¹ Punda Alé Osé sa mora wha Donu losa ku siê pomonha seru ba ngoló tabarô ra mevia rê. ² Olá ê luma ku tabarô wha lêlú kara ria, ê mandé ba meviá. ³ Ola ê ta siê dy tesi olá ê bê otô tabarô ku ta ku vonté plasa. ⁴ sô ê fa ane: ba taba mevia un nga paga sê. Sô ane ba taba. ⁵ Ê tô siê vota dy samanó olá, ê tô bé Uvua ola ê zi kua-é mé. ⁶ Ê tô bé vota dy kuine wha ola, sô ê tô siê ê bê ôtô ku ta ku vonté. Sô ê puta ane: ra kuai ma sê sa inguê ku vonté turu ria! ⁷ Ané kundji: Punda né wha nkenu na mesê kuvira non wha. Ê fa ane: sê turu ba mevia un. ⁸ Ola ê vitxa ngosi donu meviá fa nkenu ma ê pê konta mevia: Sama tabarô paga ane lêlú, komesa fô utimu atê pumbê. ⁹ Ola ane tabarô ma a luma ku ane kuine wha ola vitxa a paga ane wha lêlú. ¹⁰ Ola ma pumbê tabarô vitxa ane ta ka kunda ma ane ka nganha masi, mazi turu ane tua wha lêlú. ¹¹ Ola ane tua pagaentu, ane ba kexa donu losa. ¹² Ane fé: ane tabarô ku bi mema taba wha ola sô, mazi bô zi ane mora non ku taba turu kansaru ku yô kalolô. ¹³ Mazi donu kundji wha ane fa. Migu na ka zi ô inzustisa wha, na luma ku bô wha lêlú wha! ¹⁴ tua ki sa riô beô: Un tua disizon dy ra ane tabarô kontrataru memá mora bô mé. ¹⁵ Na tê diretu zi kua ma un mesê ku posi un wha! Ô bô tê ma whê punda un sa buaru! ¹⁶ Asiê dy mema ka sa whê ku sa whê ka ba mema. A ka sama yô mazi koiê pokô. ¹⁷ Ola Jizu ta ka banda ba Jeruzalé, Ê sama kuine dosú melu pataru ny mondja Ê fa ane: ¹⁸ ka pia: Non se ka subi ba jeruzalé, a ka ra ane xefi nguêza na kulú ku fasu xefi Ná Ome, sô a ka kondené maté. ¹⁹ Sô a ka ra ane zintxi pa ane zié tusan, ré sikotxi, pê kusú. Mazi ny tesí ria Ê ka tô kora. ²⁰ Sô mama na Zebereu bi lêlê Jizu ku ane na rê. Ê pê mpuna son kota Jizu pindjê wha kua. ²¹ Jizu puté: Kuai bô mesê! ê kundji: Manda pa govenu Ô, ane dosú mosu un ka pô tason wha mon dileto otô mon sikeru. ²² Mazi Jizu Kundji fa: bô na ta kua ma bô seka pindji wha. Sê ka poi bebê kalsi ma Un sa kuaji bebê! Ane kundji: Non ka poi. ²³ Ê fa ane: kalsi un sê ka poi bebê. Mazi tason mon deleto ô tason mon sikeru na sa Un ku ka kusintxi wha mazi yé sa ra nkenu si ma Tata Un ka plepala. ²⁴ Ola otô kuine melu ndê kua-é ane ta ku leva foga wha ku dosú na amon-é. ²⁵ Mazi Jizu sama ane bi lelê sô fa ane: Sê ta ma Govenarô zintxi ka zi zugamentu ome masi buaru sô ka sa ku odji diba ane. ²⁶ Masi ê na sa mora é katxi sê wha. Dy otô mora, ma kuakuali nkenu katxi sê ku ka mesê sa ngai ka sa na kiá sê: ²⁷ Kuakuali nkenu ku ka mesê sa pumbê katxi sê ka sa na kia: ²⁸ Asié ma Ná Ome na bi pa a sivié wha mazi pa Ê sivi, tô ra vira mora resgati yô nkênu. ²⁹ Ola ane siê fô Jerikó, yô nkênu lêlê. ³⁰ Sô dosú ome ségu ta tasaru bóro mondja: Ola ane ndê ma Jizu ta ka pasa petu, ane nguita fa: Sumu Na David, tê pena non. ³¹ Mazi yô nkênu ta ka manda ane kaboka ka fa ane sosegá. Ku turu kua é-é ane ta ka nguinta masi anda ka fa: Sumu Ná David tê pena non. ³² Sô Jizu ndja, sama ane sô fa: kuai ma sê mesê ma nga zi! ³³ Ane fé: Sumu, pa whê non biri. ³⁴ Sô Jizu tê pena ane, pê mon whê ane sô ane bila ka bê, e lêlê.