¹ Jizu oló Mê tia ka passa, ê bê un-ua omé sego ndjina ê nansê. ² Ané nkenu-Rê puté: Rabi, nguê peka pa omé-é nansê sego! Êle ô pairê kuê! ³ Jizu kundji: Né êlê né pai-re-kué peka, magi ê sa pa obra Sun sa biriru né. ⁴ Nó sa pa no zi obra de Nguê mandé-É, mê sa pomonha anda. Suku sa vitha, ma né-un-ua nguê na pô taba wa. ⁵ Ma Un sa mundo, An sa kandja de mundo. ⁶ Oló ma Jizu fa ane kué, zuga kupe pe só, zi un-ua lama ki kupi Rê, onté wê de omé é ki lama-é. ⁷ Jizu fé: Bé, laba wê ni tanki de siloé ki signifika mandaru. Antobomé bé, laba e bila ka bê. ⁸ Antó, vidja de omé-é nana-na mora pindjirô fa: Na ié ki sa kustumaru ka tasso ka pindji gimola! ⁹ Oto fa: Êlê mé. Ôtô ka fa: Ino, magi ê sa mora rê. Magi, ê fa: An un mé. ¹⁰ Ané fé: Magi, ma wê ô biri! ¹¹ Ê kundji: Omé ki ka sama Jizu zi un-ua lama e onta pê wê un, sô, fa un: Be laba ni siloé. Antó an bé, laba e an bila ka bê. ¹² Ané fé: Êlê-Ô! Ê kundji: An na ta wa. ¹³ Ané bi ki omé ki tia sego da farizeu. ¹⁴ Dia-é era sabaru, ôlô ma Jizu zi lama e biri-wê rê. ¹⁵ Magi farizeu tô puta dingui ma wê ô bila buaru. Ê pê un-ua lama ni wê-un, an labé, aié an sa bê. ¹⁶ Ané farizeu fa: Oméé na bi di Dessu wa, punda, ê na ka lokê sabaru-wa. Ôtô fa: Ma nguê ka pô zi ané sinali-é sa pekarô! E ané pathi ané ki ané. ¹⁷ Antó, ané puta sego dingue: kua ô ka fa de Nguê ki biri-ô wê! Ségo-é fa: Ê sa profeta. ¹⁸ Ni momentu-é, judeu na kêlê anda mê tia sêgo e mê tia tuaru wê até ma sama táta de omé ki passa ka bê. ¹⁹ Ané puta táta rê. Ié sa ná sê ki nansê ségo! Má ê ka pô bê aié! ²⁰ Táta rê kué kundji ané: Nó ta ma ié sa ná nó, e ki nansê ségo. ²¹ Ma ê ka bê aié nó na taua. Puté. Ê sa omê tamé e ê ka pô kundji da êlê mé. ²² Táta rê kuê fa kuê punda ané tia ki mendu de judeu, punda ié tia assêtaru ki kualikuali un-ua ki fa Jizu mora Kristo tó ka sa thiaru di sinagoga. ²³ Punda kuê táta ô kuê fa: Ê sa omé tamé, pa puté. ²⁴ Segunda vezi dingui, ané sama omé ki tia ségo e fé: Da gloria Dêssu! Nó ta ma Omé-é sa pekarô. ²⁵ Antó omé-é kundji: Si Ê sa pekarô ô inó, an na tawa. Un-ua kua un ta: an tia s[ego e aié an sa bê. ²⁶ Antó ané fé: Kua Ê zi da ô! Ma Ê biri ô wê! ²⁷ Ê kundji: An fa sê za, e sê ná ndê un-ua! Punda kuai sê mê sê ndê dingui! Punda sê mê sê zé nkenu sê! ²⁸ Ané keta-kuê fé: Bô sa nkenu Rê, nó sa nkenu de Moizé. ²⁹ Nó ta ma Dêssu fa da Moizé, magi Omé nó na ta luguê mê bi né wa. ³⁰ Omé-é kundji ané, fa: Ié sa kua buaru! Sê na ta luguê Rê wa, e axéme Ê biri wê. ³¹ Nó ta ma Dêssu na ka ndê pekarô wa, magi se nguê ka ado-Ré e zi vonté Rê, Dêssu ka ndê. ³² Ndijina komessu de mundu, a na xi ndê ma né un-ua nguê biri wê de un-ua omé ki nansê ségo. ³³ Si omé na ka sa mandaru de Dêssu wa, Ê na ka zi né-un-ua kua wa. ³⁴ Ané kundjé e fé: Bô nansê pekaru, e aié bô sa sina nó! Antó ané kolê-kuê. ³⁵ Jizu ndê ma ané kolê-kuê de sinagoga. Ê bê e fé: Bô ka kêlê de ná Omé! ³⁶ Ê kundji fa: Nguê sa ié, Sun, pa un kêlê Né! ³⁷ Jizu fé: Bô bê ja, e Ê sa ixi ki sa fa kiô. ³⁸ Omé-é fa: Sun, an nga kêlê. Antó, ê ado-Ré. ³⁹ Jizu fa: An bi da jugamento de tíé, pa nguê ki na ka bêua ka bê, e nguê ki ka bê ka bila sêgo. ⁴⁰ Ané farizeu ki tia nha, Ndê ka fa ané kuê, e puté: Nó també sa sêgo! ⁴¹ Jizu fa ané: se sê ka sa sêgo sê na ka tê pekaru wa. Magi, ma sê ka fa: Nó bê, anto pekaru sê ka kontinua.