¹ Zo turu kué, andê ni onsé mora whã vogi fosa dy whã mémé povô, ka fa: " Alêluia! Salvason, goia y purê ka pêtêsê Dêsu non. ² Zugamentu rê sa véré y justu, punda ê juga mémé mérétriz ( méngai vira) ki tava ka dana tia ku prostituison ré. Ê tua vigansa ra sangi dine sêvu rê, ki ne me luga". ³ Otô vê dingi, ané fa: " Alêluia! Digó rê ka nda atê atê". ⁴ Ane kuini kuana ansion y Ane kuana sêri vivu baza ntê da Dêsu, ki tava tasoru ni tronu, fa: "Amé! Alêluia". ⁵ Zo ê siê whã vozi ni tronu, ka fa: Lova Dêsu non turu sêvu rê, sê ki ka lispêté, turu ngê txororo ô ngairu". ⁶ Zo un ndê whã vozi mora whã kua ngairu sô yô nguê, mora tomentu dy yô aua sô mora vogi dy tovara ngairu, ka fa: " Alêluia! Punda Sun, Dêsu ndê. Turu-Purê, ka rena. ⁷ Non ka gogo, non ka legéla, sô na ka da êlê goia, punda Ê vitxa fesa dy kodêru ( Ombô), sô noiva rê peparé za. ⁸ A légé pê bixi whã kabixi buaru ki ka luzi. ( Sô kabixi buaru é sa turu justisa dy santu.) ⁹ Sô anzu fa un: " Sisika kué: Ben aventuradu ane nkênu ku sa kuvidaru da fesa kodêru". Sô ê tô fa: " Ixi sa lumba Dêsu dy véré". ¹⁰ Un pê puna ni opé rê pãn adoré, zo ê fa un: Na zi kua é wha: Ãn sa mora ô y ná lumó ô ki tê sesêminha Jizu. Adora Dêsu, punda sêsêminha di Jizu ê sa supitu dy pofesia. ¹¹ Zo ãn bê onsé biriru sô un pié, ê tia whã kabalu ziaru ma kavaleiru ma ka sama Fiel di véré. Ê zuga y ê ka luta ku justisa. ¹² Whê rê sa mora kandja fogô sô, ntê rê, tê yô diadema zo whã nomi sisikaru ki newhã nkênu na konsê wha xiê na sa Êlê wha. ¹³ Sô Ê tia bisiru dy whã kabisi siaru ki sangi, y nomi rê ka sama Lumba Dêsu. ¹⁴ Ane soré dy onsé sigié ku kabalu ziaru, bixiru ku whã kabixi buaru, ziaru y limpu. ¹⁵ Boka rê tava ka siê katana fi ku ê ka firi povô tia. Ê ka govena ane ku boro dy felu sô piza ane ni lagar leva di Dêsu dy Turu-Purê. ¹⁶ Ê tê whã nomu sisikaru ni kabisi rê y kosó rê: Alê dy ane alê y Sun dy ane sun. ¹⁷ An mbê whã anzu ndjaru, ni Solo, ê tava ka gita da turu bisu dy onsé ku yô fosa ka fa: " Bingé, zunta sê tusê da ngairu sêia ri Dêsu. ¹⁸ Bingé y mé kani dy alê, kani dy komandatxi, kani dy omé purê, kani kabalu sô ku kabalêru rê sô kani di turu omé, turu ngê livi y turu ngê skravu, ê pôsa txororo mora ngairu". ¹⁹ Ãn mbê bêsta ku ane alê tia ku ané soré rê. Ane tava ka luma pa ane luta konta Nkênu xi ki tava tasoru ni kabalu y konta soré rê. ²⁰ Ane tê besta é, ku ê, fasu pofeta ki tava ka zi xinali ni whê ane. Ku ane xinali é ê ngana ane nkênu ki tua meka dy besta y turu ngê ki baza ntê da imagem rê. Ane dosu a zuga ane vivu ni fogô fenu. ²¹ Turu ane muê ku katana ki tava ka siê ni boka dy Ngê ki tava tasoru ni kabalu. Turu bisu onsé bila xiaru ki kani dy motxi ane.