¹ ô anzu musa un oiô dy aua ry vira, klaro mora kandja ku ka xiê ny trono dy Desu ku kordeiro, ² ny kathi dy lua posó. Ny kara boro dy oiô é, tia pó dy vira, ku ka da kui dôsu mora mé turu mêzi. Fia pó é sa pa kula pôvô. ³ Ingué na ka tô tê mali wha. Sô trono de Desu ku kordeiro ka ba sa ny posó ane kiaru ka xivi É. ⁴ Ané ka ba by wê rê sô Nomi Desu ka ba sa ny póló ané. ⁵ Ê na ka tô tê suku wha, ané na ka ba pisiza dy kandja wha, né sóló, punda Desu ka luzi ané, sô ané ka lena atê atê. ⁶ Sô anzu fa un: Ané lumba é setu sa veré. Sun Desu dy supitu dy ané pofeta manda anzu Rê pê musa ané kiarô Rê kua ko sê ka bi ra wêlé-mé. ⁷ Pia Aun, sê ka bi sê langa. Gasa ra nkêno ku ka ndê lumba dy livo é. ⁸ Aun Zón, sa nkênu ku ndê ku bê ané kua é. Ola ma un ndê sô bê kua é aun pê puna só opé anzu ku musa un ané kua é pãn pô doré. ⁹ Ê fa un. Na zi kua é wha! Aun sa mora sê ku ané ná món ô, ané pofeta, ku ané nkênu ku ka ndê ané lumba ry livu é. Adora Desu! ¹⁰ Ê fa un: Na fisa lumba ry pofesia dy livu é wha, punda tempo sa peto. ¹¹ Nkênu ku sa injustu ka zi injustis andá, nkênu ku sa suzu ku ka sarê ku mali rê sô. Nkênu ku sa justu ka sa zi buaru sô. Nkênu ku sa santu ka sa rê santu sô. ¹² Pia sô nga bi sê langa, likeza un sa ku aun pa ra kara wã sê ny kua ma sê zi. ¹³ Aun sa Alfa tô sa Omega, pimelo sô ku Utimo, Komesu ku Fim. ¹⁴ Goso sa da ané nkênu ku laba ane kabixi rê pê tê detu dy mé npó dy vira sô letxa ny posó ny potó. ( Notá: Y vêji ry: Goso sa nkênu ku laba kabixi rê, otô kopia nakulu dy livu: Goso ané ku ka ndê ané mandamento Rê) ¹⁵ Ka-ta lua ané kasô, ané fitisêlo, ané nkênu ku ka postitui, kiminôzu, ané nkênu ki xivi idolatria, ku turu nkênu ku ka ama sô ka siriga. ¹⁶ Aun Jizu, Un manda anzu Un pê ba fa kua é ny favolô dy nguêza. Âun sa léje tô sa rasa dy Davi, têtêmbu ka luzi Pomonha. ¹⁷ Supito ku Noiva fa: Bi: Nkênu ku ndê ka Bi! Turu nkênu ku tê sêri bi sô turu nkênu ku mêsê, tua ngasa áuwa ry vira. ¹⁸ Âun ka sesemunha turu ané nkênu ku ndê lumba dy pofesia dy livu é: ¹⁹ Xi un nkênu é tô pê kua Desu ka tô pê paga rê ku sa faro ny livu é. Si nkênu txia ané lumba dy fa dy livu é, Desu ka txia kiba rê ny pó ry vira ku sa ny pósó limpuro ané kua ku sa sisikaru ny livu y ( Nota: ôtô faru motxi naria kabi: Desu ka thia kiba ô ny Livu ry Vira sô né posó limpuro, ixi ku sa faru ny livu é. ²⁰ Ané nkênu ku fa ané kua é fa: Véré! Âun nga bi sê langa. Amé! Bi, Sun Jizu! ²¹ Ku gasa dy Sun Jizu ka sa ku turu nó. Amé.