1
Yé sa kua ma Jizu Kistu zi pa ta, ma Dêsu Ré pa Ê musa ane na kia Rê kua ku sa ri bi ra whelemé. Ê zi pa ata ola Ê manda ane anzu ra na kia Rê Zon.
2
Zon fa turu kua ma ê bê ri lumba Desu sô fa ri Jizu Kistu.
3
Buaru sa nkênu ku ka lê ku nkênu ku ka ndê lumba ri kua si ma a fa sô kundji kua ku sa sisikaru né, punda ola sêka bi.
4
Zon, ra sambari ngeza Ázia: Ma ngasa ka sa ku sê ku pazi Nkênu si ku sa, sô ku ta sô ku sa ri bi ku sambari Supitu ku sa kota tonu Rê.
5
Sô ku Jizu Kistu, ku sa seseminha Fieli, Pumbêlu ku muê sô sa Riba turu alê tia. Nkênu si ku ama non ku pê non livi pekaru non punda sangi Rê.
6
Sô zi ri non whã lênu, saseroti ra Desu ku Tata Rê, goya ku porê sa pa Elê pa sempe ku sempe Amé.
7
Ya Ê sê ka, bi ku ombosi sô turu whê ka bi Bê zuntaru ku ane si ku maté. Sô turu gelason tia ka bi sua punda Elê. Ka bi sa Amé.
8
Nsa Afa ku Óméga. Sun Dêsu sô fa, "Nkênu ku sa, ku tá sô ku tá ri bi, Turu Porerozu".
9
An Zon na amon sê, ysi ku ka zunta ku sê ni parisê ku ni lenu, paxensa ri ta ku Jizu, tá ilha ma a ka sama Patmu punda lumba Dêsu ku seseminha Jizu.
10
Ntá ni supitu, ni ria Sun. Mema un, ndê whã vozu ngairu mora whã kiôyô.
11
Ku fa,"Sisiké pê whã livu kua ma bô bê, sô mandé ra sambari ngeza: Éfezu, Esmina, Pégamu, Tiatira, Sadi,Filadéfia ku Saudisea".
12
Mbila pa un pia nkênu ku tê vozu é ku ta ka fa ku an sô, ola umbila, mbê sambari kandja olô.
13
Katxi ane kandja é, ta ku whã mora Ná omé ku bisi whã manta longô, ku vitxa opé Rê ku whã xintu olô turu kiba petu Rê.
14
Ntê Rê ku pena ntê tá ziaru mora alã sô zia fé mora nevi. Sô whê Rê mora fogô ngéé.
15
Opé Rê, mora bronzi pulidu, bronzi si ma a fina ni fónó. Sô vozu Rê, mora kuminá yô aua.
16
Mon leton Rê, Ê tá ku sambari tetembu ku tá siê boka Rê, tá ku whã supara limaru dôdôsu kiba. Pólo Rê ta ka luzi mora solo ku ta ka luzi masi.
17
Ola mbê, nkiê opé Rê mora whã omé motxi. Ê pê mon leton Rê riba un sô fa: "Na mendu wha. Nsa pumbêlu ku Utimu.
18
Ysi ka vevia ku tá motxi, mazi ya Nga vevia pla sempe! Sô ntê sabi motxi ku mundu ri motxi.
19
Sô sisika kua ma bô bê kua ku sa ayé, sô ku ka bi ra.
20
Ra misteli ri ssmbari tetembu ma bô bê mó leton Un ku sambari kandja olô, ane sambari tetembu é sa ane anzu sambari ngeza, sô sambari kandja sa sambari kandja.