¹ Sisika ra anzu ngeza Éfezu: yé sa lumba Nkênu si ku ka sustenta sambari tetembu mon leton Rê sô ku ka nda katxi sambari kandaja ôlô: ² Nta kua ma bô zi, suvisu ô ku vonté ku turu paxensa ma bô tê. Nta ma bô na ka pô kuxintxi omé mafé sô ma bô pova ane ku ka fa ma ane sa ngê Dêsu, mazi ane na sa wha, sô bê, ma ane sa fasu. ³ Nta ma bô ta ku paxensa, bô pasa yô pova punda nomi Un ma bô na fakêsê wha. ⁴ Punda nga kotrê ô punda bô desa pumbelu amolê. ⁵ Sô lembua nga ma bô kiê né lependê sô zi pumbelu suvisu. Si bô na lependê wha, nga bi lêlê ô sô mura kandja ô fô nga rê. ⁶ Ku turu bô tê ki kontrê suvisu Nikolata, ma an turu ka kontrê. Ngê tê oria ndê kua ma Supitu ka fa ngeza. ⁷ Ngê vense, nga ré dêtu ri mé mé Pó ri vira, ku sa Paraizu Dêsu. ⁸ Ra anzu ngeza Esmina sisika. Yé sa lumba Nkênu si ku sa pumbêlu ku utimu, ku muê sô tô vevia: ⁹ Nta fison ô ku pobli ô mazi (bô sa liku) sô ku mali ane ku ka fa ma ane sa zurê, mazi ku na sa wha. Ane sa ngêza demóno. ¹⁰ Na mendu punda ane sa kuaji padisê. Punda démono sa ri zuga whã whã sê pê pezu, pa a pova sê, sô sê ka bi parisê kuine ria. Ta setu atê motxi, sô nga ra ô klôa vira. ¹¹ Ngê tê oria ka ndê kua ma Supitu ka fa ngêza. Ysi ku vensê na ka parisê mali segundu motxi wha. ¹² Ra anzu ngêza Pegamu sisika: yé sa lumba Nkênu si ku tê supara limaru dosú kiba: ¹³ Nta nga bô ka ta né, ma ê sa nga ma porê demono sa né. Asié mé, bô ka ta buaru ni nomi Un. Nta ma bô na nega afé ô ku An wha, na ria Antipa, seseminha un buaru ku muê katxi sê ni nga ma demono ka ta. ¹⁴ Asié mé ntê txó kua kontê ô: Txó nkênu ku ka lêlê dotina Balon ku vonté, ku sina Balak ka luma whã siriga ku ane ná Israeli, pa ane mé kua ma a zi ra maji tô dumi ku ôtô a tôa. ¹⁵ Mora é mé, sê tê txó nkênu ku ka lêlê kua ma Nikolata ka sina ku vonté. ¹⁶ Sô, sela bô lependê! Ri otô mora nga bi lêlê ô sê langa sô nga bi zi gela kontrê ane ku supara boka un. ¹⁷ ngê tê oria ka ndê kua ma Supitu ka fa ngeza. Nkênu si ku vensê nga ré mana konderêru sô tô ra ane whã buru ziaru ku whã nomi novu sisikaru né, whã nomi ma né whã nkênu na té wha sela ysi ku tué! ¹⁸ Anzu ngeza Fiatira sisika: yé sa lumba Na Dêsu, ku tê whê kakô fogô sô opé mora bonzi puliru: ¹⁹ Nta kua ma bô zi, amolê ô, afé ô suvisu ô ku mora ma bô ka tá sempe. Sô nta útimu kua ma bô zi ku sa masi motxi rô kê pumbelu. ²⁰ Sô ntê kua é kontrê ô: Bô ka tolera mengay Jezabeli, ku ka fa pofetiza. Ma kua ma ê ka sina ka ngana ane na kia un dumi ku atôa sô tô mé ma a zi ra fegula. ²¹ Sô un ra ane tempu pa ane lependê, mazi ê na mesê lependê ri mali ane wha. ²² Sô nga zuga ane pê whã kama ka duêtxi, sô ku yô parisê ra ane ku ka dumi kuê, pêlu ménu ma ane ka lêpendê ri suvisu ane. ²³ Nga mata ná ane, ku turu ngêza ka bi ta ma Un sa Nkênu si ku ka ta sintxiru ku kosó. Nga ra kara whã suvisu ma ane zi. ²⁴ Ku ane ri Tiatira, ku turu ane ku na ka lêlê kua ma ane ka sina sô na ta kua ma demono ka funda wha. Nga fa sê: Na ka tô digi né whã kega pê diba sê wha. ²⁵ Sô sê toka ta plontu atê ma nga bi. ²⁶ Ysi ku vensê sô lokê suvisu un atê infin Nga ré oji diba nkênu tia. ²⁷ Ê ka govena ane ku vala félu sô, mora jara mavu, ku ka kebea ndjigi. ²⁸ Mora ma un tua porê Tata Un, An turu ka ra ane tetembu pomonha. ²⁹ Ysi ku tê oria ka ndê kua ma Supitu ka fa ngêza.