¹ Sô mbê kodêlu ndjaru diba Montxi Lion Sion, sentu kuarenta kuatru mili ku ta sisikaru tesa ane nomi Rê ku Tata Rê ta kuê. ² Ndê whã vozu fô osé, ku whã son mora kioiô aua ku whã tovara ngairu. Sô vozu ma ndê ta mora tokarô koneta ku ta ka toka koneta rê. ³ Ane ta ka kanta whã vungu novu kota tlonu, kota kuana situ vivu, ku ane sôba. Né whã nkênu na pô sina vungu é wha séla sentu kuarenta kuatro mili ma a kopa tia. ⁴ Yé sa ane ku na konta mina ku mengai wha, punda ane ta ku ongê ane pulu. Sa yé ku ka lêlê kodêlu ba nga ma Ê ka bé. Yé sa koparu katxi povô mora pumbêlu ra Dêsu ku ra kodêlu, ⁵ Nétxó siriga a na bê boka ane wha, ane sa txiaru. ⁶ Mbê otô anzu ka pupuka katxi osé, ku ta ku lekaru atê ku bon lekaru ri fa ane ku ka vévia tia, ku turu nason, tribu, lungua ku povô. ⁷ Ê ta ka viza ku fosa. Lispêta Dêsu ré gloia, punda ola zugamentu Rê vitxa. Baza ntê ra isi ku zi osé ku tia mionga ku fontxi aua. ⁸ Whã segundu anzu lêlê, faré: " Ê kiê ê kiê ndjigi Babilonia konvêsê turu nkênu tia pa ane bêbê vin ri pekaru ri dumi ku otô". ⁹ Tisêru anzu tô lêlê, ka fa ku fosa: " Si nkênu baza ntê sivi démono ku fêgula rê, tô pê meka tesa ku mon. ¹⁰ Ê ka bêbê vin leva Dêsu turu, ma ê lukua sê zoló ni kasi leva Rê. Sô ê ka sa tomentaru ku fogô ketxi whê ane santu Rê ku whê kodelu. ¹¹ Digo tométu rê ka subi atê atê, Sô ê na ka kansa, né sólo né nsuku, ane ku ka baza ntê ra démono ku fegula rê, ku turu nkênu ku ka tua meka nomi rê. ¹² Yngé sô ane santu ka nguêta, ri ane ku ka lokê kua ma Dêsu manda ku afé ni Jizu. ¹³ Ndê vozu osé ka fa: "Sisiké: Nkênu ku ka muê ni Sun sa bensuado". Ê ê, Supitu sô fa. Ma ane ka kansa suvisu ane, punda suvisu ane ka lêlê ane. ¹⁴ Mpia sô nha ta ku whã ombôsi ziaru, sô tasoru diba ombosi é whã mora na omé. Ê ta ku whã klôa olô ntê rê ku whã supara limaru ni mon. ¹⁵ Antó otô anzu siê fô ngêza ka ngita ku fosa ra nkênu ku tá tasoru diba ombosi é: "Tê supara ô sô komesa ka koiê, punda tempu rê vitxa punda mé tia sa boboru pa a koiê. ¹⁶ Antó ysi ku sa tasoru diba ombosi la supara rê pê tia sô a koiê mé tia. ¹⁷ Otô anzu siê fô ngêza, bi ku whã supara limaru turu. ¹⁸ Sô otô anzu ku tê dêtu diba fogô siê fô atali, sô ngita ku fosa ra isi ku ta ku supara limaru: " tua supara ô limaru sô kiê ane nganha mé tia, punda uva rê sa boboru". ¹⁹ Sô anzu la supara pê tia sô koiê uva boboru zugé pê ndjigi nga léva Dêsu. ²⁰ A potó nga é lua poson sô ê siê sangi atê diba flê kabalu ni whã pasu ri mili sexi sentu metu.