¹ Ni tempo é mé, ane melu Jizu bi lêlê sô puté: Nguei sa masi ngai ni Govénu osé! ² Jizu sama wha ná pikina, sô pê katxi ané sô fa: ³ kua nga fa sê veré ma pelu menu si sê na mura sô bila mora ná pikina wha, dy ne wha mora sê na ka letxa Govenu osê wha. ⁴ Sô nkenu si ku ka baza ntê mora ná pikina é sa masi ngai ny Govenu osê. ⁵ Sô nkenu si ku tua wha ná pikina-é ny nomi un, ka tua un. ⁶ Mazi nkenu si ku ka béku wha ná pikina si ku ka kêlê ny amu pa ê zi mali, sa milhó pa ê tua wha buru ngairu manha pê singô rê zuga pê fundu mionga. ⁷ Á dy mundu ku ka zi ane ra tópi! Punda mali ka bi mazi a dy nkenu ku ka zi mali bi! ⁸ Si món ô opé ô ka zi ô zi mali, koté zuguê ba londji ô. Ê sa milhó pa ô letxa ny vira mankêlê ô lezaru, dôkê pa a zuga ô pê fogô ku na ka paga wha ku dosú mon ô dosú opé. ⁹ Si wê ô ka sa zi mali, tukué zuguê ba londji ô. Ê sa milhó pa bo letxa ny vira ku wha wê dolê pa zuga ô pê fogô ku na ka paga wha ku dosú wê. ¹⁰ Kuiraru pa bô na dispreza ne wha kua txó-oróro é wha. Punda nga fa sê ma anzu-rê ku sa onsê ka bê pólo Táta ku sa osé turu ria. ¹¹ Punda Ná Ome bi sava nkenu ku ta pendêru. ¹² Kuai bô ka kunda! Si nkenu sa ku desú-sentu ombó, sô wha rê pendê, ê na ka desa wha sentu ku mé tatu wha nga, pa ê ba ngolo ku pendê wha. ¹³ Kua nga fa ô veré ma si ê bê ê ka sa ku ngôso masi dokê wha sentu ku mé tatu ku na pendê wha. ¹⁴ Mora é mé ma Tata sê ku sa osé ka mêsê ra wha txóororo-é wha. ¹⁵ Si na amon ô zi ô mali, bafé dy mali ma ê zi, bô kuê sô. Si ê ndê ô sa bô nganha na amon ô. ¹⁶ Mazi si ê na ndê ô wha, bô ka bi ku dosú ô tesí sesteminha turu lumba ka sa veré. ¹⁷ Si ê na ndê wha, bô ka ba fé nguêza. si ê na ndê nguêza wha, bô ka pié mora jintxi ô koblarô impostu. ¹⁸ Kua nga fa sê veré: ma turu kua ku ka liga ny tia ka sa ligaru ny osé: y turu kua ku sa disligaru ny tia ka sa disligaru ni osê. ¹⁹ Antizi kua é, nga fa sê ma si dosú kusitxi ny tia ra kua kuali kua ma sê ka pindji ê ka sa ziru ny favolô ane ra Tata, ku sa osé. ²⁰ Punda nga ku tê dosú ô tesí zuntaru ny nomi un inguê é un sá katxi ané. ²¹ Sô Peru bi sô fa Jizu: Sun, kuantu vê ma na amon Un ka zi un mali ma nga poré! Atê sambari vê! ²² Jizu kundji: wha sentu ku kuiné kin vê. ²³ Punda Govenu Osé sa mora wha alê ku ta mesê zi konta ku wha ná kia. ²⁴ Ola ê komesa ka seta konta a bi ku wha ná kia ki ta devê kuine mili lêlú. ²⁵ Mazi ma ê na ta ku mora pagué wha, mése rê mandê bendê ku mengai rê ku turu kua ma ê ta kuê pa ê paga lêlú-é. ²⁶ Sô na kia kiê ku mpuna son whê rê sô fa: Mésé tê paxensa ku an nga paga ô turê. ²⁷ Sô mésé na kia é, ku pena rê, liblé poré divida. ²⁸ Masi ná kia é siê bê wha na kia rê ku ta devê dosú sentú. Ê tê pemê ngono-ngono rê, sô fé: Paga kua ma bô devê un. ²⁹ Masi na kia-é kiê pindjê fa: tê paxensa ku an nga paga ô. ³⁰ Mazi pumbê na kia-é na poré wha. Ra kua é-é, ê zuguê pê pezu, atê ê ka paga turu lêlu é. ³¹ Ola otô na kia bê turu kua ku ra, ane satia, ba tanga mésé turu kua ku ta ra. ³² Sô mésé na kia-é samé fé: Na kia máfé un pora ô ku turu divira punda bô pindji un. ³³ bô na pô ka tê pena na kia ô mora ma un ta ku pena ô wha. ³⁴ Mésé rê satia foga wha tué ba ra ane nkenu pa beté atê ê ka maia pa ê paga turu lêl ma ê devê. ³⁵ Mora é mé ma Tata un ku sa osê ka zi sê si kara wha sê na pora ná-amon sê dy turu kosó wha.