁶ Ane na ka tô tê fomi né sêri dingi wha, né sólo na ka tô kiê diba ane, né ka lôlô wha. ¹⁷ Punda kodêlu katxi tlônu ka sa pastoru ane, sô Ê ka bé ku ane atê fontxi aua vivu, sô Dêsu ka kuta turu aua whê ane.