¹ Mbê mó leton Nkênu si ku ta tasoru ni tlonu, whã papelu buyaru sisikaru lêtu ku lua. Ê ta manharu ku sambari sêlu. ² Mbê whã anzu ka fa ku fosa: Ngey toka biri papelu si manharu sô txia ane sêlu é! ³ Né whã nkênu ku sa osé, né ku sa tia, né kosi tia, sa plontu ri biri ô lê papelu si manharu. ⁴ Nsúa foga wha punda a na bê né whã nkênu buaru ri biri né lê papélu si manharu wha. ⁵ Mazi whã soba fa un: "Na sua wha. Punda Lion Lasa Zurá, Familia David, vensê ri biri papelu si manharu ku sambari sêlu rê". ⁶ Mbê whã kodêru ndjaru, katxi Tlonu ku kuana situ vivu katxi ane sôba. Kodêru ka ko motxi. Ê ta ku sambari koneta ku sambari whê. Yé sa ane supitu Dêsu ma manda ra turu tia. ⁷ Ê bi sô tua papelu manharu é fô mon leton Nkênu si ku ta tasoru ni tlonu. ⁸ Ola kôdêru tua papelu si manharu, ane kuana situ vivu é ku ane makeri kuana sôba é pê mpuna son whê Rê. Kara whã ane ta ku whã koneta ku whã kopu ôlô siaru ku sénsu, ku sa lason santu. ⁹ Ane ta ka kanta wha vungu novu: Bô toka tua papelu manharu é sô biri sêlu rê, punda bô ta muê sô ku sangi Ô, Bô kopa ra Dêsu turu lasa, lungua, povô ku tia. ¹⁰ Bô zunta lênu seseroti ri sivi Dêsu non, sô ane ka bi govena turu tia. ¹¹ Antó mbê sô ndê kioiô ri yô anzu, vota tlonu, ane situ vivu ku ane sôba, ma turu ane ta ri mili mili, milhon milhon. ¹² Ane ta ka fa ku fosa: Kodêru ku muê mêrêsê tua porê, likêza, sêbê, fosa, lispêtu gioa ku vungu. ¹³ Ndê turu kiatula ku ta osé, ku tia, ku kosi tia ku mionga ku turu kua ku sa né ka fa: "Nkênu si ku sa tasoru ni tlonu ku kodêlu sa vungu, lispêtu, goia ku porê ri lena pla sempi". ¹⁴ Ane kuana situ vivu é fa: "Amé"! Sô ane sôba pê mpuna son sivi É.