¹ Sô Jizu fa yô nkênu ku mêlu rê, ² fa: Eskriba ku farizeu taso ny banku Muzé. ³ Sô kua ma ané mêsê ku ka manda sê, zé y lokê. Mazi na zi mora ma ané ka zi wha, punda ané ka fa mazi na ka zé wha. ⁴ Êê, ané ka pê pon sosi omé. Mazi ané ané mé na ka pô kêgê ku mó ané mé wha. ⁵ Ané gi turu kua ané pa sa bêru ra omé, sô aumenta filatêrio ané ka lega ntê diba kabixi. ⁶ Ané ngogo pimêlu nga ny bankêti ku pimelu banku ngêza nakulu ⁷ mantxa buaru ny lua sa samaru" Mésé" ra povô. ⁸ Mazi na sa buaru pa sama " Rabi", sô punda ê tê whã mesé sô, turu sê sa ná nimo. ⁹ Na sama ni whã omé tia tata s ê wha, punda pa sê ê tê whã tata sô, Ê sa onsé. ¹⁰ Né samaru mesé, punda pa sê ê tê whã mesé sô, Kistu. ¹¹ Mazi nkênu ku sa maxi ngairu katxi sê ka bi sa na kia. ¹² Nkênu ki ka da dy ngairu ka bi zi é vegonha nkênu ma ka umilha ka bi sa ngairu. ¹³ Mazi aí dy sê, eskriba, fingiru! Sê ku fisa Lênu Onsé ra omé. Sô na letxa wha na desa otô letxa wha. ¹⁴ Aidy sê, eskriba ku farizeu, fingiru! Sô loké ku kay dy mengai ku pendê omé ka fa lason motxi. Sê ka tua kondenason motxi. ¹⁵ Aídy sê eskriba ku farizeu fingiru! Punda sê ka nda turu mionga ku tia zi whã prozélitu. Ola ê ka tê bilaru whã, bogi ê dôsu vê maxi na fenu dôkê sê. ¹⁶ Aí dy sê, kondutôru segu, ku fa: NKênu ku zula ra Santuaru, na ka valê wha, mazi nkênu ku zula da ôlô santuaru sa obrigadu punda zugamentu rê. ¹⁷ Ségu malaboia! Kuali ku sa ngairu, olô ô santuaru ku ka santifika ôlô. ¹⁸ Nkênu kutxi ku ka zula ra atali, ná valê né whã kua wha. Mazi nkênu ku zula ra pezentxi ku sa diba êlê, sa obrigaru da zula rê! ¹⁹ Ségu! Kuali sa ngairu, pezentxi ô atali ku ka konsagra pezentxi. ²⁰ Sô nkênu ku zula ra atali, zula rê ra turu kua diba rê. ²¹ Nkênu zula ra santuario, zula ra ê ra nkênu ku ka vivê né. ²² Nkênu zula ra onsé, zula ra tlonu Dêsu da nkênu ku sa tasoru né. ²³ Aí dy sê, eskriba ku farizeu, fingiru! Sô ka da dizimu, hortelã, ku endro ku modja, mazi sê desa lumba masi buaru ra alê zustisa, mixikodji ku afé. Mazi sê tê ky zi kuê sê kondê otô. ²⁴ Kondutôru ségu, ku kua whã muskitu, mazi nguri kamêlu! ²⁵ Aí dy sê, eskriba ku farizeu, fingiru! Sô dipa lua kopu ku patu, mazi lêtu sa siaru kua mali sê paxensa. ²⁶ Farizeu ségu! Dipa pumê lêtu kopu ku patu, pa lua turu ka sa limpu. ²⁷ Aí dy sê, eskriba ku farizeu, fingiru! Sô sê sa mora tumba ku kiê, lua ka kô glavi, mazi lêtu sa siaru osó motxi suzu. ²⁸ Moré é mé, lua turu té ka kô zustu ra omé, mazi lêtu sa siaru dy xidiga ku mali. ²⁹ Aí dy sê, eskriba ku farizeu, fingiru! Punda sê zi tumba pofeta glavi ku mbila zustu. ³⁰ Sê fa: Si sê ka vevia ny ria tata nó, non na zunta ku ané ulukua sangi pofeta. ³¹ Sô, sê sa na dy ané ku mata pofeta. ³² Zi mindjira ta sê turu. ³³ Kiongo lasa kiongo mbaga, ma sê ka fuzi zuizu ku fenu! ³⁴ Sô bê, ãn nga manda pofeta, ku ta ku eskriba. Un Un ané sê ka mata ê tô pê kusu, Un Un sê ka da xikotxi ny sinagoga sê ka puxigui dy posó a posó, ³⁵ pa kiê diba sê turu sangi dy zustu zugaru ny tia, djina Abéli, zustu, atê Zakaria, na dy barakia, nkênu si sê mata ny santuaru ku atali. ³⁶ Véré mé ãn nga fa sê turu kua é ka bi diba gelason é. ³⁷ Jeruzalê, Jeruzalê, ku mata pofeta ku da ku buru nkênu ma ka manda sê! Kuantu vê ãn tenta zunta na sê, mora nganha zuntu ná rê koxi aza rê, mazi sê na mêsê wha! ³⁸ Bê kay sê sa desaru seku. ³⁹ Ãn nga fa sê, sê na ka bê un wha atê ku fa: Benditu nkênu ku bi ni nomi Sun.