¹ izu to kundji-é ku vesu fa: ² Govenu asé sa mora whãn, Alê ku zi fesa, kasamentu ra ná rê. ³ Ê manda ane ná kia rê bá sama ané nkenu má ê kuvira ra fesa kasamentu, mazi ané na mesê bi wha. ⁴ Alê tô manda ôtô ná kia, fa: Fa ané kuviraru é: bi punda un zi wha janta: Un mata buê ku sevaru za turu kua sa ziru za. Bi fesa kazamentu. ⁵ Mazi ané na tua kuraru wha bé ané: whã bêrê meviá ôtô bêrê nogóxo rê. ⁶ Sô ôtô tê na kiá alê, zi ané vegonha foga wha sô mata ané. ⁷ Sô alê fika ku furia, sô manda soré rê ba mata ané, kliminozu-é tô kema poson ané. ⁸ Sô ê fa ané ná kia rê: Fesa kasamentu sa né zá, mazi ané nkênu ma kuvirá na sa bi veré wha. ⁹ Antó ba lua lêtu mondja, turu nkênu ma bô ka bê kuvira ané ra fesa kasamentu. ¹⁰ Ané ná kia siê mondja zunta turu nkênu ma ané bê ê pô sa mafé ô buaru. Sô sala sia ku kuviraru. ¹¹ Mazi olá alê letxa pá ê pia kuviraru, ê bê whã omé ku na tá ku kabisi kasamentu wha. ¹² Sô ê fé: Migu má bô letxa inguê sê kabisi kasamentu! Sô omé-é kaboka. ¹³ Sô alê é fá ná kia rê: Manha món ku opé omé-é zuguê pê kosi kulu nga ku tê suá ku mé detxi. ¹⁴ Punda a ka sama yô nkênu mazi pôkô ma ka koiê. ¹⁵ Sô ané xefi nguêza bá ngoló mora de tê Jizu ni kua ma ê ka fa. ¹⁶ Sô ané manda ané maelu rê ku eródianu e ané fa Jizu: Mése nón tá má bô sa veré ma bô ka sina mondja Desu veré sô bô na ka pota ku konsê ne whã nkênu wha y bô na ka musa paxénsa katxi nkênu wha. ¹⁷ Antó fa nón kuai má bô ka kunda. Non pô paga impostu ô inó! ¹⁸ Ma ê bi ta mali ané: Jizu fa ané: Ra kuai ma sê sêka pova Un ku fassué. ¹⁹ Musa un lêlú impostu. Sô a biku whã lêlú Ré. ²⁰ Jizu fá ané: Nguêi tê fegula é ku nome-é! ²¹ Ané faré: De Sêzalu. Sô Jizu fa ané: Da Sêzalu kua di Sêzalu, y Dêsu ku sa di Dêsu. ²² Olá ané ndê kua-é, ané babaka desa non béné. ²³ Dié, Sadusêu ba lêlê fá ma a, na ka tô kora wha sô puté, ²⁴ fa: Mése, Muzeji fá: Si whã omé muê, na tê ná wha, si ná amon rê kapô kaza ku mengai rê tê whã ná ra ná amon rê. ²⁵ Ta ku sambari ná amon. Pumbêlu kaza sô muê. Na tê ná wha, desa mengai da ná amon rê, ²⁶ Mora é mé segundu ku, tisêru atê sambari. ²⁷ Sô ku turu ané mengai muê. ²⁸ Aié ola ané ka tô kora, kuali ané sambari ná amon é ma mengai-é ka tua! Punda turu ané ta kuê. ²⁹ Sô Jizu, kundji ané: Sê erá, punda sê na ta kua ku sa sisikaru né porê Desu wha. ³⁰ Punda ola a ka kora motxi, ané na ka tô kasa wha, alê kuê-é, ané sa mora anju de osê. ³¹ Mazi kua de lata motxi, sê na lê kua ma Dêssu fa wha. ³² Un sa Dêsu Abron, Dêsu Izaki, Dêsu Jako! Dêsu na sa Dêsu motxi wha mazi Dêsu vivu. ³³ Ola yô nguê ndê kua-é ane babaka ku kua ma Ê sêka sina. ³⁴ Mazi ola ané xefi nguêza nakulu ndê ma Jizu zi ané Saduseu kaboka, ané zunta. ³⁵ Whã ané, wha dotôlô alê ngoló pové-É. ³⁶ Mése, mandamentu alê sa kuali! ³⁷ Jizu fa ané: Ngogô ku Dêsu ô ku turu kosó ô, ku turu alima ô, ku turu kua ma bô ka pensa. ³⁸ Yé sa pumbê mandamentu masi ngaí. ³⁹ Segundu mandamentu mora é sa: ngogô ku nkênu ku sa bóro ô mora ô mé. ⁴⁰ De dosú mandamentu é ka dependê di turu alê ku pofeta. ⁴¹ Sô ola ane xefi nguêza nakulu ta zuntaru anda, Jizu puta ane fa: ⁴² Kua ma sê ka pensa di Klistu! Nguei Ê sa ná Rê! Ane faré: Ná David. ⁴³ Jizu fa ane: Má David ni Supitu, ka samé Sun, sô fa. ⁴⁴ Sun fa Sumu: Tason mon detu Un, atê ma nga pê numigu ô kosi opé ô! ⁴⁵ Sô ni David sama Klistu, Sun, Ma Ê sa ná David! ⁴⁶ Né whã nkênu na pô kundji-é whã lumba sô wha, sô né whã omé na abuza pufia kuê na dié wha.