¹ Ku turu kua é, mpia sô mbê ma whã póto ta biriru osé. Pumbêlu vozu ma ndê, mora vozu whã koneta ku fa ku amu, fa: " banda yngé sô nga musa ô kua ku ka ba ra ku turu kua é". ² Ta sô, nta ni Supitu sô mbê ma whã tlonu ta pêru osé ku ngê tasoru né. ³ kua ku ta tasoru tá mora buru jaspi ku ku saroni. Bóro tlonu é, ta ku whã kongô mora jimerara. ⁴ Bóro tlonu é ta ku makéri kuana tlonu, sô tasoru ane, ê ta ku makéri kuana sôba. Ane ta bisiru kua bisi ziaru sô ta ku klôa ôlô ntê ane. ⁵ Diba tlonu é ta ka siê memea ka lonka ku fosa ku tovara. Sô diba rê, sambari lampara ka kema, ku sa sambari Supitu Dêsu. ⁶ Sô kota tlonu é ta ku whã mionga mora ri vidu mora tasa ka luzi. Katxi ku boro tlonu é ta ku kuana situ vivu, siaru ku whê whê ku mema. ⁷ Pumbêlu situ vivu tá mora lion, sêgundu situ vivu , mora ná buê, ri têsi situ vivu é ta ku pólo mora whã omé, sô kuana situ vivu é mora whã fanko ka pupuga. ⁸ Kara whã tá ku samano aza sô tá siaru ku whê diba ku kosi. Pomonha ku nsuku, ane na ka ndja ri fa: "Santu, Santu, Santu sa Sun Dêsu Turu Porê, ysi ku ta, ku sa, sô ku sa ri bi". ⁹ Sô sémpi ma ane situ vivu é ka ra goia, porê ku vonté ra ysi ku tá tasoru tlonu. ¹⁰ Ane ta ka sivi ysi ku ka vévia atê atê sô ka zuga klôa ane pê kota tlonu, ka fa: ¹¹ Sun non ku Dêsu non sa buaru ri tua goia lispetu ku porê. Bô sô kia turu kua, sô turu kua ku sai fô punda vonté Ô.