¹ Mbê ola kodêlu biri whã ane sambari sêlu é, sô ndê whã ane kuana situ vivu ka fa ku vozu ku súa mora tovara: ² " Sô mbê ma whã kabalu ziaru, kavaleru rê tua whã arku, sô a ré whã klôa. Sô ê siê mora whã vensêrô, pa ê vensê. ³ Ola kodêlu biri sêgundu sêlu, ndê whã sêgundu situ vivu ka fa: " Bi"! ⁴ Sô otô kabalu boboru siê, sô kabaleru rê a pimité txia paji fô tia, pa ane omé ka mata otô, sô a ré whã supara ngairu. ⁵ Ola kodêlu biri tisêru sêlu, ndê tisêru situ vivu ka fa: "Bi"! Sô mbê, sô whã kabalu petu ku kavaleru rê ku whã balansa mó rê. ⁶ ndê kua ka kô whã vozu katxi kua na situ vivu, ka fa: "whã ndjira tigu ra whã lêlu sô têsi ndjira sêvara ra whã lêlu, sô na rana mazi ku vin wha". ⁷ Ola kodêlu biri kuana sêlu, ndê vozu kuana situ vivu ka fa: "Bi"! ⁸ Sô mbê sô whã kabalu amarela, sô kavaleru rê a samé motxi, sô sisima poré tá ka lêlê. A ré ódji ri whã kiba tia pa ê maté ku supara, ku fomi, ku yô motxi, sô ku ane situ matu tia. ⁹ Ola kôdêlu biri kintu sêlu, mbê kosi atali ané alima si ku muê punda, Lumba Dêsu ku seseminha ma ane ta kuê. ¹⁰ Ane ngita ku fosa: " Atê keria, Soberanu Santu ri veré, bô ka desa zi zugamentu ane ysi ku ka vévia lêtu tia, sô ri vinga sangi non!" ¹¹ Sô kara whã a ra ane kabisi ziaru, sô a fa ane ma ane toka kansa txó anda, atê a ka kompleta numeru povô rê ku na amon ane ku ka bi muê mora ane. ¹² Sô mbê kodêlu biri sêxtu sêlu, sô tia Ulukua foga wha. Sólo bila kulu mora kabisi lutu, mbêzi bila mora sangi. ¹³ têtêmbu osé ulukua bi tia, mora ma pó figu ka desa figu vêrê kiê ola ma ventu fotxi ka sagurié. ¹⁴ Osé kiri mora ma a ka kiri whã mapa, sô turu mundu ku tia ka siê fô nga rê. ¹⁵ Antó ane alê tia, ane sôba, ane séfi, ane liku, ane ku tê porê tia, turu skavu ku livu kondê lêtu vuvu buru, méma buru londé. ¹⁶ Sô ka fa mundu buru: "Kiê diba non! Kondê non fô whê Nkênu si ku sa tasoru ni tlonu, ku léva kôdêlu. ¹⁷ Punda ria ngai ri leva Nkênu é seka bi za, sô ngêi ka poi ta ndjaru!