¹ Antó mbê otô sinali osé ngairu sô glavi foga wha. Ê ta ku sambari anzu ku sambari paga, ku sa utimu, punda kuê leva Dêsu ka loke. ² Mbê mora whã mionga vidru zoloru ku fogô. Ndjaru zuntu mionga, ta nkênu si ku vensê besta ku maji rê, ku numeru nomi rê. Ê ta ka tê koneta ma Dêsu ré. ³ Ane ta ka kanta vungu Muzé, nkênu Dêsu, ku vungu kodêlu: Ngairu buaru sa suvisu Ô Sun Dêsu, turu Porê. Zustu ku veré sa Mondja Ô, Alê nason. ⁴ Ngê na ka lispeta Sun wha, sô ngê na ka gaba nomi Ô wha! Punda Bô sô sa santu. Turu nason ka bi sô sivi Ô, punda suvisi zustisa Ô sa leveraru. ⁵ Ku turu kua é mbê, sô a biri ngêza tenda seseminha. ⁶ Sô sambari anzu siê fô nga santu ku sambari paga, bisiru ku linho glavi ka luzi sô ku faxa doradu turu kiba pêtu. ⁷ Whã ane kuana situ vivu ra ane sambari anzu sambari tasa glavi siaru ku leva Dêsu, ku ka vevia atê atê. ⁸ Sô ngêza sia ku yô digô goia Dêsu ku porê rê. Né whã nkênu na pô letxa né whã atê ma sambari paga ane sambari anzu ka loké.