¹ Zo an bê onsé novu y tia novu, punda pumbê onsé ki pumbê tia loké, sô mionga loké bêrê. ² An bi posó santu, Jéruzalé novu, ki ka tuka ni onsé ry Dêsu, lumaru mora whã nova yunkeru pan noivu ré. ³ Andê whã mémé vozu fô tronu, ka fa: "Ya kué Dêsu ku ane omé, sô Ê ka vevia ku ane. Ane ka sama povô Rê, sô popi Dêsu ka sa ku ane. ⁴ Ê ka suga aua whê ny whê ane, sô ê na tê motxi wha, né lutu né sua, né dolô punda turu turu kua vé loké bêrê. ⁵ Nkenu xi ki tava tasoru ni tronu fa: " An zi turu kua novu za". Ê fa: " Sisika, punda lumba xié ê sa fiely y véré". ⁶ Ê fa an un: Ane kué sa ziru! An sa Afa sô tô sa Oméga, Pumbê sô tô sa Utimu. Ngê tê sêdxi ngadé, sê kusta, kobo aua vivu. ⁷ Ngê ka konkistan ê ka leda turu kuê, An ngasa Dêsu ré, sô ê ka sa Ná Un. ⁸ Mazi nkênu ane kubaru, ane kosó dizu, ane ngê poréru, ane kiminôsu, ane pêvêtiru, ane fizelu, ane idolatra, ane xirigarô, lugé turu ane sa fôgô fénu. Ixié sa sêgundu motxi. ⁹ Whã dy sambanó anzu bi atê an un, ixi ki tava ku sambano tasa xiaru di sambano utimu pagá, sô fa: "Mbi ngé. Ãn nga musa sê nôiva, mengai kodêru". ¹⁰ Zó ê bé ku ãn, ni supitu, pa whã ngairu sô mémé lundu, sô ê musa ãn whã posó santu, Jeruzalé, ki tuka fô onsé ri Dêsu. ¹¹ Jeruzalé tava ku goia Dêsu, sô tava ka luzi mora whã joia ngoloru montxi, mora whã buru di jaspi kistalinu. ¹² Nha tava whã mémé y longó mulu ku kuin dosú potó, ku kuin dosú anzu ni potó, sô ê tava sisikaru ane nomi dy kuin dosú tibu dy Israeli. ¹³ Ni lésti, tinha têsi poto, ni notxi, têsi, ni sulu, têsi, sô ni oésti, têsi poto. ¹⁴ Ni mulu posó tava kuin dosú fundamentu, sô ê tava nomi di kuin dosú apostulu di kudêru. ¹⁵ Ngê xi ki tava lumba ki ãn ê tava whã boró axia mindji, di ôlô, pa midji posó, poto rê sô ku mulu rê. ¹⁶ Poso ê tava kuadrangulu, kumplimentu rê ê sa mora largura. Ê midji posó ku haste di mindji: kuin dosú mili estádiu di kumplimentu, di largura y di altura. ( Zó ki kumplimentu, largura y altura sa kué mé) ¹⁷ Ê turu sa mindji mulu: whã sêntu y kuiné tanó y tanó kovaru, mora mindji omé, axé mém sa mora ane anzu ka mindji. ¹⁸ Mulu rê sa jaspi, sô posó di ôlô limpu, mora vidru limpuru. ¹⁹ Ane fundamentu buru ê sa gavi ku turu mora di buru yúkaru. Pumbê sa jaspi, sêgundu rê, sa safira, tisêlu, rê kalsédonia, kuatu, rê sa wsmiralda, ²⁰ Kintu, rê sa sardonika, sêxtu, rê sa sardiu, sétimu, rê sa krisolitu, oitavu, rê sa berilu, nonu, rê sa topaziu, désimu, rê sa krisoprasu, désimu pumbê, rê sa jasintu, désimu segundu, rê sa amétista. ²¹ Ane kuin dosú poto ngairu ê sa kuin dosú pérula, sô kara poto ngairu ê sa ziru ku whã so pérula. Lua posó sa di ôlô limpuru, klalu mora vidru. ²² Ãn na bê ngêza lêtu posó wha, punda Sun Dêsu di turu purê y ku kodêru sa ngêza rê. ²³ Poso rê na pesiza soló wha né mbêzi pa luminé wha, punda goia Dêsu ka luminé, kandja rê sa kodêru. ²⁴ Ane povô savu ka nda ni kandja rê. Ane alê tia kabi ku goia ré. ²⁵ Ane poto ngairu na ka fisa soló wha, sô nsuku na ka tê dingi wha. ²⁶ Ane kabi ku goia sô ku lispêtu ri ane povô. ²⁷ Sô né whã kua suzu na ka letxa né whã, sô né whã ngê ku ka zi pekaru whã ô siriga, mazi nkênu xi ku nomi rê sa sisikaru ni Livu ri vevia kodêru.