¹ Sô ndê vozu ku bi fô ngêza fa ane sambari anzu: ba lukua sambari tasa ri leva Dêsu pê tia. ² Pumbêlu anzu ba lukua tasa rê pê diba tia sô kôsera mali ranaru bi ongê nkênu ku tá ku meka démonó, ane ku ta ka baza ntê ra fegula. ³ Segundu anzu lukua tasa rê pê mionga, ku bila sangi mora ri whã motxi sô turu situ ku ka vevia mionga muê. ⁴ Tiseru anzu lukua tasa rê pê oiô ku lêtu fundu aua sô bila sangi. ⁵ Ndê anzu aua ka fa: " Bô sa zustu, ysi ku sa ku tá, Santu, punda bô zuga ane kua é. ⁶ Punda ane baga sangi ane santu ku pofeta, sô Bô ra ane sangi é pa ane bêbê, mora ma ane mêresê, ⁷ nkunta atali kundji: Ê ê Sun Dêsu Turu Poderozu, zugamentu Ô sa veré sô Zustu. ⁸ Kuatu anzu lukua tasa rê pê diba solo sô a pimitié pa ê kema ane omé ku fogô. ⁹ Ane kema ku fotxi kalolô sô ra mali Dêsu, ku tê porê diba ane paga é sô ane na lependê pa ane ra gloa Ré wha. ¹⁰ Kintu anzu lukua tasa rê pê diba tlonu besta, sô kulu kiba lenu rê sô ane ome ta ka morê plopi lungua ane punda dolô. ¹¹ Ane ta ka fa mali Dêsu osé punda kosera ane sô ane na lependê ri kua ma ane ta ka zi wha. ¹² Sextu anzu lukua tasa rê pê oiô ngai Eufadi sô aua rê kuta ri koseta mondja ra ane alê ku ka bi fô kiba ma sólo ka nansê né. ¹³ Mbê têsi supitu mali ku ka kô akêlê ku ta ka siê boka dragon, fô boka démono fô boka fasu pofeta. ¹⁴ Punda ane sa supitu démono ku ka zi sinali foga wha. Ane ka ba lêlê alê turu tia, ri zura ane peza ria ngai ri Dêsu Turu Porê. ¹⁵ (" Ya nseka bi mora whã ladlon! Bensa sa ra ane ku ka seka zongó, ku ka ta ku kabisi rê kuê, pa ê na siê unú sô pa a bê vegonha rê wha".) ¹⁶ Ane zunta pê whã nga ma hebreu ka samé Amagedon. ¹⁷ Setimu anzu lukua tasa rê pê lua. Sô antó whã vozu siê fô ngêza fô tlonu ka fa: " Ê sa ziru"! ¹⁸ Ê ta ku miamia ku ki oio, tovara, sô whã kiba tia motxi ulukua, tia motxi masi ngai rokê kuakuali whã ka ta ra za ku ta ra na ane omé sa tia, ma tia motxi é ta ngai foga wha. ¹⁹ Poson ngai kebié têsi ndjigi, sô ane poson nason kiê. Sô Dêsu lembua Babilonia ngai tô ré kasi siaru ku vin ziaru ku furia leva rê. ²⁰ Turu ilha pendê sô a na tô bê ane mundu wha. ²¹ Buru ngairu demaru kuaji whã kilu, kiê fô osé pê diba ane omé, sô ane ra mali Dêsu punda paga é sa ngairu foga wha.