¹ Whã ane sambari anzu ku tê sambari tasa bi sô lumba ku an: " Bi, nga musa ô zuizi ngai mengai alêiu ku sa tasoru diba yô aua. ² Ma ane alê tia dumi ku ane sô, ku vin puta, ma ane nkênu tia bebera kuê. ³ Anzu béku an whã obô, sô mbê whã méngai tasoru diba whã bésta boboru lalala siaru ku nomi mali. Bésta ta ku sambari ntê ku kuin koneta. ⁴ Mengai é ta bisiru kua bisi luxu ka luzi siaru ku pékaru sô suzu ku puta rê. ⁵ Diba tésa rê ta sisikaru ku whã nomi ku whã mistériu: " Ndjigi Babilonia, Máma ane bandira ku pékaru tia. ⁶ Sô mbê ma mengai é tá bébéraru ku sangi ane santu sô ku sangi ané pumbêlu omé punda Jizu. ola mbê, un fika babakaru foga wha. ⁷ Mazi anzu fara un: " Ra kuai ma bô sa babakaru asié! Nga ba fara ô suvisu mengai é ku bésta ku kégé. ( besta ku tê sambari ntê ku kuini koneta). ⁸ Bésta ma bô bê, na tô sai wha, mazi ê sa ri bi fô fundu fénu sô ê ka ba loké ku turu kua. Sô ysi ku ka vévia lêtu tia, ma nomi rê na sa sisikaru ni livu vira na a funda mundu wha, ka fika tometaru ola ane ka bê bésta ku tá sai, ku na tô sai aié wha mazi ê sêka bi. ⁹ Yngé é séla nkênu ku tê sêbê. Ane sambari ntê sa sambari montxi ma mengai sa tasoru diba rê. ¹⁰ Ane sa sambari alê turu. Tanó alê kiêru, whã sai, sô otô na si ndu wha. Ola ê ka bi, ê ka ngolo ta txó témpu. ¹¹ Bésta ku tá sai ku na tô sai ayé wha, ê sa náké alê, sô whã ane sambari alê turu, sô ka ba loké ku turu kua. ¹² Ané kuini koneta ma bô bê sa kuin alê ku na si tua whã lênu wha, mazi ané ka bi tua aji mora alê, zuntaru ku bésta, lêtu whã ola. ¹³ Ané tê whã pénsamentu sô sô ka bi ra porê rê ku oji rê ra bésta. ¹⁴ Ané ka bi zi ngéla kontê kodêlu, mazi kodêlu ka bi vênsê punda Ê sa Sun ri sun ku Alê ri alê, sô ane ma a sama, ma a koiê, ku ane fieli sa kuê". ¹⁵ Sô anzu fara un: " Ane aua ma bô bê, nga ma ane puta sa né tasoru, sa povô, motxi, nason ku lungua. ¹⁶ Ane kuini konéta ma bô bê, sô bésta ka bi tê ódjó ku ané puta sô ka bi desa ané zolaru sô unu. Ané ka bi mé kani ane sô tô kémé loké ku fogô. ¹⁷ Punda Dêsu pê kosó ané ka zi kua ane, zi ané kundji ri ra bésta porê rê ri govena atê ma lumba Dêsu ka kumpi. ¹⁸ Mengai ma bô bê sa poson ngairu ku ka govena diba turu alê tia.